Sunday, April 27, 2008

طاقية خيخه وتاج زى الهوا هوايا


طاقية خيخه الخفيه ..

مين اللى هتضربه على وشه بالقلم من غير ما يشوفك

المقنعين (( مرتدى الماسكات ))

المتوحد برايه (( اللى مبيحترمش راى غيره ))

اذن هضرب نص الشعب بالقلم .. هع

مين اللى هتديله بوسة فى جبينه

بابا وماما .. وكل اللى بحبهم

اذن هبوس نص الشعب التانى .. هع

مين اللى هتدخل بيته وتعرف هو عايش ازاى

العميد ورئيس الجامعه هههههههههههههههههه

لا مش هدخل بيت اى حد طبعا

ولو سرقت هتسرق ايه

هسرق جمل طبعا

هتسرق بنك ولا محل دهب

البنك المركزى ولو انه ع وش فلس ..

وهتعمل ايه بالحاجات اللى هتسرقها

هشترى جلاكسى .. واروح احط لكل مواطن 50 جنيه يوميا ف جيبه

ومين اللى هتدخل بيته وتحطله فلوس فى الدولاب

مقلت مش هدخل بيت حد انا .. هحطلهم ف جيوبهم برا البيت

ومين الست اللى هتبص عليها وهى بتستحمى

كوندليزا رايس لووووووووووووووول


ومين البنى ادم اللى تبقى عايز تشنكله فى الشارع وهو ماشى

الواد سحلب ابن الجيران .. اصله واد قرداتتتى ومطلع عين اهله

واى بت لابسه بدى واى واد لابس لوو ويست ..

او تضربه على قفاه نوع من انواع الذل علشان متغاظ منه


اى حد ف الدفعه بيتسربله الامتحان .. ااااااااااااااااااااااااااه

وايه هى الاماكن اللى هتدخلها وماكنش ينفع تدخلها ابدا لما كنت مرئى

مشيخة الازهر ( لجنة الفتاوى )) ... امن الدوله

المعتقلات والسجون ... وهعسكر ع تلفون بوش المحمول

كونترول الكليه ...

ومين الانسان اللى هتحضنه وهو مش عارف مين اللى بيحضنه

لا لا .. ياكزوووووووووفى .. هحضن اى عيل زوغير اشوفه وابوسه ف دماغه
.....................
................

وده تاج سموحا .. حبيبة قلبى زى الهوااا
وم العزيز المتغرب .. ف حب مصر

اولا اذكر عشرة اشياء عن نفسك ...

بنوته مسلمه عربيه مصريه شرقاويه ..

بحب ماما وبابا وطنط وعمو وخالتو ف اسكندريه
اتميز بالنقاء الشديد والشفافيه وروحى حلوه ..
المحصله بريئه يعنى .. ياكزووفى

بشوشه جدا والضحكه مبتفارقش وشى
وبحب اعمل مقالب ف قرايبى وصحابى اوى

طموحه جدا .. ولا اتنازل عن القمه دائما

عاشقه للكوشرى وعصير القصب والمانجه والجلاكسى

جدعه .. وضميرى دايما صاحى حتى لو ع نفسى
وعندى سلام نفسى وبحب الخير للجميع

بحب اعرف عن كل حاجه حاجه كهربا ميكانيكا سيارات ..
مناخيرى طويله يعنى

هاديه جدا .. ومبتعصبش ورأكشناتى لا يمكن التنبوء بيها

اقدس الحياه واتقن فن الاستمتاع بكل لحظه فيها

ثانيا اختار خمس اشخاص تهديلهم التاج ..


ليه الغلاسه دى بقى 5 بس .. الود ودى احط 50

ع العموم السمك .. لسه بيعموم

منيو الخمسه لسه بخمس( هذا اعلان مدفوع الاجر لوول )
والامر لله م قبل وم بعد

هما اكتر 5 لسه برسملهم ملامح لشخصيتهم

فاكيد هيفيدنى اجابات التاج طبعا

العزيزه دوبا
العزيزه شاهى
العزيزه مش قادره
العزيز دكتور بهدوء
العزيزة عاشقة النقاب

رابعا عرف اللى بعتلك التاج انك نزلته ..

