Friday, November 30, 2007

ايه يابت الدلع ده كله .. صباحو مسخره ..


مساء الخيــر ...ها الجميع بخير ... اه .. اشته

.....البوست النهارده .. بوست لذيذ جدا



...تعالوا نتفرج ع المشهد ده الاول



... وبعدين نتكلم بس كل واحد يبعد عن التلفزيون يايجماعه نظركم حرام


.....مشهد 1...
ليل خارجى

..


بلوكنة ساره
انا مش بتاعة الكلام ده ... انا كنت طول عمرى جامده
ساره موبايلك بيرن ....حاضر ياماما
ساره :: الو عموووووور
عمرو :: سرسورتى ايه يابت فينك يامصيبه
ساره :: ال يعنى الواد بيتصل ولا بيسال ... ياله انت واتـى ...
عمرو :: المهموز ... ف خروجه النهارده ... هتبقى جامده كيك ... تدوسى معانا
ساره :: ادوس مدوسش ليه ... بس اوعى ايدك وفرامل اليد ... لوول
عمرو :: ماشى ياخفه .. هستناكى انا والواد ماهر ع اول الشارع ... ماهر معاه عربيته
ساره :: خلاص اشتات جداااا اهو نوفر جنيه المترو .. هع
عمرو :: يلا وقتك خلص
ساره :: سلامووون تيت تيت تيت تيت


انتهى المشهد ع خير ...



اطفى التلفزيون يابنى وركز معايا هنا


عموووور ....


سرسورتى ...

اوعى ايدك وفرامل اليد
...
ماهر معاه عربيته



....



صباح العسل والروقان ع كل الشباب الروشه .


..



احنا برده شباب روشه ميغركش يعنى النداره الكعب كبايه ده



ايه ده بقى ... هزار .. دلع ... الــخ


نسيت اقول ان عمرو وساره دول زمله ف جامعه عادى



يعنى لا هما مرتبطين ولا حاجه مثلا يعنى



بس الروشنه والتكبير ومعرفش ايه

...


معقول تخليكى كده ... تهزرى بالطريقه ده ..



تقبلى انك تخرجى مع زمله اولاد ليكى


اوك ياستى ومش بس تقبلى وكمان هتروحى بعربيتهم

...



والله كنتى روحى بالمترووو وانا كنت هدفعلك الجنيه


طيب تحبوا تشوفوا مشهد تانى
نهار خارجى ..
جامعه ... عند كافتريا تجاره
تدخل ماهيتاب ع الشله ...
هاى شباب .. امواااه نهى ... امواااه مى .... اموااااه اشرف
امواااه بتاعة نهى ومى كانت مباشرة من بؤ ماهيتاب لخد نهى ومى
اموااااه اشرف كانت غير مباشره من بؤ ماهيتاب ف الهواا ثم اكيد مفروض
انها هتستقر ع خد اشرف برده اومال هتروح فين هتضيع ف الجو يعنى
ماهو الاموااااااه لا تستفنى ولا تستحدث من عدم




طيب متيجوا نشوف مشهد تالت
... ادى احنا بنتفرج ورانا ايه
نهار داخلى ...
سكشن تشريح ..
. كلية الطب
سامر :: مها مها تعالى شوفى عنيين الجثه بتتحرك
مها :: ايــــــــه ياسامرتجرى مهااا جرررى ع تربيزة الجثه
وهوووب ينقض 5 ولاد معاهم ف السكشن طبعا م شلتها برده ويزقووها ع الجثه وهيييييييه
وتصقيف ولووول ومها تتوعد انها هتوريهم ...
سامر :: علشان تبقى تعملى فينا مقلب العصير تانى



اذن


...


عرفنا من المشهد التانى

...



ان ف تعديات واضحه جدا وموهاااااات واضحه وضوح الشمس



ومن المشهد التالت عرفنا ياحبايبى ان ف مقالب وحركات وكمان عرفنا ان التصرفات ده وصلت بتوع الطب



واللى بيطلق عليهم عادة لفظ حيتان الجامعه
...



طالب طب (( بالطو .. كتاب .. نداره .. دقن .. لبس مبهدل ))


اهم بقوا بيهزروا ويعملوا مقالب كمان



يعنى هزار مقالب دلع ضحك كلام باسلوب معدى خروجات م الاخر يعنى علاقه بلا حدود



انا مبقلش ان الكل كده لا طبعا

...

بس ده دلوقت الاغلب كده


. وتقلك ده انتيمى ويقلك ده انتيمتى صباحو صداقه مقطعها بعضها


مش هنقول


واحده واحده بعد المقالب والهزار والكلام والتلفونات اللى ف نص الليل ممكن يحصل ايه

بضايق اوى م اللى تكون بتتصرف بالطريقه ده ... وتقلك لا انا عارفه نفسى

ياستى ماشى بس ستيب باى ستيب هتبقى مش عارفه نفسك

مقلناش متتعرفوش ع اولاد ... بالعكس انا واحده م الناس اللى مشجعين علاقات الصداقه بين الجنسيين


لانها بتفيد جدا وبيكملوا بعض .. لكن بحدود



علاقة زماله وصداقه ف اطار معرفة الاسرتين ياحبذا

...بكل ادب واحترام تتناقشوا ف اى حاجه بس بالادب

احسن م الادب مفيش


ده تعليقى انا ع الظاهره ولا اخفيكم علما انى ببص للبنت والولد اللى بيتصرفوا التصرفات ده بقرف

بس الولد بقرف ااقل



لقى واحده معليه النفوخ ايه هيقول لا

ده حتى البطر ع النعمه كفر


لكن البنت اللى مفروض ادب واخلاق وحياء واللى واللى ...


