Monday, January 7, 2008

سجـارة حشيـش لكـل مواطـن




كنت بقلب ف دفاترى القديمه .. لقيت الموضوع ده

ظاهره انتشرت اوى الحشيش ... معاك ولاعه يابنى

ندخل ف الموضوع كل واحد ياخد نفس كبير .. يلا

مش م السجاره اللى ف ايدك ياعم

موضوعنا النهارده جامد اوى والله العظيم جامد بجد ولو فضل ماشيين بالطريقه ده ..
10 سنين بالكتير وهنبقى زى امريكا تحرر دينى وعقائدى وجنسى وفكرى ...

الحياه هتبقى سووده سووده يعنى

مؤخرا انتشرت ظاهرة الشيشه ف اوساط الشباب ..

وانتقلت للبنات الهاى كلاس فعلا مهو يعنى البنات مش نفسهم يجربوا هما كمان .... اشته

الولاد معجبهمش .. هتشيش ايه يابنى متسترجل شويه بقى وتسيبك من كيف البنات ده ..

اديلو حشيش ...

البنات مسكتتش طبعا ...

يعنى ايه الولاد تعمل دماغ احسن مننا اديلو هما كمان حشيش
...
اوك الحشيش والبانجو والهرويين والكوكايين حبوب الصراصير

والطوابع والماكس وكل ده موجود من ايام حتشبثوت يعنى

بس ان الشباب تشربه ف اماكن عامه وتقول ده حريه شخصيه .. لا هنا وستوب

او ان الشباب تردد مبدا انه مش ادمان وانه بيعلى النفوخ وبيخليك تركز والافكار العبيطه ده ..

فبرده هنا وستوب معلش بقى

رجع دماغك لورا .. ركز معايا
يلا مووووف

اضرار الحشيش طبيا واللى انا واصغر حد ف طب عارفها...

هلوسه وده طبعا اخرتها هتحس انك عيل اهبل ماشى مش عارف ف ايه

عدم الشعور بالمكان والزمان يعنى يامحترم لو سايق عربيتك وقدامك كلب معدى وبينك وبينه متر هتحس ان يااااااه ده هناك اهو كلب بيعدى ..

علبال متيجى تفرمل سيادتك هتكون طحنته وعديته وبقيت ف حى تانى اصلا

ومحدش يبصلى ويفتكر الكلب اللى دهسته قبل كده .. ده كان قضاء وقدر مش حشيش وقدر

تدمير خلايا المخ المسئوله عن التفكير والتركيزهتلاقى نفسك اووووو ف الروقان شويه ناسى الشهر ده شهر ايه بعدها ناسى عنوان بيتكم بعدها ناسى اسمك واسم اللى خلفوك وسلملى ع المترو

تدمير القدره الجنسيه ع المدى البعيد مش زى مالكل فاكر يعنى انه تمام واى عريس دلوقت ميقمش من الكوشه طبعا الا وف جيبه حتة الحشيش ... بس صدقنى هتقضيها ليله سوده اصلا عليك وعليها وسلام كبير لام العريس

الاعراض المزمنه الملازمه للادمان .. قىء واسهال وامساك وفقدان شهيه وعنيك تحمر وتخضر وع طول شايلى ف جيبك قطرة بروزالين ب2 جنيه ونص علشان اول متحمر تحط منها ع طول

... لا بس الحركه ده نافعه ف حاجه واحده .. ندارات ريبان اى حد دلوقت تشوفه لابس ريبان اعرف انه حشاش ع طول هععع

تغيير ف الكميكل مدياتورز (( العوامل الطبيعيه )) المسئوله عن الحاله المزاجيه .. شويه مصدع شويه طاير شويه تضحك شويه تعيط يعنى زى ماقلت هتبقى اهبل ...

ع المستوى القانوى انت طبعا بتحط نفسك تحت طائلة القانون


المحيطين ليك ... حاجه لذيذه اوى بتقول ان كل مدمن بيتسبب بادمان خمسه غيره ع طول فترة ادمانه ... وسمعنى سلام احنا شباب الجيل الهابط


الفلوس طبعا بما ان اسعار الحجات ده عليت اوى ولو ان الفلوس مبقتش بتفرق اوى .. كلنا بقينا معانا فلوس وكتير الحمدلله فخلاص البوينت ده مبقاش مأثر


دينيا وده مش هنتكلم فيها كتير ربنا قال متحطوش نفسكم ف التهلكه ... وان اى حاجه تذهب العقل حرام من مسكرات لمكيفات للسجاير نفسها حتى لو فاضيه يعنى ..

