لعنـة الكلـب

النهارده كان يوم ملعبك جدا ..

الحمدلله طبعا ع كل شىء ..

بس سبحان الله بيحصل يوم كده تحس انه جاى غلط ..

اللهم لااعتراض طبعا ..

وهذا اوضح مثال ع يوم معاكس بعضه ..

خرجت الصبح متأخره علشان عندنا دسكشن اضافى م 8 ل 9 ..

فخرجت 8 الا تلت والطريق بياخد نص ساعه

لقيت الحاج بيحط المفاتيح ف الكونتاكت ..

قلتلو صبح صبح يابابا .. انا مش ناويه اوصل ع الضهر خالص ..

فنزل وسوقت انا وع بركة الله .. ابويا وهو قاعد جنبى بحسه بيتلو اجزاء متعدده م القران

فمره اسمع منه ان جعلنا م بين ايديهم سدا (( ده شكلو بيدعى عليها يالهوى ))

ومره تتعالى شهاداته المتتاليه . اشهد ان لا االه الا الله

وبين الفنيه والفنيه و الاخرى ... اسمع .. لا حول ولاقوة الا بالله سترك يارب ..

ابص ع بابا الاقى جسمه كله بيتنفض ياعينى وخلاص حاسه ان قلبه هينط منه ف الدواسه ههههههههههههههههههههههه

ايه يابابا ف ايه .. هما قلولك هيعدموك امتى ..

بابا :: بصى قدامك وحياة ابوكى وخفى ع الاسفلت ياسمسمه شويه

انا :: ايه يابابا ف ايه مالك قلبك هينط م عنيك كده ..

بابا :: يابنتى احنا مبقلناش طالعين م البيت 5 دقايق ولهفنا نص الطريق اللى بناخده ف ربع ساعه

انا :: اللى حضرتك بتاخده ف ربع ساعه يابابا (( مفيش احسن م الاحترام ))

وف الوقت ده انا كنت فعلا هديت شويه وكان الساعه 8 الا 10 فعادى بقى

بابا :: مش عارف بس وانتى راجعه ابقى سوقى براحه لان حاسس ان ف حاجه هتحصل

((ع اساس يعنى ان بابا بينزل قبلى وانا بكمل للكليه وبرجع لوحدى او باخده معايا ))

انا :: احم احم يابابا .. طول مالواحد مع الله .. ربك هو اللى بيكرم

(( شوفتوا الدخله دى لبعث الطمأنينه طبعا ))

بابا :: ونعم بالله ...

ولسه بابا مكملش الجمله الا وهوووب ..

كلب قدامنا .. دهست الكلب .. البقاء لله

ههههههههههههههههههههههههههههههههههههههه

بابا ببص لقيتو ف الكبوت هههههههه وانا ولاول مره اعرف ايه فايدة حزام الامان واشعر بيها جديا

انا كنت نتشت فرامل بس بعد ايه .. بعد منتقل الكلب الى رحمة ربه .. اقروله الفاتحه ياجماعه

لسه بابا بيبصلى قلتلو قولها قولها .. متوقفهاش ف زوك ده هتنط م لسانك اصلا

بكل حرقه ااااه ياحبيبى يابابا ... حسبى الله ونعم الوكيييييييييييل .. انتى ياهتموتينى ياهتشلينى

بيعجبنى ف بابا انه مؤمن اوى بأن ليا دور هام وان لم يكن الاهم ع الاطلاق ف حياته

.. طبعا الكلب والله مش ذنبى .. الكلب عدى وانا شيفاه بيعدى فجايه افاديه لقيت طياره جايه م ورايا

وياالزق في الميكروباص و يتقلب يااما اكل الكلب ..

والله لبرهه فكرت انى اقلبه لانه هواللى جاى يتجاوز سريع وشايف

انى داخله قدامه علشان افادى الكلب ..

بس ادركت ف نفس ذات البرهه ان ابويا لو شهد ع الموضوع ده ممكن روحه تطلع م قبل حتى منحك ف

الميكروباص ..

وف نفس ذات البرهه .. ايون هى نفس البرهه ربنا كان مبارك فيها..

قررت ان انا اضحى بالكلب

علشان انا وابويا وعربيتنا وكل اللى ف الميكروباص يعيشوا ..

وصلت الكليه طبعا وعليا كل علامات الحزن والاسى دى روح برده ياناس ..

ودخلت متأخره طبعا .. ده التطور الطبيعى اللى كان مفروض يحصل بعد اللى حصل ده كله

اطلع الكشكول علشان اكتب اللى الدكتور بيقوله ..

اوبااا م الاستعجال نسيت الكشكول ف العربيه وطلعت بالكتاب بس

حد يجيب ورقه ياجماعه ف الليله اللى مش باينلها ملامح دى ..

اطلع القلم .. انه يكتب .. حلف يمين تلاته ماهو كاتب .. مع انه لسه جواه حبر ..

حد يجيب قلم ياجماعه .. انا مش متفائله

خلصنا المحاضرات ونزلت وهووووووب ازازة ميه معدنيه م الدور التانى ف المستشفى وع دماغ مين

اكيد ع دماغى ماهى باينه يعنى ..