جايه بتهزر وبتضحك وتدلع وتتمايع بالشكل ده
بعد كل الافلام اللى شفناها سوا النهارده



والكلام والرغى الكتير ده عايزه اسالكم سؤال واحد


ايه رايك ف الرينج تون بتاع ساره


ال انا مش بتاعة الكلام ده ال
ده انتى الكلام ده ذات نفسه ... ياسرسورته

...سلام كبير لعمرو ويارب تكون العربيه ولعت بيه هو وماهر وهما خارجين هههههههههه


رد وقول رايك ف الظاهره شايفها ازاى
تحترم البنت اللى بتشوفها تعمل كده او اللى هى اصلا بتعمل معاك انت كده

ردى وقولى رايك ف الظاهره شايفاها ازاى
تحترمى بنت وولد صداقتهم ماشيه بالصوره ده
ولا انتى شخصيا بتتصرفى كده
ولو بتعملى كده وبتتصرفى بالطريقه ده ...

ياريت تقليلى بتعملى كده ليه واوعى تقليلى انك عارفه نفسك


تحياتى جميعا


دمتم بالف خير

Thursday, November 29, 2007

تاج م جمعاوى باشاا



طبعا ف الاول كده احب اوجهلو تحيه كبيره واضح انه مناضل وليه رساله

ربنا يارب يزيدو ويقويه كمان وكمان

وم الكام بوست اللى قريتهم ف مدونته الجامده جدا واللى تودى ف داهيه جدا ههههه

وهى ف العنوان ده ع ايدك اليمين وانت خارج



بسم الله الرحمن الرحيم

هل تحرص بصدق علي تجديد النيه قبل الدخول علي النت؟؟؟
طبعا والحمدلله .. هى نيه يمكن يجدها البعض مستحيله بس ليه لا جايز ربنا يقوينى واحققها

ما رأيك في جريده الدستور؟؟؟
ف بعض الاحيان بحسهم مأفورينها واحيان اخرى بحسهم بياخدوا ابعاد تانيه لابداء الراى

مبحسش بالحياديه التامه عندهم

ما رأيك في شويه المدونات دي..(أنا إخوان..إبن أخ..حلم الحريه..مش حاسكت..جهاد المصري)؟؟

مشفتش ولا واحده فيهم الصراحه بس باذن الله هزورهم قريب

هل بعد قراءتك للإجابتين إللي فاتوا ..حسيت إن أنا أيه؟؟ولا تنسي الصدق.؟

انت ازاى هههه بما ان معرفش حضرتك مين بس واضح انك انت كمان صاحب رساله وربنا يستر علينا

هل تثق في جريده الدستور؟؟؟

الصراحه مبثقش ف حد كل جريده بقى ليها حسابات اخرى وتصفيات تحتيه
بجمع الخبر م كزا مكان وبسمع الرأى والرأى الاخر واشوف عقلى متقبل مين ومين

أنا بحبكو في الله..فهل تحبونني...ولا تنسوا الصدق؟؟

اكيد كلنا بشر وطالما مبنكرهكش يبقى برده مبنحبكش هههههههههههههه

هل تعمل في السياسه والعمل العام أكثر من الربانيات والروحانيات؟؟؟

لا اعمل ف السياسه بتاتا بس ليا ارائى طبعا .. عمل العام اه الربانيات اعتقد تقصد بيها الدعوه الى الله بالحسنه

يعنى لو اتاحتلى الفرصه انى اساعد حد ف المجال ده .. اللى ربنا بيقدرنى عليه بعملو

هل الدستور تحب الإخوان,,ولا بتستغلها؟؟

لست ادرى

اسم مدونتك؟

عالم حكايات حكايات

لماذا اخترته ..وماهي نيتك من وراء اختياره؟

لان حياتنا سلسله متواصله م الحكايات ونيتى انى اوضحك حكاياتى يمكن حد يستفيد منها بحاجه

واخد عنه ثواب .. وكمان عندى امل ف ان اغير حاجه ف سلوكياتنا ممكن مستقبلنا جايز

اهو ربنا يقدرنا

هل فكرت في إغلاق مدونتك؟ والسبب؟

الصراحه اه ف نفس اليوم اللى عملتو فيها هههههههه حسيت ان مش هيبقى ف وقت اكمل

بس باذن الله هيبقى فيه .. انا متفائله

صورتك في المدونة ورمزيتها ؟؟

صورتى الشخصيه مع اسمى ..

وبترمز لاول صفحه ف كتاب حكاياتى المفتوح

وبعدها بيجى بقيت الصفحات واللى ربنا يقدرنى واملاها

لماذا دخلت عالم التدوين من الاساس؟

انا مش جديده ع عالم الكتابه النتى كنت بكتب ف منتديات وغيرو

بس حسيت ان اللى عايزه اعملو م خلال موضوعاتى هيبقى ليه تاثير اكبر وسط المدونات

جمله قيلت لك فى وصف مدونتك؟

اول كومينت ف المدونه م احمد باشا الصباغ اكيد مش عمرى هنساه

التعليقات بالنسبه لك ,اهميتها؟

اكيد ليها اهميه بتطمنى انى ماشيه ف الطريق السليم وربنا هيقدرنى واوصل ف يوم م الايام

