Tuesday, December 25, 2007

مكنت اتجوزت امى احسن .. ..





الصراحه يعنى .. انا مش عارفه اتكلم م هول الصدمه

سلامو عليكم الاول ..

مالك ياسمسمه بتنهجى كده ليه ..

م اللى شوفته م اللى شوفته .. عاديك يااخويا ويااختى ع اللى شوفته

حدث ف شارعنا حدث جلل

بنت الجيران اللى قصادنا .. اتكتب كتابها تانى يوم العيد

عؤبالنا ياااااارب وعؤبالكم وعؤبال السامعين

البت امبارح خرجت معاه تتفنسح .. وانا شوفتهم بعينى اللى هياكلهم الدود دول

مش هخبى عليكم .. حسيت بمراره فزيعه والدمعه كانت هتفر م عينى وهى مأنكجه ف العريس كده

وسرحت بمخلخلتى (( مخيلتى يعنى )) وقلت ياترى القرد اللى هأنكج فيه هيبقى شكله عامل ازاى

هاااااااااااااااااااا .. تنهيده مصاحبه بخروج نار افضت لخسائر قليله ف الارواح

ودخلت أنكجت ف الكتاب ... ماهو ده اللى احنا فالحين فيه اصلا

بس الرغى ده كله مش موضوعنا برده ..

النهارده بقى بعد المغرب كنت قاعده بزاكر برده

لقيت ماما حبيبة قلبى .. جايه تندهنى تقلى تعالى البت خارجه مع العريس

ولا اتحركت م مكانى .. قولت بس ماما هتاخدنى وتستفرد بيا وتاخد منى اعز مااملك

كتابى طبعا .. وتقلى شايفه اهى معهد واتجوزت وزى الفل ... مش زيك بقيتى شبه العفريت م يوم

مادخلتى معهد الحكمه بتاعكم ده ..

لقيت ماما بتنده باستماته

قلت يمكن يكون ف حاجه بجد .. وبعدين امى لو عايزه تسمعنى القصيده

هتيجى لحد عندى وتسمعهالى .. مش اشكال يعنى ..فاسمعها ف البالكونه ف الطراوه احسن

خرجت ايوه يامااااا مــــــ

شوفت منظر وقف شعر راسى الصراحه ونزع منى البرائه

البنت لابسه بنطلون جينز استرتش وبدى ع كمر البنطلون .. وحزام بيلمع ساقط

وفارده شعرها وحاطه كمية ميكب مرعبه ....

ولولا انى شوفت اخوها واقف معاها .. كنت افتكرت ان حصل غزو م كازينو الليالى السوداء اللى ف الهرم

اخر شارع العريش ده لشارعنا

ملحوظه متملحظه :: البنت دى كانت لابسه خمار .. ان ان ان

وهى كانت السبب ف انى اتحجب م اولى اعدادى .. وكانت بتدى دروس ف الجامع وبتحفظ الاطفال القرأن

واهلها ع قدر كبير م التدين ..

طبعا انا وقفت فاتحه بؤى لحد مركبت مع الباشمهندس العريس العربيه وغاروووا

ولبست ونزلت جرى ع ماماتها .. وطلعت الحكايه ايه بقى

ان العريس اللى صمم انها تخلع الخمار .. هو عايز ست يتجوزها

وقالهم بنفس الجمله .. ماكنت اروح اتجوز امى احسن

ياربىىىىىىىىىىىىىىىىىىىىىى

قلتلها ياطنط .. دى مفروض مجرد مايقولها كده تخلعله الشبكه وتطرده براا فورا

قالتلى ويطلقها ..

قولتلها وتتحرق بجااز ...

قالتلى كمان ده عريس غنى وجابلها شبكه ب 20 الف وعفش ب معرفش كام وهيعملها فرح فين

ابقى خلى الحجات دى تنفع بنتك ف اخرتها ولا اقولك ..

ابقى افرحى بيها لما تجيلك ملفوفه ف ملايه ف نصاص الليالى ..

ربنا يرحمنا ..