بت ياموحااااااااااااااااااااااااااا .. انا نزلت التاج اهو وجاوبت عنه

واللى مسمعش يسمع واللى معرفش يعرف

وتحت بيت ام فاروق .. هااااى هاااااى
وكل اسبوع وانتو مأجزين ومرتاحين
وبعيد شم النسيم وتحرير سينا والعمال محتفلين
وم الاضراب .. لورا الشمس .. رايحين رايحين


Wednesday, April 23, 2008

خايفه تجوز .. يقتلها .. اه والله

لو ليا حق .. هنروح انا وانت م بعضننا فين .. للمتزوجين فقط


بوست جديد .. مطرقع جدااا


لا حول ولاقوة الا بالله ...

منكرش انى اتصدمت م كلامها ..

وان كل جمله كانت بتقولها زى 30 قلم ف بعض

خايفه اتجوز ... يقتلنى ....

هى بنت تتسم بملامح هاديه وطبيعه حالمه

عروسه ع وش جواز .. مع ايقاف التنفيذ .. برغبتها الشخصيه

ظروف ايه اللى عاشت فيها خلتها تبقى كده ..

مصايب ايه شافتها خلتها تبقى كده ...

لا الصراحه هى شافت كتير ..

لو كان ابوها يتصور .. انه ف اليوم اللى زق مامتها فخبطت ف الحيط

واتفحت راسها ... و وقعت نزفت ع رجل بنت عندها ست سنين ..

هو نفس المشهد اللى هيكتب نهاية مسلسل لسه مابتداش

تحت تتر .. خايفه اتجوز .. يقتلنى

... دى بنت خايفه تتجوز .. لتصحى ف يوم .. تلاقى جوزها معلقها

ف النجفه وهيولع فيها مثلا .. او يدبحها

.. ربنا يشفيها ويهديها ..

ويارب كل اب وام ياخدوا بالهم م اى حاجه بيعملوها قدام اولادهم

دى بنت كل ذنبها .. انها حضرت ع استحياء وهى 6 سنين خناقه بين

ابوها وامها واحتدمت المناقشه .. .. وبس خلاص

مشهد مدته 10 دقايق .. دكاتره نفسيين وشيووخ وناس ع قد ماتتخيل

مش عارفيين يشلووه م مخها .. وازاى يشلوه وهو بقى محور حياتها اصلا

لكل اب وام ..

متقلش ان ابنك ده عيل ايه يعنى ميشوفك بتهيين امه

او بنتك دى عيله ايه يعنى متشوفك بتفتشى ف جيب ابوها

حرام عليكمممممممممم ...

انك تبقى اب او تبقى ام .. مش انكم تخلفوا عيال وبس

انكم تربوا عيال صح ...

Sunday, April 20, 2008

كى تكون انسان ..هارش اللى قدامك كويس


عزيزى العميل .. انت ع دماغنا م فوق
..
طول مافاتحلنا دماغك وسايبنا نغرف منه براحتنا
..
عزيزى العميل .. كى تكون انسان .. هارش اللى قدامك كويس
..
يتطلب منك بعض المواهب تكون سمييع كويس .. تكون ذكى والمعى .. وقبل كده
..
تكون عميل ف مدونتى العزيزه
..
م مذكرتى الشخصيه اتحدث اوراق سريه
..
الوثيقه رقم 112 لسنة 2012 .. باعتبار ما سيكون .. لووولات
..
كى تكون انسان يخطف العقل م اول لحظه .. لا بد ان تدخل بها
..
اصدى فيها .. تعشش ف مخ اللى بتكلمه تخترقه
..
لكل منا ثغراته م اهتمامات مختلفه .. وانشطه اكثر اختلافا
..
اللى بيشجع الاهلى واللى بيحب هيفا .. والليبرالى
..
ولكن لنا جميعا .. ثغره افتتاحيه
..
ان تتحدث بلسانه
..!!
ما أروع ان تكون افتتاحية حديثك مع اخو زميلتك الرخم الزوغير
..
.عن ازيك .. ياحبيبى .. ياختى سكر
..
وف مثل هذه الظروف حتما هيفقعك الواد كلمه يخلي منظرك شراب مبلول
..
او افتتاحية حديثك .. مع جد خطيبتك ف اول مره تقابله فيها
..
والتى حتما هى الاخرى ستنتهى بلفحك خبطه م العكاز ع منتصف سن نملة الدبان
..
ف منتصف الهدف مباشرة
..
اولا ..

دى دى .. دى دى وااا .. اعلم جيدا ان الانطباع الاول ان لم يكن سيدوم

سيشكل الانطباع الثانى بنسبة
90% ..
احرص ع ان يكون محادثتك الاولى .. مميزه ..

ان تقدم برزنتيشن .. شخصى .. مبهر ..

ان تتحدث بلسانه ..