بس متهمنيش بقدر عدد الزيارات .. ان 10 يقرواا كلامى احسن م 2 يسيبوا كومينت

لان اكيد ال 10 دول ف منهم فهموا انا عايزه ايه

واكيد عددهم هيكون اكتر م ال 2 اللى سابوا كومينت

احلى بوست كتبته ...ضع اللينك , ثم اذكر لماذا؟

مع ان لسه مكتبتش بوستات كتير .. بس عامة ف كل موضوعات ف اى مكان بحبها كلها

لانها ف النهايه ليها هدف واحد .. فمن فين هتيجى الافضليه

حد قل أدبه فى التعليق إيه رد فعلك؟

او اعترض ع حاجه ف كلامى هنتناقش بأمر الله ويايقتنع ياقتنع انا

بس ف الغالب هقنعوه .. (( بلطجه ايون انا عارفه )) لكن لو مكنش نقد بناء وباسلوب احترمه

قطعا همسح الكومينت

أسوأ مدونة؟

لا لسه الصراحه بقول ياهادى اهو بس ماشاء الله كل المدونات اللى شوفتها لحد الان جامده جدا

ولا املك سوى ان ارفع القبعه لهم جميعا ع السواء

ومعتقدش ان ف مدونه هتبقى سئيه لان اكيد الناس دى كلها ليها هدف وبتكتب علشان حاجه

مش بتضيع وقت ع الفاضى

لكن اى مدونه هتمس بلدى او دينى .. قطعا هتبقى مدونه ف قمة السوء يارب مقابلش واحد منهم

علشان هتقوم حرب 2007 وستشهد البلاد معركه داميه

هيحصل ايه لإيميلك لما تموت ؟؟

كتير بفكر ف الموضوع ده بس مش الميل بس وهدومى ووريقاتى وكمبيوتر بتاعى

ا وكل ذكرى عملتها ف دنيتى اللهم احسن ختامنا جميعا

اديت الباسورد لحد قبل كده ؟

بكتب كل باسورداتى ف مفكرتى الشخصيه تحسبا لاى حاجه ..
اهو الواحد يبقى يلاقى ناس تعرف انو مات ويدعوله دعوه تنفعه

اسمك؟
ياسمين

المشهور بيه وسط اصحابك؟

سمسمه

شخصيتك نوعها إيه؟

بيقولوا يعنى الظريفه الجدعه .. ده الطاغى ع شخصيتى يعنى

هما اللى بيقولوا انا مليش دعوه

السفر بالنسبة لك؟

بحبو جداااااااااااااااااااااااااااااا

بكتشف عالم جديد بمتغيرات جديده بناس جديده بحياه جديده

م عاشقى السفر انا

وقت فراغك بتعمل فيه إيه؟

معنديش وقت فراغ لان يومى متوزع بين الكليه والمزاكره والنت

وانا مبعتبرش النت تقضية وقت فراغ لان بعمل م خلاله انشطه اساسيه ف حياتى

المود بتاعك؟

فرفش ع طول .. حتى لو قامت الدنيا وقعدت اووك بفكر وبعقلها

وكل حاجه بس دايما الموود المسيطر الفرفشه

الاكلة المفضلة؟

رقاق باللحمه المفرومه

الصفات اللي أخدتها من بابا؟

خفة الظل والروح الحلوه

الصفات التي أخدتها من ماما ؟

الرزانه والتفكير بهدوء وبعد النظر وضعف النظر برده هههه

اكتر ست حاجات بكرهها؟

الكدب .. النفاق .. النكد .. البخل ..

اعلانات ميلودى تتحدى الملل ...

الناس اللى بتاخد شخصيات غير شخصياتها وتحب ترسم بقى

اكتر ست حاجات بحبها؟

الصراحه .. الفرح والسعاده ..الناس تحب بعض ..النت ..دراستى ..الاتفال

الشغل بالنسبة لك؟

النفس اللى بتنفسو هو شغلى

اللى يعنى مجازا ممكن نسميه شغل لان هو لحد الان يخضع للتدريب الطبى فقط

رسالتى هى بيتى وشغلى .. وبما ان بيتى ده م سابع المستحيلات ههههههههه

لا اكيد ف امل باذن الله ان يكون ف بيت .. ههههه بس مش امل اوى برده لووووول

فالى الان الشغل هو رسالتى

الانترنت بالنسبه لك؟

وسيله للتعبير عن نفسى وارائى ..

والتنفيس (( حلوه التنفيس دى )) عن افكار محبوسه

اتعرف ع ناس جديد واكتسب خبراات

امرره لمين ؟

لكل اللى هيقراه زى ماقال الاخ جمعاوى والله مهكسفك ياشيخ

وف الاخر ميرسى جدا ياجمعاوى لانك اتحتلى المساحه دى م التعبير عن نفسى

كان معكم م فوق الكيبورد

سمسمه ابو العافيه

لقناة حكايات حكايات

ماما دى سوبر ماما خلت البالطو يلمع م جديد




مساء الخير عليكم ..معرفش ليه دايما بكتب بوستااتى بليل وبتبقى مساء الخير


الظاهر الالهام مبيجيش غير بليل .. وم هذا المنطق ابدأ موضوعى بتحيه كبيره لصديقتى العزيزه الهام


.. مع انى معرفش حد اسمو الهام بس اكيد هعرف ف يوم م الايام ..


ازيكم واخباركم ايه وهلما جرجر بوستى دلوقت حساس وحيوى وبيمس طبقات كتير م الشعب المصرى ...


اننا اليوم نتوجه اليك عزيزى المواطن


(( ياسمسمه ياجامدده ))


..م قلب الاحداث ..ان اان اااان تيشششششش .


.القناه الاولى ..


يطلع واد زى العسل بغمازتين


(( وهذا شرط اساسى ف الواد طبعا ))


يتحدث الطفل لفنلته مباشرة .. (( وخد بالك م النجطه دى ))ايه ماما تقدر .. الا تقدر


..تطلع واحده سبحان الله شتان بينها وبين الواد اللى كان عسل ده .. ايون هو ده ال ايه .. تحط الفنيله ف الجردل


.. ف المسحوق .. وهووووب تنور الفنيله وتبقى ماما دى سوبر مامااااااااااا .........................


