Friday, December 7, 2007

** احنـا الكـل اكلنــ الكوسه ــا **






لسه صاحيه م النوم اهو ودخلت ع مامتى المطبخ ويارتنى مادخلت


صباح الخير ياهانم


يسعد صباحك ياست الكل


نزلتى ليه م سرير حضرتك ياهانم


والله ياماما قلت انزل اتفقد احوال البيت كده م زمان ملفلفتش فيه


منا بقول برده .. بنتى ف المطبخ .. ده شىء لا يصدكه عكل


طبعا التريقه بقت ع عينك ياتاجر .. حاولت الم المتكسر واقلب ع الحوار


ها يامامتى ياحبيبتى هناكل ايه النهارده م ايديكى الحلويين دول
مع قبله حبشتكانيه طبعتها ع ايد ماما


واهو شىء لزوم الشىء



ايون ايون مباخدش منك غير شغل حلق حوش ده



طبخالك كوسه م ايدى الحلويين دول


اخصصصصصصصصصصصصص


اخص ايه يابت


لا ولا حاجه ياماما افتكرت انى كنت بحلم حلم جامد اوى قبل مقوم
هروح اخطفلى ساعتين كده واهو بالمره اكملوو .. تصبحى ع خير


كوسه .. كوسه .. كوسه ياماما ...
هذا ماجناه ابى


..
نعم نحن جميعا اكلنا الكوسه .. وبناكل الكوسه .. وهنفضل ناكل الكوسه


مين منكم مبياكلش الكوسه .. حد يقدر يتكلم

اللى عاملى فيها شريف والنيل رواه والخير جواه

وضميره الحى الواعظ الماعظ المتقاعظ

ويقلك البد مليانه كوسه ومعرفش ايه ولو نيلك صلصه مكنش كفى الكوسه اللى فيكى يابلد

طيب مااهو احنا اللى طبخنا الكوسه
وغرفنا الكوسه واكلناها واكلناها لغيرنا

مين منكم لما بيبقى عندو واسطه مبيستهخدمهاش

اللى عمو كمسرى ف القطر .. بيركب درجه اولى هو والعيله كلها ع قفاه

اللى خالته ف السجل المدنى بيطلع بطاقه هو وكل معارفهم ف ااقل م اسبوع

اللى مسافر برا وعرف ان جوز عمة ابن خال جارهم اللى ف اخر الشارع ف الجوازات
بيجريله جرى ويقع ف عرضه وطوله

واللى والده كان صديق لعضو مجلس شعب الدايره بتاعتهم وكانوا بيلعبوا نط الحبل سواا
يجرى عليه هو والده محملين بالطلبات .. ايشى طلب التحاق باحدى الكليات العسكريه
ايشى طلب موافقه ع مبانى فوق ارض زراعيه
..
ده حتى انا علشان امى كانت مدرسه ف المدرسه اللى كنت بدرس فيها
كنت متظبطه ملخصات ومزكرات هههههههههه

ده يااخى السواقين بيقلولك ولاد الكار الواحد لزمن ولابد يشيلوا ويخدموا بعض

ودول السواقين ..
طبعا المثل شغال م اولهم لحد الوزرا وفيما فوق

يبقى كل واحد فينا اكل وشبع كوسه طبعا

بس اول منتزنق ف موقف ونلاقى غيرنا عنده واسطه فيه واحنا معندناش فيه
ضميرنا اللى منيمينو بقالنا سنين نكشفووو ونشيل الغطا عنو
ونصحيه بقى ونديها كلام ..

لا واللى يقولك اصل دى مش واسطه ..
ايه يعنى لما علشان ابويا مدرس المدرسين زمايله يهتموا بيا
لا فيها يعنى وكتير كمان .
ماهو ع نفس المبدأ .. دكاترة الجامعه بيخدموا بعض .. وظباط الشرطه طبعا هيخدموا بعض

ومين فينا مفيش ف عيلتو بقى دكتور ولا مهندس ولا جوز خالته لواء ف المرور

ولا حما ابن عمتو عميد كلية التربيه الرياضيه
..
يعنى لو كل واحد مننا بدا بنفسه وفضل مصحى ضميره ع طول وميغطهوش ابدا

واى موقف يتزنق فيه ميجريش يدور ع واسطه
..
انت وانا وغيرك وغيرى لو كلنا عملنا كده

امى مش هتلاقى كوسه تطبخهالنا يوم الجمعه
..
ونديها بسله بالجزر .. مفيده وصحيه وخفيفه ع المعده

وبالهنا والشفا..




20 comments:

السـيد شبـل said...

اكيد اول تعليق:
انا على فكرة ياسمسه ما كنتش بعمل اعلان المرة اللى فاتت على فكرة
بس اوك
خلينا ف البوست الجديد:
انت عارفه انا اولا سالت نفسى كتير مارسيتش يوم على بر.... هنغنى... المهم

ايه علاقة الكوسة بالكوسة قصدى الواسطة؟

وايه ذنب الخضار الغلبان ده فى انه يتسب ويتلعن كل يوم بالشكل ده
لو حد عنده فكرة ياريت يقوللى

ثانيا :
كلنا بنستخدم الواسطه بالعكس انا ببقى سعيد لما استخدم الواسطه ... اصل الواحد فينا مش واحد بس على فكرة ..ده احنا جوانا مليون واحد وكل واحد منهم برأى...
بس انت عارفه انا لما كان بيبقى معايا حد من قرايبى ضابط شرطه مثلا ورايح اقضى مصلحه.. على الطلاق ساعات بينفضولوة
بس المهم انى ساعات بحاول اساعد الناس اللى حواليا كمان يعنى لو مصلحتى مشيت بظبط اللى حواليا آه وحياة ربنا
المهم:
آخر مرة حسيت ان""" انا """
واسطه """ انا """
بقيت واسطه.. بقيت كوسه.. انا كمان
لما بقيت ادخل المستشفى واقول انا دكنور يا سلام ... والله بفكر احب الطب
ده حسيته من فترة قريبه لما كانت ماما ف المستشفى

المهم يبقى خدى بالك مالاخطاء الاملائيه
اوك
تحياتى وتمنياتى بدوام الكتابة

Anonymous said...