1- حدد مدخل اللى قدامك

ان كان شخص مسن .. فما اروعك تفاتحه عن خير زمان ودنيا زمان الحلوه

ان كانت سيده .. فما اروعك تحدثها عن اسعار خضروات وفاكهه سوق العبور اليوم

وان كان شاب روش .. فابدع واصفا عمرودياب وماتش الاهلى الاخرانى

ان وجدت انطباعاته .. الى حدا ما تشبهه ضفدعه ع وشك الولاده

فورا .. تشتم ف ابو الاهلى .. واهلا اهلا بالزمالك

وان كان طفلا .. حبيب هارتى .. اديله سبيس توون وتيمون وبومبا

2- تجنب احتدام المناقشه ف اى موضوع ..

يعنى محبكتش تقلبوها ندوه سياسيه حامية الوطيس

هل جمال عبد الناصر كان افضل .. ام السادات ؟؟

3- امنحه بعض التعليقات الجيده ..

راي حضرتك ف الموضوع ده والله مميز فعلا

جزمة حضرتك بتدل ع رجوله طاغيه


4- احرص ان تكون دماغك مسستمه .. صح

اى تمتلك سستم خاص .. زى ماريو كده ..

تمرره بعدة اختبارات .. تستنتج منها ما تريد

5- انتبه جيدا لكل انطباع وكل كلمه

هل هو شخص ينصت للاخرين ..

شخص بتاع قول اللى عندك ولخص مش فاضى

وغيرها م الانطباعات


6- حدد بير السلم بتاع اللى قدامك

بعد مدخلت م المدخل وجذبت انتباه .. نور بقى بير السلم

واكشف ع العدادات .. تطرق بيه ف كزا موضوع

لفلف بيه م سياسه لثقافه لتعليمى وهكذا

مجرد موضوعات بسيطه

يعنى شجرة الدر ضربوها بالقباقيب ....... تاريخ

هند رستم مثلت الدور ده كويس اوى ...... فن واعلام

بس كانت فيه اسقاطات سياسيه متمثلتش صح ... واديها سياسه


7- اياااااك واييييياك ان يشعر م اامامك انه ف جلسة ممتحنين محو الاميه

او ف اختبار كيف تسعدين صديقتك ...

يادوب تكاااات كده .. مش تعالى هنا ياعم .. قولى فيما لايزيد عن 15 ساعه

عن دور كليوبترا ف سقوط الدوله القسطنطينيه .. لوووووووووووول


8- اياك ان يخلو وجهك م ابتسامه م القلب ..

حتى لو رايح تعزى .. ادخل عليهم ..بس بابتسامه مكسوره شويه

9- اجعله متيقنا ومتأكدا وواثقا بانك منتبه لكل حرف جر بيقوله

حتى لو انت سرحان ف ملكوت اخر ...

10- اديله برستيجه ..

حتى لو شخص ااقل منك علميا او سنا او غيره

مااروع انك تديله برستيجه .. علشان ميدلكش ف وشك

وابدع انت بقى ..

وجمع نتايجك يامعلم ..

وكون فكره وافيه كافيه عن اللى قدامك م مقابله واحده

معا .. كى تكون هارش اللى قدامك كويس

د/اجدع بنوته .. بنغطى اكتر م 90% م سكان مصر
احسن ناس
.............................................
تحديث ** البوست مش هدفه انك تنافق حد
..
او تتصنع علشان الناس يحبوك ..
..
لا اطلاقا .. انك تفهم اللى قدامك كويس
..
وتجذبه لشخصيتك م اول مقابله بينكم
..
بس ...
..
وبعد متبقوا اصحاب ابقى عرفه انك بتشجع الاهلى
..
واضربه ع دماغه كمان لو تحب هههههه
..
بس المهم اول مره .. والانطباع الاول

Tuesday, April 15, 2008

ولاد التيت .. مخلوش لولاد التيت .. حاجه


امى .. اريد ثمرة جوافه
لتذهب الى الجحيم .. بنى
انطلاقا م نقطة ان احنا كلنا ولاد ناس

اومال هنكون طالعين شيطانى يعنى

انت مش ابنى يامنعم .. انت لئيط

مش وقته ياابو منعم انت .. هات بس مفتاح الاوبترا


انا اللى هسوق الاوبترا يامنىىىىىىىىىى

انت بتحلم ياحلمى .. نياهاهاها

بعيدا عن منى وحلمى ومنعم

وقطعا الاوبتراااااااااا

بيجو .. 307 .. للرفاهييه عنوان اخر

ولاد الحلال مخلوش لولاد الحلال حاجه ..