القناه التانيه ..


تطلع ست ماشاء الله .. ست بجد يعنى مش كده وكده وعليها ملامح السمن البلدى


(( واخدلى بالك م النجطه ده برده ))


وتحس م الوهله الاولى انها عندها كل امراض السمنه والكوليستيرول والضغط والسكر والزيت والشاى


بقعه ع بالطو ابنى الدكتور (( بفتح الدال )) ميصحش وهوب اتحط البالطو ف الغساله الفولتوماتيكى


وبقى ناصع نصوع الشمس ف كبدة السماء


وبقى وراء كل رجل عظيم ست مبترضاش بااقل م نضافة اريال ........................


.القناه التالته ..


تطلع واحده ال ايه شعرها كان خفيف لدرجة انها كانت بتلبس الترحه قدام جوزها ف البيت


(( خدلى بالك م النجطه دى برده.. انا عارفه عمال تاخد بالك م الصبح بس خلاص هانت)

اعشاب سوبر اتفوووووو .. الشعر المناسب ف الدماغ المناسب


وهووب بقى شعر السنيوره قد كده ومبقتش تلبس ترحه قدام جوزها ومبقاش فيه ادنى مشكله ........................


.مش هكملكم بقية القنوات اكيد انتم حافظينها كويس ...


ايه ده بقى ...لدرجة دى وسائل النصب والاستخفاف بعقلية الناس


دى مبقتش دعايه واعلان دى بقت نصب واستهبال


واشى اعلانات عن حبوب بتخن واعشاب بترفع واحزمه بتشد و اربطه بترخى


وعمليات بتكبر وعمليات بتصغر وعمليات بتشفط ..


ناهيك .. جار ومجرور مرفوع بالكسره


عن الافكار اللى بتبث عبر هذه الاعلانات واللى تعتبر الغام موقوته بتتزرع ف دماغ كل حد فينا م غير مياخد بالوو


..الست بتلبس الترحه علشان شعرها بيقع وخفيف ولما بقى فل بقت فل


ومبقاش فيها حجاب يعنى ربط الحجاب بشكل الشعر بس ...


فان كان شعرك ثقيلا ويتميز بقدرات جيده سيدتى فلا داعى للحجاب


وربط الريف بالسيدات السمينات اللى لسه بيلبسوا جلابيه بسوسته تفصيل ..


وكأن الريف ف مستنقع اخر


ومش عايزه اقلك تنمية حب العزله والوحده ف الاتفال وبدل مكانوا يخلوه يكلم فنلتووو


كانوا خلوه يكلم صاحبوو مش م قلتهم يعنى ..


وع هذا الاساس ليبتون واللى ع فنجان منو نجح الاخ هو واحمد وعدوا المحيط وغيرها وغيرها وغيرها ...


مش عارفه انتو حاسيين بالموضوع ده ولا انا بس اللى عندى صراصير ف نفوخى وبكبر كل حاجه


ع كلا يلا علق معايا ع الليله ده م طقطق لسلااحف


بيدايقك الاعلانات وشغل النصب ده ؟؟ولا بتقول وانا مالى ؟؟


طالما مبشتريش ومبيتنصبش عليا ؟؟


ولو بتضايقك ..م ناحية ايه .. انها بتقطع عليك سلك افكارك ومتابعتك العظيمه للماتش ولا المزلزل


ولا فعلا بتفهم الافكار والتهميش اللى بيجى م وراها ؟؟


ولا اصلا بقى داققهم ع الباب .. وبتصدق الاعلانات دى اصلا اصلا ..


يعنى يلا قول كلمتك .. وع فكره الموضوع مش هايف


الموضوع باذنك يارب سنتين كمان وهيبقى التلفزيون 17 ساعه اعلانات و 7 ساعات ارسال


وشكرا ليك سواء رديت او مرديتش


سواء قريت او مقريتش


شكرا لمشاركتك ع كل حال ,,


دمتم بالف خير ,,,

خليــك رايق وانــت سايق




عمتم مساءا .. ويحك يارجل

كيف هو حال المجتمع التدوينى اليوم .. اهو بخير

اذن لتكن الحرب

بقالى كام يوم متغاظه جدا م الاحوال المروريه الشعبيه الزقازقويه
وف مثل هذا اليوم .. قررت انى اطلع كل اللى ف قلبى ليكم وانتو تحكموا بقى

لما اتعلمت السواقه تفضل والدى العزيز ناصحا

باتباع المبدأين الاتين

سمسمه يابنتى مش اى حد يحط رجلو ع التلات دواسات يبقى كده بقى سواق
السواقه ::فن وزوق واخلاق

عربيه ومسمار وربك هو الستار

خدى بالك م
التاكسيات :: اصل يابنتى التاكسى ده لو شاورلو زبون ف نص الشارع هيوقفلو وهوب هتلاقى نفسك لابسه فيه اكيد ..
السرفيسات :: السرفيس يابنتى ده افعى الطريق مبيحللوش المشى غير مره يمين مره شمال وهز ياوز
..
العربيات النص نقل والتريلات :: اصل دول مش عندهم حاجه يبكوا عليها ..
راكب نص طن حديد مش هامو اى حد ماشى ع الارض
..
اتوبيسات النقل العام :: اصل يابنتى الراجل بيبقى سايق الاتوبيس وعمال يلعن الحكومه
ويلعن كل اللى راكبين ملاكى ولما هيصدق يغرزك ف اى غرزه
..
التك تك :: لان ده يابنى شوية بلاستيك ع تلات عجلاات وفجأه تلاقيه ناططلك قدامك وهتلبسى يعنى هتلبسى
..
الناس اللى بتعدى :: اصل الناس دلوقت بقت بعدى م اى مكان وف اى وقت وتحت اى ظرو
..
يعنى علشان تسوق عزيزى المواطن يجب ان يكون لديك اربع عيون وتلات ودنات واستك
والصراحه انا م يوم مسقت لا شوفت زوق ولا فن ولا ادب ولا ايوتها اخلاق