I LIKE IT A LOT

د/اجدع بنوته said...

ميرسى يادكتور سيد انا كنت بهزر اعلانات ايه واحنا فينا م كده ههههههه

معلش بقى خليها عليك كنت لسه صاحيه م النوم اكيد لازم اديها اخطاء املائيه

وحمدالله ع سلامة مامتك

د/اجدع بنوته said...

thanks beauty club

دكتور حر said...

طبعا أنا معاك فيما ذهبت االيه

لكن دائما لهم تعليق ظريف

بيقولوا


لو نهر النيل صلصة
ميكفيش الكوسه اللي في مصر


ربنا لمصر

RealMan said...

سؤال كده علي الماشئ الله يكرمك البسله بالجزر معاها بطاطس ولا بدون احسن مبحبهاش من غير بوطاطس.

كوسه كتير صلصه قليل اوكي

مروة الزارع said...

مدونة رائعة
أنا أعجبت بيها جدا
وأعجبت بشخصيتك
دى أول زيارة ليا بس مش هتكون الأخير
منتظرة زيارتك ليا
على فكرة أنا صاحبة مدونة فقيرة لأنى جديدة لسة غفى عالم التدوين

l0ma said...

هههههههههه يا بنت الاية فعلا واللة لو النيل صلصة ميكفيش الكوسة الى فيكى يا بلد
بس الفكرة انة كلة مش لاقى لحمة فمضطر ياكل كوسة يمكن يطلع على وش الفتة بس انا عن نفسى برضة مبحبش الكوسة انا احب البسلة سوتية
مدونة هايلة

السـيد شبـل said...

سمسمه:
مش ممكن بقالك مدة كبيرة نسبيا ما كتبتيش موضوع جديد..

اتمنى تكونى بخير

السـيد شبـل said...

اتمنى تنضم الينا فى حملة


"" فخور لأنى اتحدث العربيه ""


تحياتى ... للمزيد ادخل على المدونة

Anonymous said...

السلام عليكم ورحمة الله وبركاته
على فكرة الكوسة تفرق إذا كانت مسلوقة أ, بصلصة أو بصلصة وفي الفرن أو بالباشاميل. ويمكن تكون بالشامبينيون أو بالكريز ويا سلام لو كانت..............آآآآآآآآآآآآي والله ماقلت حاجة دي هيا اللي كتبت أنا باحاول أعقلها.

عاجبككدة يا ست أجدع بنوته أهو الأوبشن الوطني اللي في الكمبيوتر بتاعي خبطني. ربنا يسامحك

د/اجدع بنوته said...

ربنا لمصر فعلا يا دكتورنا الحر

احسن رد ممكن يترد ع كل اللى بنعيشه دلوقت

تحياتى

د/اجدع بنوته said...

ريال مااان حدش ميحيش البطاطس .. ياااربى .. ع كلا لو تحبها م غير بسله اصلا نعملهالك

انت تؤمر وشرفت الموضوع

د/اجدع بنوته said...

ميرسى جدا يامروه ع المجامله دى

وانا فعلا روحت مدونتك بس كنت ف فترة حداد

فمردتش ع حاجه بس ع وعد انى اسبلك كونتات وارائى ف كل حاجه باذن الله


تحياتى وشرفتى الموضوع

د/اجدع بنوته said...

ههههههههههههههههههههههههه


لوما دى قلبناها مطعم خالص الموضوع ده

انا جوعت ع السيره والله

بسله ورز وبسله سوتيه وكوسه

مم المم ياروحى ياللى جيبالك مم

تحياتى لوما

د/اجدع بنوته said...

ميرسى جدا يادكتور سيد ع السؤال

الحمدلله انا بخير ورجعت تانى اهو علشان ازعجكم

د/اجدع بنوته said...

ماشى يادكتور سيد ننضم وانا فخوره جدا انى اتحدث العربيه

بس لو كنت بتحدث الانجليزيه بس يلا ماعلينا احم احم

وانا حالا اهو عندك ف المدونه

نلتقى هناك

د/اجدع بنوته said...

نبيل هو ايه الشامبنيبون ده


ده ف انهى كلسفكيشن للانتى بيوتك

تبع اللى بيضربوا السيل ميمبرين

منور البوست يازميلى

دكتور ماجيك said...

بسلة بالجزر تفرق ايه عن الكوسة؟

د/اجدع بنوته said...

تفرق كتير ياماجيك ..

كيلو الكوسه بتلاته جنيه والبسله بتنين جنيه

بس بجد انا م زمان وانا عايزه اعرف اشمعنا الكوسه والقرع اللى اخدوهم رمز للواسطه

ماكانوا اخدوا البسله بالجزر مثلا

سؤال بيطرح نفسه

منور ياماجيك