وسبتها ومشيت .. معرفش جاتلى الجراه ازاى انى اقول الجملتين دول لواحده ف عمر امى

بس الصراحه انا مكنتش ف وعىى

يالهوى يالهوى يالهوى .. ياجدعان

انا كنت اسمع عن زنا المحارم ... وازاى اخ او اب اللى ينهشوا لحمهم بنفسهم

واسمع عن الزوج اللى اجبر زوجته انها تجالس اصحابه

لكن دايما كان بيرد جوايا حاجه تقلى لا ده افورة صحافه .. ده ضجة اعلام

مش ممكن اب او اخ او زوج يعمل كده

مجتمعنا لسه بخير برده
...

اهو انا شوفت بعنيا خلاص ... كله اتدمر كله اتكسر ..

العريس زباله .. ده شىء مفروغ منه .. زباله وديوث ومعندوش نخوه

وم ذوات الدم البارد ومحصلش حتى الحمار اللى بيحمى حمارته م الحمار اللى جنبه

لكن انا عايزه افهم ايه اللى يخلى البنت دى تقبل بالوضع المهين ده

وهى اللى كانت بتقولنا لا طاعة لمخلوق ف معصية الخالق

وامها المنقبه واللى بتتحجج بحجج واهيه علشان تبرر الموقف

هل ده لان البنت رفضت عرسان كتير وفسخت خطوبات اكتر علشان كانت بتدور ع السوبر مان

السوبر ماديا طبعا ... واخيرا جالها

طيب ماهو بالمنظر ده خلاص عرفنا جاب فلوسه منين يااست الحسن

باينه زى الشمس

ولا خايفه انها تتطلق فعلا .. وتحمل لقب مطلقه م قبل ان تنعم بلقب المدام

ولا خايفه ان الفرصه دى بكل مظاهر ترفها متتكررش تانى ..

ولا ايمانها كان ضعيف وابهرتها الوان الترتر اللى ع البدى والحزام الساقط

وكانت م زمان بتحلم تعمل كده .. ولما جتلها الفرصه .. فما صدقت

انا عايزه افهم دى هتأامن ع نفسها معاه ازاى دى ياجدعان .. ولا هيتقى ربنا فيها ازاى

وهو واضح اصلا انه علاقته بربنا .. كلمه م اربع حروف مكتوبه ف بطاقته ((مسلم ))

....
ياترى حياتهم هتكمل .. ولو كملت هيبقى شكلها ازاى .. ولو خلفوا عيال هيبقى اخلاقهم ازاى

...

انا بعقلى الزوغير بتاع ال 21 سنه لسه .. شايفه انها بنت ال 28 خسرانه بكل المقاييس

ان اجلا او عاجلا ..

فخير خساره .. خسارة الدنيا ومكسب الاخره

لما رجعت وحكيت كل الكلام ده لماما فجه ع بالى ..

طيب افرض هو مكانش عمل التكه دى قبل الجواز فعلا

وكانت بقت ع عماها كده لحد مالقيته بعد شهر م الجواز

جبلها اصحابو الانتيم وعملوا عليها حفلة باربكيو

طب وده كان هيتعرف ازاى قبل مالطوبه تيجى ف المعطوبه

ما ممكن كان مثل عليهم انه متدين وفللى جدا ومبيفوتش فرض

وساعة الجد متلاقيش اللى يقولها امين

ياخرابى ياماما ..

ومتقلليش ياماما الحجات دى بتبان .. هتبان ازاى يعنى .. لو مكنش عمل تكه زى اخلعى الحجاب دى

ماما ردت رد منطقى جدا الصراحه ..

الحل الوحيد يااعبط عيالى (( اللى مفيش منهم غيرى اصلا ))

ان العروسه تفضل شايله معاها سلاح حاد .. زى اللى شايلينه ف العربيه علشان وانتى سايقه لوحدك

تمن تسع شهور كده لحد متتطمنله ..

ويكون خلفوا اول عيل .. صح ياماما

بس سيبك ياماما .. انعدم الامان ف الدنيا خلاص

انا مش هتجوز .. هفضل معاكم .. ع الاقل انتى وبابا

اللى اعرفهم احسن م اللى معرفهمش
ماما .. ياختى حجة البليد مسح الصبوره

شكرا حضرتك ياماما .. محدش بياكلها بالساهل

ربنا يهدينا جميعا .. ويعافينا مما ابتلى به غيرنا

21 comments:

عصفور المدينة said...