متتتنحليش بقى كده .. منا لسه قايله ان كلنا ولاد حلال

وولاد ناس ومحترمين وبناكل تلات وجبات ف اليوم

انا عن نفسى باكل اتنين بس .. فرق سورعات بقى ..

كتير ببقى ماشيه بالعربيه

والاقى حد مثلا ف مكان مقطوع وواقف يستنى مواصلات


رجل .. ع دواسة البنزين .. والرجل التانيه بتفكر تنتش فرامل

عمركم شفتوا حد بينتش فرامل برجل ورجل ع البنزين


هو ده التمكن القيادى الصح

وتكون الغلبه للرجل اللى ع البنزين والتانيه تنتش دبرياش

وتالت .. واطيييييير

كتير بلاقى حد واقف بعربيته ف مكان مقطوع

وبيغير عجلته .. او عربيته عطلانه .. او ما الى ذلك

ويتكرر نفس الموقف ...


كتير بشوف اتنين ستات بيتخانقوا .. واكون هموت وادخل افصل بينهم

بس ارجع امشى ..

وقد ايه .. بكره نفسى ف مثل هذه المواقف .. بل وبضربها بالجزمه كمان

بحب حرف بل ده اوى ...

طيب انا ايش ضمنى ان اللى هنزل اساعده ف عربيته ده

ميخطفنيش مثلا .. ودى ف حد ذاتها نو واى تحصل .. لان انا اخطف بلد

احم احم .. بس برده .. ايش ضمنى انى اللى هركبها معايا ف العربيه دى

متقتلنيش مثلا ..

متخدرنيش .. وتاخد منى اهم حاجه ف حياتى ..

..


القلم الرويترنج الاصفر ابو خمسه جنيه ..

ايام مكان الرويترنج ماشى بيتقمع

.. لووووووووول ..

او ادخل افصل بين الستتين .. يقلبونى ولا حاجه

وانا والحمدلله .. محفظتى دايما عامره باللبان والجلاكسى

حقا هذا الخيال المريض

والذى تسبب فيه اصلا

ان ولاد التيييت الاولانيين مخلوش لولاد التييت التانيين حاجه

وماشاء الله خيال خصب .. يوميا نقرى عن الست اللى خدرت سواق تاكسى

واللى قتل سواق الملاكى وخد الكاسيت

حماااااااااااااااااااااااااااار

يقتل وياخد كاسيت وياريته سبتلايزر ده كان صينى مش حتى سانيو

هههههههههههههههههههههههههه ويسيب العربيه

المهم بجد الموضوع ده بيقتلنى .. فعلا وقد ايه ف كل مره م دول

بخسر احترامى لنفسى اسبوع لحد ماانسى الواقعه

تيجى واقعه غيرها


ولذلك ف اغلب الحالات بتكون نفسى مبتحترمش نفسها


انت يااااااااااض .. بتقول عنى انا مزوداهاااااا

طب اطلع ياله برا المدونه ..

لا فعلا انا مش مزوداها خصوصا انى م النوع المساعد جدا جدا

لابعد مما تتخيل

معرفش ليه

غير انى مولوده كده بعشق مساعدة الغير

فلما تبقى عامل دايت وخايف ع صحتك وقدامك فرخه محمره

احساس ولا ابشع بالقهرررررر

فارجوكم ياولاد الحلال .,. سيبوا لولاد الحلال حاجه

خلونا نعرف نساعد اللى بيقع ف ورطه بجد

متقهرونييييييييش

Friday, April 11, 2008

ياضنايا .. يابنتى .. طب بشرى

.

كل مااقعد مع حد ويعرف انى ف طب
..
احس انه خلاص الدمعه هتفر م عينه ويطبطب عليا

امد ايدى ف جيبى واطلعله منديل ..

يمكن يكون افتكر ان الحكومه ناويه تشيل الدعم وان الانبوبه هتبقى ب 40 جنيه ...

عيان .. عواطلى .. عاله ع ابوه وامه .. عايز يتجوز ومش عارف .. على باب الله ..

هذه هى الخمسه عين المصاحبه للطبيب الان

واللى كانوا عروسه .. عربيه .. عزبه .. عياده .. عماره

طب ليه محدش بيفكر ف الطب كمهنه انسانيه ..

محدش بيشوف انك هتقبض 120 جنيه .. ومعاهم 120 الف حسنه ..

الكل تركيزه ماديا .. هتاخد كام ..

