طبعا ف الاول كده احب اوجهلو تحيه كبيره واضح انه مناضل وليه رساله
ربنا يارب يزيدو ويقويه كمان وكمان
وم الكام بوست اللى قريتهم ف مدونته الجامده جدا واللى تودى ف داهيه جدا ههههه
وهى ف العنوان ده ع ايدك اليمين وانت خارج
بسم الله الرحمن الرحيم
هل تحرص بصدق علي تجديد النيه قبل الدخول علي النت؟؟؟
طبعا والحمدلله .. هى نيه يمكن يجدها البعض مستحيله بس ليه لا جايز ربنا يقوينى واحققها
ما رأيك في جريده الدستور؟؟؟
ف بعض الاحيان بحسهم مأفورينها واحيان اخرى بحسهم بياخدوا ابعاد تانيه لابداء الراى
مبحسش بالحياديه التامه عندهم
ما رأيك في شويه المدونات دي..(أنا إخوان..إبن أخ..حلم الحريه..مش حاسكت..جهاد المصري)؟؟
مشفتش ولا واحده فيهم الصراحه بس باذن الله هزورهم قريب
هل بعد قراءتك للإجابتين إللي فاتوا ..حسيت إن أنا أيه؟؟ولا تنسي الصدق.؟
انت ازاى هههه بما ان معرفش حضرتك مين بس واضح انك انت كمان صاحب رساله وربنا يستر علينا
هل تثق في جريده الدستور؟؟؟
الصراحه مبثقش ف حد كل جريده بقى ليها حسابات اخرى وتصفيات تحتيه
بجمع الخبر م كزا مكان وبسمع الرأى والرأى الاخر واشوف عقلى متقبل مين ومين
أنا بحبكو في الله..فهل تحبونني...ولا تنسوا الصدق؟؟
اكيد كلنا بشر وطالما مبنكرهكش يبقى برده مبنحبكش هههههههههههههه
هل تعمل في السياسه والعمل العام أكثر من الربانيات والروحانيات؟؟؟
لا اعمل ف السياسه بتاتا بس ليا ارائى طبعا .. عمل العام اه الربانيات اعتقد تقصد بيها الدعوه الى الله بالحسنه
يعنى لو اتاحتلى الفرصه انى اساعد حد ف المجال ده .. اللى ربنا بيقدرنى عليه بعملو
هل الدستور تحب الإخوان,,ولا بتستغلها؟؟
لست ادرى
اسم مدونتك؟
عالم حكايات حكايات
لماذا اخترته ..وماهي نيتك من وراء اختياره؟
لان حياتنا سلسله متواصله م الحكايات ونيتى انى اوضحك حكاياتى يمكن حد يستفيد منها بحاجه
واخد عنه ثواب .. وكمان عندى امل ف ان اغير حاجه ف سلوكياتنا ممكن مستقبلنا جايز
اهو ربنا يقدرنا
هل فكرت في إغلاق مدونتك؟ والسبب؟
الصراحه اه ف نفس اليوم اللى عملتو فيها هههههههه حسيت ان مش هيبقى ف وقت اكمل
بس باذن الله هيبقى فيه .. انا متفائله
صورتك في المدونة ورمزيتها ؟؟
صورتى الشخصيه مع اسمى ..