ابنتي الجدعة السلام عليكم

بصي بقى نتفق من دلوقت انا حابقى زائر عندك هنا دايما والناس اللي انا بازورهم مش بيزعلوا مني لما اوجه أو انتقد هيهه وافقتي ؟
طيب الحمد لله انا مبسوط جدا إنك وافقتي

طبعا رضا الزوج بتبرج زوجته معصية كبيرة ولكن ربطها في تدوينتك برضاه بالفاحشة وما شابه مش صح ومتسرع شوية

وطبعا مستغرب جدا ازاي يكتبوا الكتاب وتكون المسائل دي مش واضحة وانت بتقولي انهم ظاهرهم التدين فعل غريبة وفوبيا العنوسة يظهر بتأثر على الناس
ليه قلت إنه يا إما يكون الجواز كدة يا إما نقفل الباب
ربنا يرزقك بابن الحلال الصالح من فضله

المهم

دكتور حر said...

الله يسامحك يا ياسمين
والله كنت هتخليني أعيط من اللي حكيتيه

كان النبي يا دكتوره بيقول كل ليله
اللهم يا مقلب القلوب ثبت قلبي على دينك

وقالوا في الأثر
مستحيل أن تتنبأ لأحد بالثبات
والعكس صحيح تماما

وقال تعالى
إنك لا تهدي من أحببت ولكن الله يهدي من يشاء

مش عارف والله أقول ايه وأرد اقول ايه
غير ان ده بالتأكيد فتنه وموقف من عند ربنا
لكنه كله عبر

للأسف المسلمين مبقوش عنوان للإسلام خالص

لكن لما تشوفي كده

تحمدي ربنا
وتساليه الثبات
وتسأليه الزوج الصالح فعلا
وتعتزي بدينك وشخصيتك وقدراتك
وتربطي نفسك بالرسالة وليس بالأشخاص خالص

موفقه ان شاء الله
ودمت بكل خير

خمسة فضفضة said...

السلام عليكم ورحمة الله وبركاته

دي اول زياره ليا هنا مدونتك جميله اوي يا اجدع بنوته
خلاص ان شاء الله هاجي هنا علي طول وحطيتك كمان علي الريدرعلشان المتابعه
-----------
نخش بقي في المفيد
كنت داخله اقول كلام لقيت باشمهندس عصفور قايل شبهه
فعلا انت ايه اللي خلاكي تربطي بين انه طلب خلع الحجاب والحاجات التانيه
مش معني انه طلب كده يبقي هايعمل الحاجات التانيه دي

علي فكره البنت دي صعبت عليا جدا لانها مافكرتش في اخرتها وكل اللي فكرت فيه ازاي تهرب من شبح العنوسه لانها خلاص مقربه علي سن الخطر المزعوم اللي هو 30 سنه وللاسف باعت الغالي بالرخيص


ربنا يهديها ويهدينا ويلهمنا جميعا الصواب



سلام يا اجدع بنوته

Dr.Mohammed Gohary said...

وقلت ياترى القرد اللى هأنكج فيه هيبقى شكله عامل ازاى

هههههههههههههههه مبلاش قرد دي خلي الناس تتشجع


مادخلتى معهد الحكمه بتاعكم ده
ههههههههههههههه اي والله


فاتحه بؤى
سدي بسرعه دبانه تخش ولا حاجه

ابقى افرحى بيها لما تجيلك ملفوفه ف ملايه ف نصاص الليالى .
بطلو بقا حقد
وخلو الشعب يتحرق قصدي يعيش

ومحصلش حتى الحمار اللى بيحمى حمارته م الحمار اللى جنبه
لا والله تشبيه جميل تشبيه برسيمي فاجر


انا عايزه افهم دى هتأامن ع نفسها معاه ازاى دى ياجدعان

مثلا دا حاجه تغيظ


فخير خساره .. خسارة الدنيا ومكسب الاخره
الله علي الدرر


سلاح حاد .. زى اللى شايلينه ف العربيه علشان وانتى سايقه لوحدك
يامي ياميي دانا كنت ناوي اجيب بلطجيه يقلبوكي


ماما .. ياختى حجة البليد مسح الصبوره
ههههههههههههههههه صح


تحياتي علي الموضوع الجامد وسلم يارب سلم

وربنا يحفظك ويحفظنا

دمتي بسلام
وحلو النظام ده كل يوم بوست

تحياتي ويلا بقاااا ما اعطلكيش

Unknown said...