ماهما عندهم حق برده .. دلوقت بقت كل حاجه بكام

معاك كام .. هتسوى كام ..

عايز تجوز .. معاك كام

ع العموم .. بقى

انا فخوره انى ف طب وهكون طبيبه ومبسوطه فحت بالـ 120 جنيه اللى هاخدهم

ومش عايزين شفقه م حد ..

دكتوره محترمه .. داخل عليها عيان العياده

ومصمم يدفع الفزيتا دبل .. يعنى الضعف

هههههههههههههههههههههههههههههههههههه

تقريبا فكر ان الصندوق اللى قدام الجامع اللى تحت العياده

تبع الدكتوره .. تبرعوا لاختكم الدكتوره

هههههههههههههههههههههههههههههههههههه

طبعا موقف لا تحسد عليه .. والراجل مصمم يدفع

ياعم ف ايه .. يقولها كله خير لوجهه الله يادكتوره

هو حد قالك انى الفرع الشرقاوى للجنة الزكاه

ياسيدى شيل فلوسك وامشى

يادكتوره متكسفيش انتو محتاجين فلوس تلبسوا برده

هو الدكتور ايه غير قميص وبرفان وجزمه نضيفه

هههههههههههههههههههههههههههههههههه

انت شايفنى بشحت ياراجل انت .. امشى اخرج براااا

واحتدم الموقف ..

لحد مقطعتله الفلوس كلها ... بما فيهم الفزيتا نفسها

هههههههههههههههههههههههههههههههههه

الله يخربيتك ياللى كنت السبب .. وخليت الناس تتجرأ علينا كده

ولا دكتور محترم .. رايح يتقدم لوحده ...

ابوها طرده برااا .. امشى اطلع برااااا انت اتجننت تيجى تطلب ايدى بنتى

ع اساس انه ابن عم على الجناينى مثلا

زمان .. كان الدكتور اسمه حكيم وبيتهزله شناااب

دلوقت حكيم .. بقى دكتور ساقط ف طب 12 سنه
هعععععععععععععععععععععععععععععععععععع

خليك استك .. م غير وش بلاستيك



الاستاذه .. اول واحده محتاجه تعرف يعنى ايه حرية رأاى

والاستاذ برده .. معقول يكونوا بلطجيه مزقوقين علينا وانا معرفش

طبعا الاخت المدونه العزيزه .. ليها منى كل احترام وتقدير

طبعا اختى المدونه لما عرضت رايها ف شخصيه عامه وهو الاستاذ عمروخالد

وتناولته بمنظور العميل ذو المطامع الشخصيه وما الى ذلك م اوصاف

ومجرد ماا ف ناس قالتلها لا بكل احترام وادب

اتشتموااا ..!! ... ولما تناولت برده نفس الاخت العزيزه الاضراب

ع انه حركه وطنيه ثوريه سيذكرها التاريخ ف مطلع القرون الوسطى بالبوزتف

ومجرد ما ف ناس قالت ان الاضراب اتسم بالهمجيه ..

اتشتموا ..!! ... وانهم عملاء وبرياله ومش فاهمين حاجه وعيال لسه بيلعبوا بالطوب

وشباب خرع .. وتفة اى عيل م عيال المحله برقبتهم ....

اذن الاخت المدونه العزيزه تجيد حرية التعبير وحرية تقبل الرأى الاخر

.. اللى هى تقوله ... اياااااااااااااك تجادلها فيه ف مدونتها ....

اى حاجه واى حدث يحصل اوعى تكون رااى خاص بيك .. الاول تروح ع مدونتها

وتشوف رايها ايه .. ف الحاجه دى .. وتحفظه بالنص .. وتتبناه كرأى شخصى

يعنى الناس اللى قالت ع الاضراب اتسم بالهمجيه .. مجوش جنبك ولا كلموكى اصلا

توجهيلهم كلام ف مدونتك ليه م قريب او م بعيد ....

انا اعرف ... ان ماشى اقول الاضراب مكنش يتسم بالهمجيه

الاضراب كانت حاجه حلوه اوى .. لكن نشتم ف اى حد يتبنى وجهة نظر مخالفه

يبقى الواد ده ايه ... شنكوتى ... لا بلطجى ومزقوق علينا

والاستاذ .. اللى مش عاجبه اى كلمه بقولها .. واللى بتهيالى لو عطست

هيقيم عليا الحد .. انقد براحتك .. ورينى وجهة نظرك

لكن لمجرد القمع انك تيجى وتشتم .. فده مبياكلش معانا

ولذلك يبقى الواد ده ايه .. برده بلطجى ومزقوق علينا

اى حد يتبنى وجهة نظر مخالفه .. يبقى بلطجى زاقه علينا النظام

اى خطه ولا حاجه نعملها وتفشل .. يبقى النظام هو السبب الرئيسى

يعنى انا اخيرا دلوقت عرفت مصطفى جاب 50% ف الثانويه ليه

هو النظاااااااااااام .. مصطفى مين اصلا

الخلاصه بقى ...

