ماما هستنى العيد لما يخبط ..

مساء الخير .. وكل مساء وانتم بخير

هل اختلفت فرحة العيد عام 2007 عن فرحة العيد ف 1997

بعد مرجعت امبارح بليل م العيد بقى وعيدنا قعدت افكر

هى دى اللمه اللى كانت م عشر سنين

ولا هى دى فرحة العيد م عشر سنين

بيتنا .. العيد الكبير .. 1997

(( عمرك مهتلاقى وصف زمان ولا مكان اعبط م كده ))

احم احم

نامى ياسمسمه بقى

..
لا ياماما لازم العيد يخبط واسمع التكبيره

(( كنت بفتكر ان تكبيرة العيد ده زى واحد بيخبط وبيقول ياساتر علشان الناس تفتحله ))

اه وبعدين تنامى الصبح لحد منوصل البلد ويبقى منظرك عيال اوى

ليه وهو انا مش عيال يعنى ياماما

يالا اسمعى الكلام انا عملتلك ضفيرتين اهو ونامى

اجرى اجيب أزازة المونكير وتحطلى ماما مونكير احمر

وادخل الاوضه .. اتفرج ع لبس العيد اللى متعلق ع الشماعه وع الجزمه تحت السرير

واطمن وانزل تحت الباطنيه

واغمض عين وافتح عين

..
وافضل صاحيه انسج ف خيالات واعمل مسلسلات للعيد بكره

وولاد خالى اللى جايين م القاهره واللى مبشفهمش غير م العيد للعيد

والخروف اللى هنحميه ونسرحله شعره

وخنقاتى انا وماما علشان كده غلط لما احمى الخروف هيجيلو برد

وبعدين تلبسنى اللبس ونتخانق علشان مش عايزه البس حاجه تحت اللبس وهى تضربنى وتقلى الجو برد

ايه ده هى ماما مش وراها غير البرد .. اوووف

الله اكبر كبيرا .. والحمدلله كثير .. وسبحان الله بكرة واصيل

هيييييييه التكبيره جت

تك تك ع باب اوضة ماما وبابا .. ماما العيد بيخبط اهو

ياماما .. اصحى بقى العيد بيخبط

ه بدرى روحى نامى شويه
اووووووف بقى .. اجرى اطلع ع السرير بتاعى وبطلوع الروح اعرف افتح شباك الاوضه

الله العيد حلو والسما جميله والهوا ريحته نفسها تجنن

اخد نفس جامد منه

انزل البس اللبس بنفسى والبس الجزمه بالصوره اللى ربنا يقدرنى عليها

ايه ياهبله اللى انتى عملاه ف نفسك ده وفاتحه الشباك هتاخدى برد

مش انا قلتلكم ماما مورهاش غير البرد

... لا والله لبست اهو

... لا لا مش شبعانه ... يييوه مش جعانه اصدى

باباا .. باباا .. هاتلى العيد فرحه ياسلام

يفتح بابا الكاسيت وتتعالى اصوات الموسيقى والعيد فرحه ياسلام

واجمل فرحه ياسلام .. تجمع شمل قريب وبعيد

واتنطط واجرى ف المكان واطلع ع كراسى الانتريه وماما ورايا بالشبشب
ى هتوسخى الفرش هتبوظى الدنيا
بابا .. سبيها العيد ميبقاش عيد غير بفرحة زمزومتى

يشيلنى بابا ويبوسنى ويدينى جنيه .. يلا روحى هاتى حجات حلوه

انزل ع السلم جرى .. اتكعبل ع اول لفة سلمه .. وطاااااخ

واقوم ولا كأن حاجه حصلت والعيد فرحه ياسلام

عمو نبوى .. العيد فرحه .. هات بمب وصواريخ وبلالين

خدى وكمان علبة كبريت اهى

لا لا مش عايزين بابا عنده كباريت كتير ف البيت

اجرى بالحجات والم عيال الشارع كله ونغنى ونفرقع صواريخ

ويزقنى الواد رامى ابن الجيران ف الطين علشان مش عايزه اديلو بلونه واعيط وتخرج امى م البالكونه

تلاقى امه مسكته وهتضربه تقولها سبيه دول عيال كل سنه وانتو طيبين

اطلعى ياسمسمه اغيرلك هدومك

تلبسنى ماما بيجامة العيد الجديده برده

واروح انط ع رقبة بابا .. بابا هو احنا هنفضل نجيب جرنال الاخبار ده ع طول

وانتى بتشوفينى بشترى غيره يعنى

لا

.
طيب

.