يعنى هتقضيها ولعه ف دنيتك وف اخرتك ... قول اميين


طيب بنى ادم حشاش ,,, بنى ادم عينه حمرا .. ايده بترتعش من ان ال اخر ف بداية مرحلة الادمان .. مزاجيا متقلب ... فاقد الشهيه .. يعنى سهل يتعرف من وسط مليون (( الكلام ده ينفع ايام مكان الحشاش او المدمن منبوذ اجتماعيا ))


لكن دلوقت كل ماتعلى وتعلى وتعلى (( ف الكلاس )) كل مانتطاطى نتطاطى نتطاطى (( ف اخلاقنا ))

دلوقت البنت الهاى هى اللى بتضرب .. تضرب حشيش تضرب حبوب تضرب اختها


بس المهم تضرب

وع ملأ سمع وابصار الجميع

ف حمامات الكليه .. ف كافيهات .. ف شارع الحب ف جامعة القاهره وحارة اليهود اللى ف جامعتنا .. الجامعات الخاصه .. النوادى العريقه .. المقطم .. ف كل حته دلوقت زى مابقى التحرش ف كل حته بقى التحشيش ف كل حته


طيب الظاهره منتشره بصوره مرعبه جدا جدا جدا واتكلمنا عن اضرارها بس عايزين نرد ع حاجتين
اللى بيقولوا ان ف دراسه علميه طبيه اثبتت ان الحشيش والبانجو مش ادمان ...

حضرتك لا انت دكتور ولا انت صيدلى ولا انت كيمائى علشان تقول كده ..

انت حتة عيل (( سورى ماهو لو انت راجل مكنتش تقول الكلام الاهبل ده ))

عيل روش طحن تلات اربع كلامه انجلش قرالوا كلمتين ع النت ف موقع الله اعلم اصله ايه وتمويله ايه واللى واقفين وراه مين ...

كلام عبيط واهبل وذاكره قريبه وذاكره بعيده

يااخى هأأأأو لو انت وكل الشباب بيفكروا بالطريقه ده .. يبقى عليه السلامه فعلا


الحشيش ادمان ادمان ادمان ادمان وللناس اللى مبتفهمش عربى

hash is addiction addiction addicition

والله ادمااااااااااااان اينعم اعراض الانسحابيه مبتكنش بالصوره القاسيه اللى بتبقى مصاحبه للهروين والمورفين والكوكايين بس ع المدى البعيد بيبقى ابشع م المورفين يااخى ...

المورفين هيقضى عليك ف سنتين بالكتير.. الحشيش هيحولك اهبل تلات سنين وتعيش بقية حياتك اهبل بقى


وهو ده الفايده من الحشيششششش ليه المخططات الوافده من الخارج


بغرض تدمير شباب البلد دى بقت بتروج للحشيش بالشكل البشع ده لانه فعلا ابشع من الهرويين والمورفين
هيطلع شباب ف البيباى هو هيستفيد ايه لما المدمن يدمن ويموت بعدها بسنتين ولا يروح ف مصيبه ..


تؤتؤ هو يهمه ان المدمن يفضل تاييه كده يتحرش يسرق يقتل يعمل اللى يعمله بقى ...

حرام ياشبابنا ويبناتنا فوقوا وحياة ابوكم بقى لو هتاخدى سجارة الحشيش وتفوقك يوم ولا تعلى دماغك اسبوع بس انتى هتضيعينا كددده هتضيع نفسك وتضيعينا معاكى ارحمونااااااا ...

ارحمى جيل جاى ... ولادك دول هيبقوا عاملين ازاى

اارحموااا جيل راح يعلى ويرفع ف البلدى دى وانتو دلوقت جايين تضيعووها


مش هقلك منظرك وانتى بتشرب السيجاره وبتاخدى النفس كده ولا انت بتشد الشيشه وتسحبها ع صدرك ....