محدش يعيب ع اعضاء مجلس الشعب اللى بيشتموا بعض ف المجلس

ولا الاستاذ اللى ضرب الناظر ..

ولا الحكومه اللى مش فاهمه وجهة نظر الشعب

علمونااااااااا يعنى ايه حرية الرأى الاخر ...

علموناااااااا يعنى ايه حرية تعبير ....

مش عايزه الاقى الكل متمسك برايه كأنه وحل نزل عليه م السماء

وملاقيش الامن والنظام بيقمع اى حد يقول بمممممم

وملاقيش الشعب نفسه نازل يخرب لمجرد انه يقول لا

وملاقيش الشعب مش فاهم حكومته .. ولا حكومته فهماه اصلا

عايزين نعرف كويس نقول كلمة لا وازاى نقولهاا .. وامتى نقولها

ونحترم اللى بيقولها ... وحطلى هنا تلاتين خط .. واستك

وخدها منى حكمه ...

** خليك استك م غير .. وش بلاستيك

قالتلها الزعيمه سمسمه .. محمولة ع الاعناق م فوق محور 29 يوليو

ف ثوره عارمه للمطالبه بحقوق .. سحلب ف امتلاك دى فى دى وجزمه اديداس

ملحوظه متملحظه ..

خليك استك م غير وش بلاستيك .. اى خليك استك ومطاط وتتقبل الراى الاخر

بوش كله ملامح بشريه .. قادره ع التمييز بين ماهو جدير بالثقه

وما هو يستحق ااقرب باسكيت زباله

بص بص بص

م الاخر ..

مش بالضروره انى لما اسمع رايك اكون متفقه معاك فيه ومقتنعه بيه

لكن بالضروره انى لما اسمع رايك اكون انسانه بحترم نفسى وبحترمك

ومؤمنه انك حد عاقل وبالغ بالدرجه الكافيه ان يكون ليك راى وتعبر عنه

وافكر فيه .. واحسبها واعقلها .. واشوف هقتنع برأى سيادتك ولا خارج حساباتى

وكله بالاحترام .. احلى م الاحترام مفيش

مش قولتلك ..

خليك استك .. م غير وش بلاستيك ..!!

ولا هما بس فاكرين ان عندهم مخ ..بيفكر.. واحنا عندنا فول نابت بالصلصله

اضراب .. يعنى اقاطع مصر




اضراب يوم 4/5 .. ويوم 2/5 ..
ويوم نتيجة الثانويه العامه لو الناس معجبتهمش درجات عيالهم

ويوم التنسيق لو طب بشرى خدت م 98% ... ويوم ما اللبن يزيد ربع جنيه ....

شعب .. عرف نقطة ضعف النظام .. وازاى يلوى دراعهم

زى الواد سحلب لما عرف مدخل ابوووه .. لو مجبتليش عربيه والله ماامزاكر

لو مزودتش مصروفى .. والله مامزاكر ...

لو مطلعتنيش الرحله .. والله مامزاكر ..

طب انت لو ابو سحلب هتعمل ايه ..

هتقله اخبط دماغك ف الحيط بقى ..

وهو ده بالظبط اللى هيحصل لو الشعب ساق كتير ف لعبة الاضراب ده

والله لو مااكلتوناش هنضرب والله لو مشربتناش هنضرب
والله لو منضفتلناش التواليت هنضرب

طب واخرتها

اضربوا دماغكم ف الحيط ...

وادى اول اثبات ع اتقان الشعب لحرية التعبير والرأى واسهال الاضراب اللى جاى

مليوووووووون حاجه ممكن تتعمل تعبيرا .. عن غضبنا

فكره واحد مبدع الصراحه .. نكتب ع كل جنيه ف جيوبنا

اللى لسه ف جيبه جنيه يعنى .. كلمة لااا .. جعانين

كل واحد يعلق ف بلكونته .. رايه بيضا مكتوب عليها جعان ..

حجات زى كده مثلا ..

لكن اضرب يوم واوقف حركة الانتاج واعطل بلد بحالها

طب محدش منكم فكر .. تانى يوم هناكل ازاى ....