بابا بابا هنروح البلد امتى ...لما عمامك يجوا ان شاء الله

طيب هات جنيه .. ليه منتى لسه اخده

بابا .. بابا واتنطط ع رجله

يحط بابا ايده ف جيبه

هوىىى انت مش لسه مديها م نص ساعه

ياحجه كل سنه وانتى طيبه

انزل بالجنيه اشترى صواريخ تانى

وارجع ابص لرامى بصة انت اللى قتلت ببايا

واطلع ... الاقى عمامى وعماتى متجمعين

واخد العيديه وهييييييه هنروح المولد اصدى هنروح الببلد

ننزل الشارع .. سمسمه انتى هتقعدى ع رجل ماما علشان هناخد شنط كتير ومفيش مكان ف العربيه

لا انا مقعدش ع رجل حد انا مليش دعوه

اتحشر جنب ماما ف الكرسى اللى قدام

وورا ف عمى ومراته واولاده

والخروف ف الشنطه

ونمشى بالعربيات ورا بعض

يابت متمديش ايدك ع الكلكس

يابابا انا ازمر انا ازمر

العيد فرحه .. بيب بيب .. واجمل فرحه بيب بيب

نوصل البلد ونتلم كلنا ونجيب الخروف بتاعنا والخروفات التانيين

ونجيب ميه بالكوز م الزيرونحميهم ونسرحلهم شعرهم .. وتطلع امى تمسكنى م قفايا
كى متعمليش كده

اهىءءءءءءءءءءءءءءءءءءءءءءء

خلاص اتسدى اتسدى

يجى الجزار ويدبح الخروفات واحنا نفرقع حواليهم صواريخ ونجرى

وامى كل شويه تزعقلى وترفعلى حاجب وتقلى ماشى

ماشى ماشى وانا يهمنى يعنى

ونتلم كلنا ع الغدا .. احنا كتير اوى وسبحان الله المكان بياخدنا ازاى

ونخلص غدا ونروح ع الارض ونجيب الحمارات ونركبها ونلف ف الارض

ونحدف طوب ف الترعه ونهز النخل وننزل بلح

الله ده طعمه حلو اوى

ونرجع البيت المغرب

ه دددده اللى عملتيه ف هدومك
ياايه دددده ياشيخه ارحمى هدوم الصبح وهدوم بليل

اهىءءءءءءءءءءءءءءءءءءءءءءءءءءءءء

يلا يلا نولع الشاليه وندفى عليها ونعمل شاى ع الشاليه

نرص كلنا الكواليح ويولع بابا النار بعود كبريت بعد مولع بيه سجارته

ونقعد ننفخ ف النار .. ونولع ورق ونرميه

تيته تيته .. اعمليلى مسدس

اجبلها سنابل القمح م فوق السطح وتقعد تعملى مسدس

تيته تيته .. عايزه اكل عيش فلاحى وجبنه قريش

ونقعد نركب الكواليح فوق بعض ونعمل بيت ونهده

يلا بقى هنمشى احنا..

يقولها بابا وانا سمعاه مجرد حلم ف منامى

طيب شيل سمسمه وتعالى ارجع شيل الحجات

تيته تقله استنى حط عليها بطانيه الجو برد

واصحى بليل والفجر بيأدن واقوم اقف ورا الشباك وهو مقفول

واغنى ف سرى العيد فرحه واجمل فرحه

روح مع السلامه .. هستناك متتأخرش السنه الجايه

وافضل مستنيه لحد مايجى السنه الجايه

ملحوظه .. حمارات جمع حمار وخروفات جمع خروف وكواليح يعنى كوالح

وكباريت جمع كبريت .. حسب نطقى م 10 سنين

ملحوظه تانيه .. مكناش بنصلى العيد علشان كان الجو بيبقى برد اوى

وامى كانت بتخاف عليا جدا م البرد .. بنتها الوحيده بقى

ملحوظه تالته .. العيد فرحه كانت عندى هى التحيه الرسميه للعيد

واللى اتقلبت دلوقت لكل سنه وانتم طيبين

ده كان عيدى م 10 سنين .. دلوقت عيدى ازاى مسخ للعيد ..

ع قد مبعمل وبجرى بس عمرى محسيت بالفرحه اللى كنت بحسها زمان

ده ليه مش عارفه .. علشان نفوس الناس اتغيرت زى ما امى بتقلى

ولا علشان عجلة الزمن والحياه فرمت الناس زى ما ابويا بيقلى

ولا علشان ظروف الناس اللى مايعلم بيها الا ربنا والنكد اللى ف كل مكان زى ما عمى بيقلى

ولا علشان ايه بالظبط

معدش فيه عيديه .. ليه .. اهىء اهىء

ولما فكرت افرقع صواريخ ف الشارع زى زمان .. قالوا البت اتجننت

ولما قلتلهم هاتولى حمار اتفسح عليها .. قالوا البت طقت بجد

ونكتفى بالعيد متربعين ع الكراسى متجمعين ع اللاب توب او ع موبايلاتنا

وقاعدين نلعب جيمز

بس برده هفضل مستنياه لحد ميرجع زى زمان .

.
والعيد فرحه