خرجت م البيت النهارده وحطيت رجلى ف العربيه
وقلت ان اى حاجه هشوفها غلط ف الشارع هاجى اقلهالكم النهارده
واحد اتنين الكونتاكت فين .. وانطلقنا انطلقنا

الغلطه الاولى

مسكت الطريق السريع وعند اول مطب ولسه بنقول ياهادى .. الاقى واحد ربنا يبارك فيه واقف قدام المطب بمتر
يعنى الجاى واللى رايح لازم هيعدوا م نص المطب التانى وايه يعنى لما يقف الطريق والرايح يقف ف وش الجاى
وساعه لما يسلكوا الطريق تانى .. بس المهم ان ابن الباشا وقف ف المكان اللى هو عاوزه

الغلطه التانيه

ماشيه بقى والاقى واحده معديه م قدام اتويس .. اذ فجأة .. مش مثلا تستنى لما الاتوبيس يمشى وتعدى
او حتى تقف ع جنب تورينا انها هتعدى لا .. هى واحد اتنين لقيت ده قدامى اووك انا ماشيه هادى خالص لان ف منطقه سكنيه فل
بس مش اللى هو بينى وبين الاتوبيس متر وفجأه الاقى واحده قدامى .. لاتعليق طبعا انا معملتش حاجه الصراحه
هى اللى لحقت نفسها وجريت لان دى كده كده ياكنت اشيلها ياكنت اتقلب انا هههههههههه

الغلطه التالته

اللى يعرف الزجازيج يعنى عندنا كوبرى المحافظه الملف والمدخل دده بتاعو مساحه 3 متر بيكون يحتوى ع اربع عربيات ف الصف الواحد
ازاى دى بتحصل متسألنيش ربك اللى بيبارك .. المهم انا جنب الرصيف وبينى وبين اللى جنبى بتاع متر ونص بالظبط
وماشين تاتا تاتا لحد منخرج م عنق الزجاجه ده .. والاقى واحد محترم جدا ورايا كاسر عجلوو وجاى يتحشر ف المتر ونص
طب انت بأمانه يا متخلف ناوى تعمل ايه .. ماهو حاجه م الاتنين ياهتطلعنى فوق الرصيف
ياهتدخلنى جوا عربيتك ونلحم باذن الله ف بعض
طبعا لحقت نفسى واديتو كلكسات واشارات وطلعت ايدى قلتلو يرجع واول مالطريق مشى روحت طالعه
موسطنه المسافه اللى كانت موجوده ده بينى وبين اللى جنبى وخليت 30 سم الناحيه دى و30 ناحيه الرصيف وقلتلو تعالى انحشر براحتك بقى

الغلطه الرابعه

الاشاره بتقفل م هنا يامحترمين .. وتلاقى كل واحد فرحان بالكلكس بتاعو يدى كلكس .. طب يعنى بذكائك منك له
انت عارف ان الاشاره مقفوله .. الكلكس هيعملكم ايه غير انو هيدوش الناس اكتر ماهى مدوشه خلقه

الغلطه الخامسه
عندنا مقص مرورى عند كوبرى العبور يعنى طريق طولى وطريق عرض عاملين علامة زائد .. فل فل
الاشاره تقفل ع اللى بالعرض والطريق الطولى يشتغل والعربيات تمشى تلاقى الناس اللى بالعرض معديين
ههههههههههههههه يعنى الواحد ميفرحش اوى ان الاشاره هتفتح لان برده هيمشى يعدى ف الناس
الاشاره الطوليه تقفل والعربيات اللى بالعرض تمشى تلاقى الناسى تعدى بينهم برده
فانا تأكدت .. ان الاشاره دى الناس فاكره انها معموله للعربيات بس اخضر .. اخضر ع العربيات
احمد احمر ع العربيات .. لكن هما يعدوا وقت ماهما عايزين .. ماشى ياشعب

الغلطه الساته
فى صنيه ظريف كده ف شارع فلل الجامعه اللى اخرو مستشفى المبره
المفروض انا جايه م الحاره (أ) ده وعايزه الف الصنيه وادخل الشارع
والمحترم اللى قدامى جاى م الطريق قدامى ده دخل الطريق ازاى معرفش
وبدل ميلف الصنيه ياحضرات ويمشى ف حارتو المعاكسه
لا جاى واقف قدامى وعايز يمشى ف حارتى انا .. طيب عايز ايه يااخفيف ..
كلكسات وعايزنى ارجع ورا
وقفت طبعا مكانى ولا تعليق لحد مخليتو يلف الصنيه ويمشى ف المعاكس
وتخيلوا وبعد ملف الصنيه يقف قصادى يعمل بايدو كده .. يعنى يتكم الهم مليتوا البلد
هههههههههههههههههههههههههههههههههههههههههههههههه
والله انا الغلطانه انى منزلتلوش وعرفتوا ان ف حاجه اسمعها جاى ورايح الطريق مش معمول حارتين منظره يعنى
ويتك الهم انت واللى يتشددلك..
.
.
طبعا انا م بيتى للكليه بوصل ف نص ساعه