اليوم ده ..

الف مصنع بيطلع الف منتج غذائى

الف مؤسسه حكوميه .. بتخلص الف حاجه خدميه لمواطن زى وزيك

الف مستشفى بتعالج الف مريض

الف عسكرى واقف ع الحدود بيحمى الف كليومتر م بلدك

يوم .. تصاب بلد كلها بالشلل ..

فكره جيده .. وخطوه كويسه م شعب بدا يقول انا اهو ومضايق وهعبر عن غضبى

اضراب طائفه م طوائف المجتمع ماشى

لكن يوم .. يضرب فيه الشعب كله ...

ده عتاولة الحريه والسياسه برااا ... محدش فيهم عملها

اه صح .. م زمان وانا نفسى يكون لينا ريادة عالميا

اول شعب يعلن العصيان التام .. وندخل التاريخ هييييييييييه

.... اعبر عن غضبى .. لكن مضرش مصلحة بلدى .. مضرش اقتصاد بلدى

اوك هو مضروب خلقه .. بس متجيش منى ....

وده ببساطه كان رأيى ف فكرة الاضراب الجماعيه .. ومرحبا جدا بكل الاراء المضاده

اضراب جماعى .. يعنى اقاطع منتج بلدى واقاطع مصلحة بلدى واللى هى مصلحتى انا شخصيا

لا .. انا مع مصر ... مش ضد مصر ..

ولذلك .. انا مش مضربه


..
بتضرب بس ,, لوووووووول

Tuesday, April 8, 2008

هو اللى زقنى ف الاضراب البمبى



حسره عليها ياحسره عليها

جت رجليها ما جت رجليها ..

انا ايه ذنبى انا ايه ذنبى

هو اللى زقنى ف الاضراب البمبى ..

اصدقائى واخوانى واخواتى

ياشعب همجى .. ياشعب بلا حراك سياسى

انا تقريبا .. مقلتش رأى ف الاضراب خالص

بعكس اغلب المدونين اللى نشروا عنه قبل وبعد ما حصل

حاجه كويسه جدا ..

انا كنت قاعده وبتفرج ف الظلام واتنبأ بالكارثه

الصراحه هى جت اهون منا كنت متخيله

اضراب يعنى نقعد ف بيوتنا .. نورى الحكومه انهم بلا شعب

زى جاموسه بلا حبل .. معرفش ايه علاقة التشبيهه بس شغال شغال

قبضوا ع .. مدونين وصحفيين ومحامين واى حد كانوا بيسمعوه ينطق كلمة اضراب

حاجه كويسه جدا .. شغال شغال

المحله ولعت .. وكسروا وخربوا وحرقوا ودمروا

وناس مدنيين ماتوا وعساكر ماتوا ومنشئات اتهدت

ومال عام راح ف الارض

حاجه كويسه جدا .. شغال شغال

بصوا بقى .. بعد كده حد يقولى احنا ناس عندهم حرية رأى

احنا ناس عندنا حرية تعبير .. احنا ناس عندنا سياسه

عند ام ادهم يااسماعيل .. احنا شعب همجى

اى حاجه يحولها لضرب وعنف وتدمير ...

ابن عمى كان زعلان جدا ع الناس اللى ماتت وانضربت ف المحله

وان الشرطه ازاى .. ونظام غاشم حازم لامم فاقم .. وكل الميمات دى

طب انت لما واد صاحبك بيعصبك بالبوكس وف وشه

اذن .. احنا كشعب بكل طبقاته

سواء الجزء الحاكم او الجزء المحكوم .. ليس لدينا اى خبره عن البتنجان

كيف نسايس ونتسايس ونعبر .. حتى الاضراب حولوه ثوره وعصيان

فمنستعجبش ع راكشنات الشرطه والقبض العشوائى ع الناس والضرب العشوائى ع الناس

وشطب الاخوان م المحليات .. لو انت مكانهم وحياة الغاليه هتعمل كده

عارف عارف ليه

بص بص بص ..