انا قلت كده محدش صدقنى
بيت ابويا ولا نار جوزى
بس والله يا سمسمه
الغلط مش على حد قد ما الغلط على الى قبلت كده على نفسها
الله يصلح الحال
خلى الكتاب ينفعك هههههههه شكل الدكتره دى جايبانا ورا
ربنا يارب يرزقك بالزوج الصالح الى يكون قرة عين لك
بس متنسينسش فى سندوتش البسطرمه وحتت الجاتوه

دكتور ماجيك said...

بجد حاجة تغيظ ان الانسان يبيع نفسه علشان الماديات بس انا مش هلقى باللوم عليها وانما قبل اى حاجة على ابوها واخوها اللى وافقوا العريس المزعوم انه يمشى بنتهم بالطريقة دى فى الشارع

الجوهرى حلل الموضوع بطريقتى فمش مهم التعليقات تكون على جمل معينة

إذا كنتى توصلت لحقيقة ان عدم الجواز افضل منه فى العالم ده يبقى اهنيكى انك توصلتى لواحدة من اكثر افكارى قربا لنفسى لو كنتى بتقوليها كده يبقى اتمنى انك ترتبطى بالانسان اللى يصونك ويعينك على طاعة ربنا

Soooo said...

موضوع جامد جامد جامد .. من هنا لبكره الصبح جامد

والاجمد انك اتكلمتي بمنتهى التلقائيه والبساطه والوضوح والصراحه وقلتي اللي على لساني وعلى لسان ناس كتير قوي

بس اللي مش قادر افهمه
لما هي محتشمه في لبسها من الاول خالص .. واحد زي ده اتقدملها ليه مادام هو مش عايز يتجوز واحده زي امه؟؟؟
وازاي يعني اهلها وهي نفسها ماقدروش يفهموه من اول قعده ولا قعدتين معاه ومع اهله لما جم يشوفوها وكده؟؟

وبعدين ده حلم اي شاب في الدنيا دلوقتي انه يلاقي بنت محترمه دينيا قبل اي حاجه ؟؟؟
ومعظم فشكلة الخطوبات والحوارات بتكون نتيجة لان العريس بيبقى عايز عروسته تلبس محتشم بعد ما اتخطبت او اتقرت فاتحتها .. مش العكس ؟؟؟

الحقيقه انا جوايا نار قايده من الموضوع ده والله
وعايز اشوف الاخ ده عشان اضربه جوزين اقلام على وشه يفوقوه واضربها بالجـ .. ولا بلاش

ربنا يهديهم ويهدينا جميعا يارب
وبعدين انتي قاعده بتعملي ايه دلوقتي .. قومي زاكري يلا


ملحوظه
انا بهزر معاكي لما بقولك قومي زاكري .. ارجو انك تتقبلي هزاري بصدر رحب


وكل سنه وانتي طيبه

سلامووووووووز

Ahmed Al-Sabbagh said...

هههههههههههههههههههههههه

بجد انا كل اما باجى هنا بندم على كل دقيقة قضيتها بعيد عن مدونتك

بجد والله


بجد بوستاتك الوحيدة اللى ممكن اقراها مرة واتنين وتلاتة

بجد اسلوبك خرافى مش ممكن

انا قريتة مرة

انا جيت بس احجز تامن مكان واقراه مرة كمان

هههه شوفتى الانزحة تامن مكان


كل سنة وانت طيبة يا اجدع بنوتة

تحياتى

اجري على الله said...

د/ اجدع بنوته
اولا دعيني اعلق على اسلوب كتابتك الجميل ورشاقتك الكتابيه العاليه
واعذريني على تقصيري في زيارة مدونتك لانشغالي الشديد وادعيلي ان ييسر الله امري

الحقيقه انا احييكي على الحماسه الشديده التي تتكلمي بيها وبالفعل حاجه تجيب الضغط
وأسأل الله ان يعيدها الى رشدها

ودعيني اذكرك في النهايه ان العبره ليست بالاشخاص
الاشخاص ممكن ان يسقطوا ولكن العبره بالايمان بالمبدء

تقبلي تحياتي
الشاعر بن هلال

د/اجدع بنوته said...