وبترمز لاول صفحه ف كتاب حكاياتى المفتوح
وبعدها بيجى بقيت الصفحات واللى ربنا يقدرنى واملاها
لماذا دخلت عالم التدوين من الاساس؟
انا مش جديده ع عالم الكتابه النتى كنت بكتب ف منتديات وغيرو
بس حسيت ان اللى عايزه اعملو م خلال موضوعاتى هيبقى ليه تاثير اكبر وسط المدونات
جمله قيلت لك فى وصف مدونتك؟
اول كومينت ف المدونه م احمد باشا الصباغ اكيد مش عمرى هنساه
التعليقات بالنسبه لك ,اهميتها؟
اكيد ليها اهميه بتطمنى انى ماشيه ف الطريق السليم وربنا هيقدرنى واوصل ف يوم م الايام
بس متهمنيش بقدر عدد الزيارات .. ان 10 يقرواا كلامى احسن م 2 يسيبوا كومينت
لان اكيد ال 10 دول ف منهم فهموا انا عايزه ايه
واكيد عددهم هيكون اكتر م ال 2 اللى سابوا كومينت
احلى بوست كتبته ...ضع اللينك , ثم اذكر لماذا؟
مع ان لسه مكتبتش بوستات كتير .. بس عامة ف كل موضوعات ف اى مكان بحبها كلها
لانها ف النهايه ليها هدف واحد .. فمن فين هتيجى الافضليه
حد قل أدبه فى التعليق إيه رد فعلك؟
او اعترض ع حاجه ف كلامى هنتناقش بأمر الله ويايقتنع ياقتنع انا
بس ف الغالب هقنعوه .. (( بلطجه ايون انا عارفه )) لكن لو مكنش نقد بناء وباسلوب احترمه
قطعا همسح الكومينت
أسوأ مدونة؟
لا لسه الصراحه بقول ياهادى اهو بس ماشاء الله كل المدونات اللى شوفتها لحد الان جامده جدا
ولا املك سوى ان ارفع القبعه لهم جميعا ع السواء
ومعتقدش ان ف مدونه هتبقى سئيه لان اكيد الناس دى كلها ليها هدف وبتكتب علشان حاجه
مش بتضيع وقت ع الفاضى
لكن اى مدونه هتمس بلدى او دينى .. قطعا هتبقى مدونه ف قمة السوء يارب مقابلش واحد منهم
علشان هتقوم حرب 2007 وستشهد البلاد معركه داميه
هيحصل ايه لإيميلك لما تموت ؟؟
كتير بفكر ف الموضوع ده بس مش الميل بس وهدومى ووريقاتى وكمبيوتر بتاعى
ا وكل ذكرى عملتها ف دنيتى اللهم احسن ختامنا جميعا
اديت الباسورد لحد قبل كده ؟
بكتب كل باسورداتى ف مفكرتى الشخصيه تحسبا لاى حاجه ..
اهو الواحد يبقى يلاقى ناس تعرف انو مات ويدعوله دعوه تنفعه
اسمك؟
ياسمين
المشهور بيه وسط اصحابك؟
سمسمه
شخصيتك نوعها إيه؟
بيقولوا يعنى الظريفه الجدعه .. ده الطاغى ع شخصيتى يعنى
هما اللى بيقولوا انا مليش دعوه
السفر بالنسبة لك؟
بحبو جداااااااااااااااااااااااااااااا
بكتشف عالم جديد بمتغيرات جديده بناس جديده بحياه جديده
م عاشقى السفر انا
وقت فراغك بتعمل فيه إيه؟
معنديش وقت فراغ لان يومى متوزع بين الكليه والمزاكره والنت
وانا مبعتبرش النت تقضية وقت فراغ لان بعمل م خلاله انشطه اساسيه ف حياتى
المود بتاعك؟
فرفش ع طول .. حتى لو قامت الدنيا وقعدت اووك بفكر وبعقلها
وكل حاجه بس دايما الموود المسيطر الفرفشه
الاكلة المفضلة؟
رقاق باللحمه المفرومه
الصفات اللي أخدتها من بابا؟
خفة الظل والروح الحلوه
الصفات التي أخدتها من ماما ؟
الرزانه والتفكير بهدوء وبعد النظر وضعف النظر برده هههه
اكتر ست حاجات بكرهها؟
الكدب .. النفاق .. النكد .. البخل ..
اعلانات ميلودى تتحدى الملل ...
الناس اللى بتاخد شخصيات غير شخصياتها وتحب ترسم بقى
اكتر ست حاجات بحبها؟
الصراحه .. الفرح والسعاده ..الناس تحب بعض ..النت ..دراستى ..الاتفال
الشغل بالنسبة لك؟
النفس اللى بتنفسو هو شغلى
اللى يعنى مجازا ممكن نسميه شغل لان هو لحد الان يخضع للتدريب الطبى فقط
رسالتى هى بيتى وشغلى .. وبما ان بيتى ده م سابع المستحيلات ههههههههه
لا اكيد ف امل باذن الله ان يكون ف بيت .. ههههه بس مش امل اوى برده لووووول
فالى الان الشغل هو رسالتى
الانترنت بالنسبه لك؟
وسيله للتعبير عن نفسى وارائى ..