علشان احنا شعب همجى محتاجين ولا 50 سنه لما نفهم يعنى ايه

اكون ضدك وتحترم راايى

ويعنى ايه اعترض بهدوء

ويعنى ايه تتقبل اعتراضى بهدوء

ويقولك مصر فيها حراك سياسى

يااخى توكااا .. مصر طاهره وهتفضل طول عمرها طاهره

لو عايزين نعمل اضراب بجد . ونعبر بحريه بجد

فهموا الشعب اصلا مبادىء واساسيات الحريه

وف النهايه وبكل مراره

ربنا يفك حبس كل اللى تم القبض عليهم

ال ايه .. بيروجوا لفكر مضاد وبيتعدوا ع الحريه الشخصيه

نياهاهاهاااااااااااااااااااااااااااااااااااااااااااااااااااااااااااااااااااااااااا

وربنا يعوضنا بقى ف الخساره اللى حصلت ف المال العام

لان اللى بيروح عند الناس دى مبيرجعش

يعنى هتطبل علينا نحن الشعب ف الاخر

واى حد هيرد عليا م العدوانين واللى بيعشقوا منظر الدم

ويقولى اصل مفيش حق بيرجع غير ع بساط م الدم

والعنف يولد العنف

والبتنجان المسقعه احسن م البتنجان المحشى

ياراجل عاعوعاااااااااااااااااااااااااااااااااااااااااا

Tuesday, April 1, 2008

انا بحب .. حتى انت يابروتس ..

الخطوبه مصلحتك اولا
..
بوست جديد ع مدونتى الاخرى
.
.




خايفه تلاقى ورده تحلو ف عنيك

.. تنسانى وتقطفها باديك ..

تجرحك الاشواك .. تتعذب هناك

... اقطفها بايديا ولا تجرحش ايديك

سيب الجرح ليا .. خلى الفرح ليك

كلنا بنحب .. وبنتحب ..

بنحب اشخاص .. بنحب اشياء .. بنحب نسمة هواا ساعة فجريه

مع ادان المولى .. دعوة سلام دعوة حب .. دعوة نشاط

دعوه للاستمتاع بالحياه

بنحب ناس وبنتوحد معاهم بارواحنا وعقولنا وقلوبنا

كلنا عندنا ناس نفديهم بارواحنا ..

كلنا عندنا ناس نتمنى انهم يقطفوا الورد بادينا ..

علشان يسيبوا الجرح لينا ويخلوا الفرح ليهم

يمكن نكون ناسيين ده .. بس لازم دايما نفتكر

انك بتحبى اولادك .. طب زعلتيهم وضربتيهم ونيمتيهم بدموعهم ليه ؟؟

انك بتحب مراتك .. طب اتخانقت معاها امبارح بليل ليه ؟؟

انك بتحب امك .. طب مسمعتش كلامها ليه لما قلتلك البس ب كوم علشان الجو برد ؟؟

انك بتحب صاحبك .. طب شديت معاه ليه .. وضربته كمان ياراجل

انك بتحبى الشارع نضيف .. طب رميتى ليه امبارح المنديل فيه

انك بتحب الزرع الجميل .. طب مشيت ليه ف جنينة الجامعه ما فى رصيف امشى عليه

ان احنا بنحب .. كل حاجه جميله .. ونضيف .. ومرتبه

ان احنا بنحب .. كل الناس .. كل حاجه فيها روح حوالينا

ان احنا بنحب بلدنا .. بنحب دينا .. بنحب ربنا ..

عصفور جميل .. قطه بريئه .. بيبى بعيون جريئه

اتخلقنا بنحب .. طب ليه الخصام ؟؟

بلاش تبقى تزعل ع موت امك .. اللى كان فيه ايام خنقتها فيها

بلاش تبقى تندم ع فراق صاحبك .. اللى كان فيه لحظات ضايقته فيه

بلاش تبقى تندمى ع جرح حبيبك .. اللى ياما وياما ...... ايون زى ماانتى فاهمه

افتكر دايما ان اللحظه اللى ممكن تتعصب فيها .. هى نفسها اللى ممكن تضحك فيها

وتملى الدنيا فرحه

افتكر دايما ان الحد اللى ممكن تزعله هو نفس الحد اللى ممكن تطير معاه ف اجمل دنيا

الدنيا متستاهلش .. غير كلمة حب

يلا بينا نحب ...!!!

حتى ف دنيا صعبه .. حتى ف ظروف مره .. بسمه وكلمة حب .. ونظره حنان ..

قادره تصنع المعجزات ...!!

مش كده .. ولا هو ايه .. حتى انت يابروتـــس ..؟؟

خراب يااى حاجه .. عمار ياقلبى ..

متعملهاش حسابات ,, اسال عليهم ومتقلش هما مبيسالوش عليا

ابدا انت الكلام .. حبهم انت .. هتلاقيهم ع طول يحبوك

ع فكره

.

.

.

انا بحبهم ..

حياتى م غيرهم ... مش حياه