يعنى الخمس حجات دول حصلوا ف نص ساعه ... يعنى بمعدل غلطه كل 6 دقايق
..
مش ممكن لا ناس عارفه تسوق .. ولا ناس عارفه تعدى .. ولا عربيات عارفه تمشى

يعنى ثقافة المجتمع المروريه كله ف الارض ... بجد يعنى حرام

الناس دى محتاجه اللى يعرفها .. ان مفيش حاجه اسمها تقف بعد المطب بمتر
..
ولا حد يعدى م ضهر اتوبيس وهو مش كاشف الطريق
ولا عربيات الطريق كشفاه ..
ولا حد اسمو يمشى ف المعاكس ف نفس الحاره ..
طب يعنى انت المفتح والتخطيط هما العميا لما عملوا الطريق حارتين
..
وانتو ايه ظروفكم .. بتسوقوا بادب واخلاق واحترام

ولا بدراعكم بس علشان متعرفوش الصح م الغلط

ولا عارفين الصح م الغلط وبرده ماشين بدراعكم
يبقى ع الله السلامه وخساره والف خساره
ولا اشتريتوا دماغكم ومبتسقوش اصلا

بجد احنا محتاجين العقيد احمد عاصم .. بدل ميطلع قبل ماتش الاهلى والزمالك
ويقول طريق معرفش مين نقل ع المحور والقادم م فين يروح فين
محتاجينو ينظم دورات تعليميه بجد للناس ازاى تسوق وازاى تعدى

لان حال الشارع المرورى دلوقت لا بقى يعجب عدو ولا حبيب

وع فكره انا بقيت بفكر جديا انى احول ع دراعى انا كمان
لان كده مش هينفع الادب والاخلاق
اعصاب الواحد مش هتستحمل

وخليك رايق وانت سايق
وم قلبى بدعيلكم توصلوا بالسلامه

العقيد سمسمه عاصم ..

ادارة مكافحة الاختناق والشغب المرورى

Wednesday, November 28, 2007

** رسترو يادكتور **



مساء الخير يامعشر القوم ..

اين هو ابن ام سحلول لم اراه اون لاين اليوم
النهارده حصلى موقف لطيف جدا .. هو مش لطيف ع قد ماهو محرج

لا هو مش محرج قد ماهو بايخ .. لا بقى هو مش بايخ قد ماهو خنييق بصراحه

وزى معرفتكم قبل كده ان الصراحه ايييه .. طبعا راحه

وطبعا زى ماهو معروف عنى انى بدخل ف الموضوع ع طول م غير اى مقدمات

وانى عمليه ومش رغايه خالص خالص

اظن واضح طبعا يعنى

فانا مش هضيع وقتكم اكتر م كده وهندخل ف صلب الموضوع ..

لا بلاش الصلب ده ولع نااار .. خلينا ندخل ف رمل الموضوع ع طول

النهارده كنا ف الراوند .. والدكتور كالعاده بيعرضلنا حجات م اللاب بتاعو ع البروجيكتور

فالبروجيكتور فصل ف وسط العرض .. فانا وبكل تلقائيه وشفافيه واندماج عادى جدا

قلت جمله سيحاسبنى عليها الزمن
قلت

.

.

.


رسترو يادكتور

ويارتنى ماقلتها ياوختى

انا لقيتلك البنات بتضحك والولاد بتضحك والدكتور بيضحك وانا الوحيده اللى مبضحكش

طبعا حسيت بغباء شديد وكعادة المجتمع المصرى كلو انو بيحب يعمل زى مالناس بتعمل

ولانى فردايه م المجتمع ده وبعتز بيه جدا ... فقلت اعمل زى الناس

وضحكت ..

اتارى ايه بقى

اتارى كل اللى بيضحكوا دول بيضحكوا عليا

وانا ال ايه بضحك معاهم ههههههههه

وع فكره معرفتش المعلومه الرهيبه دى غير بعد مالكل خلص ضحك هههههههه

المهم بعد هستيرية ضحك اصابت جميع م بالغرفه بما فيهم انا شخصيا

فالبنات سكتت والولاد مستمرين ف الضحك

ده كلو وانا معرفش هو ف ايه اصلا اصلا يعنى

فالدكتور تفضل مشكورا وحب يتبرع وينتشلنى م بقعة الغباء اللى كنت فيها

ويحطنى ع ارض الواكع

فقال للولاد بتضحكوا ليه يادكاتره ....

شوفتوا النصببببببببببببببببب

ال يعنى مكنش بيضحك معاهم دلوقت

فولد من الاولاد ساهم هو الاخر ف انتشالى م بقعة الغباء

وقالو رسترو يادكتور

وده قالها م هنا ... والاقى كل اللى حواليا تانى ضحكوا بما فيهم الدكتور تانى

بس المرادى بقى انا مضحكتش

الصراحه وللوهله الاولى واول مسمعت كلام الولد زميلنا قلت اعمل فيها هبله

واضحك بس قلت لا مش هيبقوا مرتين الاولى غبيه وتايهه ف الزفه والتانيه هبله

كفايه واحده ,,,

المهم الفضول كان هياكلنى ف مكانى كده كمل يأكل الفورمالين الجثث باحواض المشرحه

ياعينى ع التشبيه ولا ارووع

خلصنا شرح وقمت بقى سالتهم حد حد كانوا بيضحكوا ليه

فوجئت ان نص اللى كانوا قاعدين لا يعرفوا اساسا معنى رستروا

طب دول ضحكوا ليه .. متعرفش

الحمدلله مطلعتش انا الوحيده اللى تايهه ف الزفه

والنص التانى شاف انى ازاى اقول كده للدكتور عادى

رستروا دى اقولها لابن عمى واحنا بنلعب دور ميديل اوف هونر

او اقولها لصاحبتى لما تفصل شحن منى وانا بكلمها

لكن اقولها للدكتور وبكل تلقائيه كده ازاى يعنى ..
فعلا لقيت معاهم حق والله

للدرجادى سيطرت عليا المصطلحات النتيه لدرجة انى بقيت بقولها بدون اى تفكير ف العواقب

فعلا توصلت انها سيطرت عليا .. ماهو لما الاقى نفسى بااقول لماما هطلع البالكونه برب واجى

واقول لصاحبتى ف التلفون يلا هلوج اوف انا بقى وهبقى اكلمك بكره

ولما اقول للدكتور ف قاعه علميه طبيه بحته رستروا

يبقى فعلا ف حاجه غلط ..