لا باشا يابنى
راعى ربنا فى صحتك ومالك واهلك وبلدك


فوقوااا بقى ... مهو لما يطلع واحد ويقول ايوه ااقبل ان مراتى او اختى يحششوا بكره هيقول ااقبل ان مراتى او امى يمشوا مع اى حد بقى(( وسورى ف اللفظ ))

بس بجد الكلام يحزن ياجماعه ...


زى مافى كتير باظوا فى كتير لسه كويس بس لو مشينا بالمعدل ده


مش هيبقى ف حد كويس والبلد دى هتضيع

ومفيش حاجه تهد حيل البلد وتضرب شبابها غير المخدرات والجنس وماشاء الله الاتنين بقوا موجودين وع قفا مين يشيل


تحرش جنسى .. زنا محارم ... حشيش ... بانجو ...

هما ميهمهمش فلوسكم عندهم فلوس كتييير والله اللى يهمهم يضيعوكم وشويه شويه هيبقى توزيع الحشيش


فور فرررى وهيبقى سيجارة حشيش لكل مواطن
وبدل ماهو مكتوب ف المترو ووسائل المواصلات هيتكتب ممنوع التحشيش ف الاماكن العامه

لووول

زمان كان ف امه عايزه تهجم وتحارب امه تانيه بس الصراحه مش متزكره الاسماء ههههه الظاهر اتسطلت ع الريحه
بعتوا جاسوس يشوف الامه ده حالها ايه راح الراجل مشكور ولقى ولد بيعيط بحرقه اوى طفل ست سنين

... ايه يابنى فى ايه اصل وانا ف مسابقة الرمح ضربت اربعه وضيعت واحده
رجع الراجل قالهم بس عندكم الناس ده اعيلهم بيعيط ع ضربة رمح ضاعت منه هتروحوا فين ..

دول يقطعوكم
وبعد سنين رجع الراجل لقى قعده وفيها رقاصه وغنا وطرب وياليل ياعين ورجع

وقالهم يلا هو ده الوقت المناسب
فعلا هو ده الوقت المناسب ... هو ده الوقت المناسب
مخلاص 6 اكتوبر راحت دلوقت بقى شبابنا بيعمل المستحيل ان شا الله يقطع صوباع رجله ولا ايده علشان ميدخلش الجيش ...
هو ده الوقت المناسب ... هو ده الوقت المناسب


مخلاص راحت النخوه لما كان بس بنت تتعاكس وايه من ع بعد وتسمع كلمه متعجبهاش كانت بتقوم ملحمه شعبيه والكل بيشترك فيها ...

دلوقت ياجماعه بقت البنات بتتخطف قدام عيون الناس ومحدش بيتحرك
ولا دلوقت البنات والامهات بقت بيغتصبوا من اولادهم واخواتهم اللى مفروض اكتر ناس يدافعوا عنهم ويحموهم وهنا وف مصر مش بره يعنى


بس لااااااااااااااا ده مش الوقت المناسب احنا لسه فايقين يامستر جون ويامسزز برايت مش هنسيبكم تعملوا كده بسهووووله


يلا ياشباب اللى يعرف حد بيعمل اللى قلناه ده يفوقه ...


قوموا بقى قبل منضيع ومنلاقلناش مكان فيهاااااا


ده كان موضوع كتبته تعليقا ع مشهد لولد خريج جامعه امريكيه اتسال انت بتشرب حشيش

قال اه .. تقبل ان حد م اهلك يشربوا قال اه هما اوردى بيشربوا ..


لكم منى ارق الامنيات والدعوات


ربنا يحفظكم ويبارك فيكم


فكرة واعداد وتنفيذد/اجدع بنوته

34 comments:

دكتور حر said...