بابا عصفور ... انا لازم اوافق .. مفيش غير انى اوافق طبعا

وانا استجرى ااقول حاجه غير كده

ماهو رضى بكده ... يبقى احتمال كبير انه هيعمل كده بعد كده

ماهو مفيش حاجه غير كده

اصل كده مودى ع كده

يارب يرزقنا جميعا بالشريك الصالح اللى يتقى بنا فينا ونتقى ربنا فيهم

تحياتى يابابا

د/اجدع بنوته said...

دكتور محمد .. ربنا يسامحنا جميعا

اللهم يا مقلب القلوب ثبت قلبي على دينك

يارب اللهم امين .. يارب .. يارب

د/اجدع بنوته said...

خمسه فضفضه ف مدونتنا المتواضعه

يامرحبا يامرحبا

ربنا يخليكى يسعدنى جدااااااااااا كلامك ده

مش عارفه بس زى مقلتك لبابا عصفور

اصل كده هيودى ع كده .. مفيش غير كده يعنى

ربنا يهديها يارب ... وهى فعلا ع وشك ان احنا نرجعها لصوابها تانى

ربنا يقوينا ويقويها

وشكرا ليكى جدااااااا

د/اجدع بنوته said...

دكتور جوهرى اللى عايز يتشجع هيتشجع

مش مستنى وصف يعيقه يعنى

ولا هى فعلا حجة البليد مسح الصبوره

لووووووووووول

د/اجدع بنوته said...

طبعا يالماضه

ربنا يجعله عامر يارب .. بيت ابويا وابوكى وكل الابهات

هو احنا لينا غيرهم ...

لا مبحبش البسطرمه .....

وانا مش هأكل المعازيم حاجه مبحبهاش

سندوتش بورجر وحتة جاتوه

كده ماشى

د/اجدع بنوته said...

ابوها ميت الله يرحمه .. واخوها قدنا معتقدش انه هيقدر يبدى سلطه عليها

هى الناس كلها مبقتش عايزه تجوز كده ليه

ان شاء الله كلنا ربنا يرزقنا باللى يصونا واللى يعينا ع طاقعته يارب

ثانكس ياماجيك

د/اجدع بنوته said...

ربنا يخليك ياسووو .. ده م زوق حضرتك

ماهى الدنيا اتقلب دلوقت كله بقى عايز موززز ...

بزاكر اهو وطلعان عينى اهىء اهىء

وحضرتك طيب واحلى سلاموز

د/اجدع بنوته said...

ميرسى ياخالو احمد

ده م زوقك بس ياافندم

وحضرتك طيب

د/اجدع بنوته said...

والله ياشاعرنا

انا كمان مقصره ف حق كل المدونات اللى بحب زيارتها جدا

بس هنعمل ايه حكم قوى .. لازم نزاكر ولازم نمتحن ولازم ننجح ان شاء الله

اما عن العبره فانا فعلا مبقتش عارفه العبره بايه

تحياتى

Anonymous said...

موضوع جميل والأسلوب رائع

وللأسف النماذج دي بقت موجوده كتير في مجتمعنا

بس دول والعياذ بالله بيبقى مبادئهم ضعيفه جدا أو لمجرد المظهره والمنظره

مش مبادئ مقتنعين بيها

وبالتالي عند أول عقبه أو مبرر من وجهة نظرهم بيبدأوا يتخلوا عن مبادئهم

وربنا يحفظنا ويحفظكم

د/اجدع بنوته said...

يارب يحفظنا جميعا ياشادى

بس الحمدلله هى رجعت لدينها الحمدلله

امى بتقولى متفرحيش كده هى بس لقيت الدنيا برد فلمت نفسها ومع الصيف هههه هترجع تانى

قولت هى كده كده هتتجوز كمان شهر تكون غارت بعيد عننا وتلبس زى ماتلبس بقى

بس المهم متحرقش دمنا

شكرا ع الزياره ياشادى

weizoo said...

هههههههههههه
جامدخ جدا يابنوته
ربنا يصلح الاحوال
ومتخافيش مفيش جواز لبنات طب
واجمل حته ضحكتنى موت

وم ذوات الدم البارد ومحصلش حتى الحمار اللى بيحمى حمارته م الحمار اللى جنبه