وياترى دى دليل ع ثوره تكنولوجيه هايله

ولا دليل ع استهلاك تكنولوجى ملوش اى هدف وغسيل مخ متخططلوا
وياعينى عليكى يالغتنا الجميله هتلاقيها م الروشنه ولا م النت
بس ياترى انا لوحدى اللى التكنولوجيا بدات ف التهامها فعليا

ولا انتو زىى

ولا بتضحكوا عليا دلوقت انتو كمان

ولا هترستروااااا

تحياتى

د/اجدع بنوته

Tuesday, November 27, 2007

the first day of clinical medicine




اول ليله ليا ف التدريب الطبى باعتبار انى لسه بيبى دكتور ومعرفش المشرط من سلاكة السنان بس ميمنعش برده انى كنت فاهمه شويه ف

الطب مكنتش جاهله يعنى المهم برده انا رايحه ع ان الحياه وردى والدنيا ربيع ومن حسن حظى الجامد ان اول ليله نزلتلى ف الجدول انها نبطشيه يعنى من 5 العصر ل 5 تانى يوم انا اتبسطت جامد وقلت زى الفل دى بليل ده مبيجيش حالات ع اد واحد جاله حساسيه ولا ارتفلعه الضغط ولا عيل زوغير وسخن وهتبقى فل يعنى اينعم اسمع ان السكن هناك زباله والجو كله ريحة ادويه وفورمالين بس عاتى محنا اتعودنا ع الحجات ده ف المشرحه بقى مبقتش تفرق وبعدين برده مهما كان ده مستشفى وصحه يعنى اكيد لازم هتبقى نضيفه يعنى ده صحه ياخوالنا مش لعبه

المهم امى بقى من الضهر وهى بتكويلى البالطو تقلش رايحه اعمل عمليه تيم ورك مع مجدى يعقوب وعملتلى سندوتشات ( ياامى سندوتشات ايه ربنا يهديكى .... ايوه عشان مش هتعرفى تاكلى حاجه هناك ))
المهم جت الساعه 4 ولبست وتانقت وبرفيم ولمعت الشوز وع سنجة خمستاشر يعنى وخدت البالطو وشنطة السندوتشات ههههههه وخرجت م الباب وانا اردد اغنية انا رايحه المستشفى اخدم وطنى
( من تاليفى الاغنيه ده ولا هو وائل كافورى احسن منى يعنى اهو رايح الجيش وانا رايح المدبح ((( سورى اصدى المستشفى )))

وصلت المستشفى ع 5 بالظبط دخلت ع الباب سلمت ع عمو الامن بصلى الراجل بصة واحد بيودع واحد بيشوفه لاول واخر مره قالى بكل طيبه وحنيه اتفضلى يابنتى
لدرجة انى من حنيته الدمعه كانت هتفر من عنيا

دخلت جوا متخيله بقى انى مفروض من ع الباب هقلع الشوز والبس الشوز البلاستيك بتاع المستشفيات بقى زى اى ار وجراييز اناتومى والحجات دى كده والبس جونتيات واتعقم والحوارات النار ده

من ع الباب

مشهد 1
صوت غريب جدا جدا جدا (( تبين فيما بعد انه صوت التكييف المركزى اللى بيطحن بقاله 20 سنه ومفيش كائن حى فكر يعمله صيانه مره )
ريحه بشعه بشعه(( تبين فيما بعد انها خليط من ريحة البينج مع ريحة فورمالين مع ريحة فنييك بتاع النضافه مع ريحة ريد بتاع الصراصير)
قطرات الدم متناثره ف كل مكان لا ومش قطرات يعنى نقط (( لا حاشا لله ده بطش هههه وممكن تلاقى اثار كعوب رجلين بالدم برده وللوهله الاولى افتكرت لعبة اكتب اسمك بالدم بتاعة النت هههه)

المهم قابلتنى واحده ف الاستقبال وقالتلى روحى سكن الدكاتره حطى شنطتك والبسى البالطو وتعالى وشدى حيلك الليل طويل

مااجمل ان كل الناس تدعيلك بالتوفيق كده بيريحك نفسيا حقيقى
روحت حطيت شنطى ولبست البالطو وانا بزرر البالطو هب لقيت وحش جسووور يهجم عليا
وروحت ناطه ف السما بحركه لولبيه والحمدلله اختفى قبل ماارقع بالصوت والم عليه امة لا اله الا الله
الوحش ده كان صوريصار ياجماعه (( بس للاسف محسوبتكم رئيئه جدا وبتخاف من الزرازير اوى )

قلت اللهم اجعله خير وعديها ع خير وروحت قافله الدولاب اللى فيه شنطىى ( لان اكيد مش من طموحاتى انى ارجع الاقى الصراصير مستعمره شنطتى ))