والتنفيس (( حلوه التنفيس دى )) عن افكار محبوسه
اتعرف ع ناس جديد واكتسب خبراات
امرره لمين ؟
لكل اللى هيقراه زى ماقال الاخ جمعاوى والله مهكسفك ياشيخ
وف الاخر ميرسى جدا ياجمعاوى لانك اتحتلى المساحه دى م التعبير عن نفسى
كان معكم م فوق الكيبورد
سمسمه ابو العافيه
لقناة حكايات حكايات
10 comments:
سلام عليكم
انا اولا بحييكي على تدوينات الجميله بجد طريقة كتابة المدونات حلوه جدا
تاج جميل واجابات جميله
اتمنى ان نتواصل دائما
اتمنى ان تزوري مدونتي المتواضعه
الشاعر بن هلال
تحياتي لكي يا د ياسمين
أشكرك بداية على زيارتك لموضوعاتي
ويا ريت تنورينا كده على طول
بالنسبه للتاج
حقيقةأنا اتخنقت من أول شوية أسئله بس من الأسئله نفسها طبعا مش من الإجابه
أول بصره معايا في التاج هي حبك للرقاق باللحمه المفرومه
وتاني بصره في الحتة دي
الناس اللى بتاخد شخصيات غير شخصياتها وتحب ترسم بقى
ربنا يكرمك على نواياك الجميله ويقدرك على الخير يارب
ودمت بخير
بالنسبه لأحد تعليقاتي عندي في تاج لو
المفروض لو حضرتك في طب بشري تكون عارفه نقطة هامة جدا ومؤثره جدا
في علاج المرضى
وفي كشف حقيقة المرض
وهي البعد النفسي
يا دكتوره أكتر من 50% من العلاج ونفسي
وكذلك نسبة العامل النفسي في تدهور المرض أو سوءه
ده حتى الناس العامه بيقولو عليه تعب من الوهم
انا كان في ناس بتجاوب التاج ده زي رأي حضرتك كده ساعات كنت بعديها
انما متطلعش من دكتوره
ولا ايه؟
وتقبلي تحياتي
حقيقى أسلوب حضرتك أكثر من رائع يا د /ياسمين وبحسدك على غيرتك على دينك ووطنك وعلى باباكى ومامتك وطبعا بتفق معاكى على موضوع الرقاق باللحمه المفرومه بس أحب أقولك ركزى بردو على المكرونه بالبشاميل حتلاقيها كويسه أوى.... وطبعا كلنا نتمنى ان نجد مانتمناه فى عملنا بعد الدراسه الممله والتعب اللى احنا بنشوفه فيها ان تكون اخرتنا كويسه ونلاقى الى يقدرنا فى البلد دى وربنا يكرمنا ويجعل حكومتنا أكثر الكترونيا علشان تاخد بالها مننا ونعرف نفتح بيت
شكرا جدا يا ابن هلال وماشاء الله انا قريتلك كام مقطوعه شعريه هايلين وكلماتك ولا اروع شرفت مدونتى
دكتور حر الحمدلله ان الخنقه كانت م الاسئله مش م الاجابات والا كنت دلت التاج كلو فوراا .. انت بس تأمر وشكل الناس كلها بتحب الرقاق باللحمه المفرومه
انما متطلعش من دكتوره
ولا ايه؟
اهى طلعت اهى واللى كان كان ههه
بس انا الصراحه م المدرسه المفضله لاطلاع المرضى ع طبيعة مرضهم خطوه بخطوه وانا مقلتش انك تقولوا ياحاج روح بيتكم انت حاله ميئوس منها لا بس برده مخلهوش يعيش الحلم حقيقه يعنى نعرفو حقيقة مرضى مع رفع معنويات بصوره اخرى يعنى
معرفش بس يمكن لما ادخل بركتيس للمديسن فعلا
اغير راىى وابقى تبع مدرسة حضرتك
شكرا
ميرسى ياشيتوس ربنا يخليك طبعا برده بحب المكرونه ده اكيد يعنى
نفتح بيت
انا اشك ف دى
حاسه انى اخرنا نفتح كانز كولا علبة تونه
يلا مفيش حاجه بعيده عن ربنا
تحياتى دكتور شيتوس
انتوا بتجيبوا التاجات دى منين
وليه محدش معبرنى بتاج
انا كمان عايزة انفس عن نفسى فى حتة تاج يتبعتلى
عااااااااااااااا
انا عايزة تااااااااج
اجاباتك حلوة يا بنوتة
على فكرة انا النهاردة كنت عاملة رقاق باللحمة المفرومة يستاهل بقك
سلام اختك خيخة
منا قلت اهو التاج ده هابصيه لكل اللى يقرااه
يلا نفسى براحتك .. جو اهيد
وبالهنا والشفا الرقاق للى اكله
Post a Comment