ابص فوق .. الاقى واحده عليها ابتسامه بلهاء .. معلش اصل الواد حدف الازازه

قلتلها ياستى ولايهمك هى جت عليكى يعنى

..
ببص ف الكتاب ملقتش الكارنيه .. الله الكارنيه وقع .. لا كارنيهك ياياسمين موقعش

اومال فين ياهند انا شوفتوا فوق جوا السكشن تقريبا نسيتى اصلا تحطيه ف الكتاب

طيب هطلع اجيبه انا واسبقونى اوك اوك ...

طلعت ف الاسانسير للدور الرابع .. وعند الدور التانى اعزائى القارئين .. الاسانسير علق

دقيقتين وانا متشعلقه ف الاسانسير عادى جدا .. بس كنت خلاص فقدت الامل

لدرجة انى فضلت واقفه جوا ومعملتش اى رأكشن

والله عايز يشتغل براحته هيحب يفضل كده از ات ول بى مبقتش فارقه سينا م سونيا ..

واشتغل طلعت فوق الراوند .. ادخل الاوضه ملقتش كارنيهات .. سالت الدكتور كان لسه فوق

بيلم اللاب توب بتاعه .. فقالى اه زميلتك اخدته .. زميلتى انهى يادكتور

حسيت انه ابدى علامات اندهاش وقرف ..

وفعلا معاه حق مش مدام ناهد السكرتيره هو علشان افتح معاه حوار وناخد وندى كده

فقلتلوا شكرا يادكتور ونزلت جرى ..

طبعا المرادى نزلت ع السلم .. ماهو لايلدغ المؤمن م اسانسرا مرتين

والاقى حد او واحده معرفش بس ف كمية دم ع السلم مريبه ...

تقريبا واحده كانت طالعه النسا وكان عندها نزيف

طيب واحده بالشكل تطلع ع السلم ليه بس ياربىىىى .. بس كانوا بينضفوا ف السلم

فضلت مستنيه دقيقتين لحد مخلصوا ونزلت ..

لقيت البنت اللى خدتلى الكارنيه مستنيانى تحت وبتدهولى قلتلها شكرا ياستى

وروحت واخده ديلى ف سنانى وجرى متصله ببابا قلتله تعالى خدنى انا عايزه اروح ..

انت خلصت شغل قالى اه قلتلوا تعالى بسرعه .. ف حجات غريبه بتحصلى ..

جت صاحبتى كان معاها الفلاشه بتاعى كانت وخداها تاخد م عليها حجات للرمد صور وكده

البنت :: سمسمه بجد انا اسفه جدا بس الفلاشهانا حطيتها ونقلت م عليه الحجات وفجاه مبقتش شغاله

انا طبعا وصلت الارض م الضحك .. ودى بتقلى انتى هبله يابنتى بقلك فلاشتك باظت

قلتلها هاتيها بس وانفدى بجلدك انتى قبل ميحصلك حاجه وانتى معايا .. اجرى

بابا جه وروحت ناطه ف العربيه وقلت الحمدلله .. وقبل البيت بعشر دقايق

العربيه وقفت هههههههههههه بابا نزل يشوف ف ايه وانا هموت م الضحك

ندهتله .. بابا تعالى مفيش بنزين هههههههه قالى ازاى قلتلوا تعالى اهو

قالى مش ممكن ده انا لا شوفت لمبه حمرا ولا احتياطى اشتغل ولا حاجه هههههههههه

قلتلوا بالشفا ههههههههههههههههههههههه

طبعا اتصرفنا وصلنا البيت بسلام .. طلعت دخلت الاوضه معرفتهاش

ايه ده ياماما ... اصلنا كنا بنضف النهارده .. العيد بقى كل سنه وانتى طيبه

انا سمعت نون الجماعه ف بنضف وحطيت ايدى ع قلبى

مين نضف اوضتى ياماما ..

ماما :: انا وام مصطفى

انا سمعت ام مصطفى ده م هنا وكان هيغمى عليا

وجريت ادور ف الكتب والادراج بتاعتى وانا بزعق انا قلت مليون مره محدش ينضف اوضتى

ولا يجى ناحية مكتبى

واللى كنت خايفه منه حصل ...

انا
انا
انا

اتجلبببببببت ... بكل اسى وحرقه طبعا

كان ف هنا 15 جنيه متنتورين بين الكتتب راحوا فين ..

ماما :: لا تعليق

قلتلها اخرجى بقى ياماما واقفلى الباب .. ومتدخليش الاوضه دى تانى لحد بعد بكره العصر

احتمال الاوضه تنفجر عما قريب

ده اللى حصلى م 8 صباحا لحد الان 4.15 دقيقه ..

ملحوظه :: الفلاشه فعلا مبتشتغلش .. ااااااااااااااه بقوه وبعنف

ملحوظه تانيه :: اللى حصل فيا ده كتير .. ااااع اهىء اهىء اهىء

ملحوظه كمان :: لعنة الكلب ده طلعت جامده اوى يارجاله .. دى اجمد م لعنة الفراعنه

استودعكم الله ولو مكتبتش حاجه تانى لمدة اسبوع .. ابقوا تعالوا زورونى

ووزعوا ع روح الكلب .. عضم وبتيفور

سلاااام