ونزلت وبدات الليله

الساعه 6 كده ووقفت ف الريسبشن ( الاستقبال يعنى )
وناس داخله وناس طالعه عاتى جدا وجت الساعه 10 بليل وبدا الجو يهدى والدكاتره تروح ومتبقاش ف المستشفى كلها غيرى انا وواحد زميلى نفس دفعتى برده بيدرب معايا ودكتور ودكتوره امتياز وكام ممرض ف السريع ع كام ممارس عام كده بس طبعا دول قاعدين ف السكن فوق
واحنا الغلبانين اللى تحت ف الاستقبال

قعدنا نرغى مع الدكاتره الامتياز ونسالهم الجو شكله ايه بعد مااتخرجوا وياترى فعلا كلية الطب ب 4 ع بتوعها اتحققولهم ولا لسه
4 ع ( عربيه..عياده...عزبه...عريس )
وحقيقى نتج من المناقشه ان احنا مصيرنا تين ( بالطاء يعنى )
وان الحياه مش بمبى خالص المهم ماعلينا

هووووووووووووووب تيت تيت اااااااااااه الحقونى ابويا بيموت

دخل علينا واحد ببجامه وست كبيره لابسه روب ومعاهم مسنديين كده حاج كبير بتاع 70 سنه والراجل مغمن عليه وبيتنفس بصعوبه جرينا طبعا ( مع اول اختبار حقيقى ليا )
انا قستله الضغط بسرعه وزميلى بيعد دقات قلبه
وزميلى يقلى اظن ده محتاج تنفس صناعى ولسه هيحط ايده ع صدره ههههههههههههههههههههههههههههههههههههه
وجه الدكتور (أ ) طبيب الامتياز اللى معانا قال هش انتو بتعملوا ايه هتموتوا الراجل المهم طبعا هشينا وسبنا الدكاتره اللى بجد يشتغلوا واحنا بنساعدهم بس
وبعد 5 دقايق كان الراجل توفاه الله طبعا انا اول مسمعت كلمة البقاء لله ده اقسم بالله انى عيطت اكتر مااهله عيطوا وزميلى تنح كده المهم بعد 20 دقيقه من استقرار الحال وانا طبعا بعيط قعدت الدكتوره (س ) طبيبة الامتياز التانيه تهدينى وتقولى عادى وياما هتشوفى من ده كتير وزميلى كل اللى معلق ف نفوخه ان احنا السبب واحنا اللى موتناه د(أ) بيبصلنا ويضحك ويقول بس انتو كتاكيت اوى دول بيفكرونى بنفسى اول مدخلت المشرحه ولسه مفوقناش م الصدمه الاولانيه واذا بي

واحد جاى ودراعه الشمال داخل فيه حديده كده وخارجه م الناحيه التانيه ( يععععععععععععععععععععععع اكيد كلكم قلتم كده دلوقت )
المهم وبينزف بقى ومنظر انا اول مشفته بحقيقى جريت ع الحمام وااااااع وغسلت وشى والحمدلله ( سامحونى قرفتكم بس زى مااحنا عارفين الصراحه ايييه راحه بقى هاهاها )
رجعت لقيتهم قاموا بالواجب ووده قسم العظام فوق وزميلى بس اللى واقف ف الاستقبال وقالى سمسمه انا مش هاجى تانى
ليه يابنى قالى ايه اللى ليه انتى مش شايفه اللى بيحصلنا ده
قلتله عادى اومال انت كنت فاكر نفسك جاى تلعب بولينج ف نادى الجزيره يعنى محنا ف مستشفى وده الطبيعى
ربع ساعه ونسمع صويت من ع بعد 12 متر
والحققنى يااحمد هموت يااحمد
ده كان كلام الست اللى بتولد لجوزها
احنا جرينا طبعا وجه جرى (أ) و (س) اللى وافقوا ان احنا نندهلهم من غير القاب
أ ::: سمسمه اعملى اختبار فصيلة دم بسرعه
انا ::: وده بيتعمل ازاى
أ ::: نعم يااختى زى معملتيه ف معمل الفسيولوجى السنادى
انا ::: ( ف نفسى ايه ده ده فاكر ان احنا كنا بنحضر سكاشن ده غلبان الظاهر كان منتظم ف الدراسه ) بس مقدرتش غير اقول حاضر
جريت جبت لنست ( زى ابره كده بنشك بيها الصباع وناخد نقطة دم ) وجبت الانتى جين وكل حاجه وشكيت الست وخدت النقطه وهوب طلعت الفصيله ( بى) وقلت يارب تطلع صح ده احنا هننقلها دم يعنى لا قدر الله لو طلعت اوت الست هتموت ف ساعتها

وكان ف نفس الوقت زميلى بيعلق للست محلول جلوكوز تحت اشراف (س)
وقلت ل (أ) الفصيله اللى طلعتها قالى روحى اتصلى بدكتور ...... (دكتور امراض نسا وولاده ) هتلاقى نمرته ف الاستقبال وبعد متتصلى اطلعى هاتى كيس دم م البنك ف الدور التالت
انا ::: ( هو بيعاملنى كده ليه مكان كويس معانا بلد بتاعة شهادات بصحيح ) حاضر يادكتر دقيقه

وجه الدكتور ووالست دخلت تولد واحنا وقفنا نتفرج لحد مجابت بيبى بنوته اموره اوى وانا بوستها ههههه وادتها لباباها اللى قال انه هيسميها فجر عشان جت ف وقت الفجر بالظبط

ونزلت انا وزميلى خدنا حجاتنا والسندوتشات بتاعة امى اللى مجاليش نفس افتحها حتى م اللى شوفته طول الليل وجرينا ع الباب وبصلنا عمو بتاع امن بصة واحد شاف ناس كان حاسس انه مش هيشوفهم تانى
وقلنا صباح الخير يادكاتره وقلناله ياصباح اللى بتولد

وبس كده ,,