ياااااااااااااااااااااااااه

الحمد لله اخيرا وصلت للنهايه

(:

بداية
أقولك جزاك الله خيرا على تلبية الطلب الذي ادخل السرور على قلبي وربنا يكرمك يا رب

ثانيا

واضح عليكي انك بتاخدي
community
اليومين دول

(:

ثالثا

عرضك للموضوع جميل وشيق لكن المشكه ان الموضوع نفسه محزن ومؤلم

أتمنى أن تصل رسالتك
ويؤدي الآباء في الاساس دورهم
اللي المفروض ان كل واحد يربي اولاده صح
ويعلمهم دينهم تمام

انما المشكله انك تلاقي واحد المفروض انه رجل وأب يقابل بنته اللي عندها عشرين سنه مثلا في الشارع لابسه بنطلون ضيق وكاشفه شعرها
ويقولها ايع الجمال ده
بنت مين الحلوه دي
وفرحان بيها

وعلى كده كتييير
لحد ما تغير الحق والمعروف عند الناس

لا ويتقال على الملتزمه او المتدين شاذه ومتخلف
وهو ده اللي قال النبي عليه
عليه الصلاة والسلام

وسيعود الاسلام غريبا
فطوبى للغرباء

مرة أخرى أتمنى ان تصل رسالتك
وربنا يجزيك الجنه
ولك تحياتي

appy said...

يانهاااااااااااااار ابيض
انتى عارفه انتى فعلا اجدع بنوته كلام كله مظبوط
اما بقى بالنسبه للحشيش يا سعاد فمعروف ان الزيت بتاعه بيطول شعر البنات لما ندهن بيه شعرنا مش نتعاطاه
بس انا زعلانه منك والله الشيشه مش بداية ادمان عيب عليكى دى بس بتسلى ههههههههههه
المهم والله كلامك كله صح وبعدين الثقافات دى جايه من برة والتقليد الاعمى للغرب وعلى فكرة فيه ناس كلاس وولاد ناس محترمة مش كل الكلاس يعنى بيسموك ولا حاجه فيه ناس كويسه بس التقليد اللى بين الشباب هو اللى مشكله وبنطالب بحريات فى الهوا وكلام وشعارات واحنا مش فهمين معناها
ربنا يقويكى يا دكتورة والله

3ala asm masr said...

مش كده ولا ايه؟
لاء كده وابو كده
على فكره انا فاكره ان انا اتفرجت على البرنامج اللى بتقولى عليه ده
امريكا بعتالنا دولارات بتقولك عالى الطاسه
عايزانا نديها مخدرات ونركز فى الرقاصه

زُمُرده said...

لولولولولول

الحمدلله اخيرا وصلت للنهايه بس ايه كل شويه يوصلني تعليقك وكل ما لجي اعلق عندك الجهاز يهنج
زي ما يكون متآمر عليا

بوست في الجون جداجدا
موضوعك مهم اوي واسلوبك اكتر من شيق
بس للاسف في ناس مٌغيبه
مش قادره تفهم هما بيسهلوا لينا الحشيش ودخلوه ليه

هم مش عايزين يموتوا شبابنا لاسمح الله
هم عايزين يشوفونا شباب عاجزين تايهيين ضايعين
نستحل الحرام ونستسهل الضياع
ولما يبقى كام مليون شاب وفتاه ضايعين بالشكل ده احسن ما يموتوا

أهم عايشين يجروا غيرهم لطريقهم وعاله على المجتمع لأن اكيد مش هيشتغلوا وهيجيبوا اللي يعلي دماغهم بالسرقه والحرام

وسلامااااااااات يا بلد
لو نسينا دورنا احنا كمان
---------------------------
خدي نفس وبراحة ع مدونتي دي مش ادك
وحده واحده عليها

نورتيني يا اجدع واحلى سمسمه

S H A H said...

اجدع بنوتة
ايه بس المدونة التحفة دي؟!؟
ومتقوليش كمان انك انتي اللي مصمماها, يلا اصدميني

كلامك عاجبني جدا و خلاني اعمل دماغ
و المدونة عايزالها قاعدة

تقبلي مروري

سلام مؤقت

مروة الزارع said...

مرسى يا اجدع بنوتة على المعلومات دى

فعلا الحشيش والمخدرات بقت شئ عادى جدا

انا خايفة انى الاقيهم بقوا يبيعوا الحشيش فى السوبر ماركت عادى ولا فى كشك السجاير

بست رائع جدا

تحياتى

Mask said...

طب ممكن ندخن حشيش سلبي ؟
:)

انا دخنت حشيش سلبي في فرح
عرفت بعدين ان اللي قاعد جنبي كان هوه اللي بيبيع الحشيش للفرح
يعني انا كنت قاعد جنب الراس الكبيره
والراجل كان بيعمل تست اختبار جوده منتج قبل ما يبيع
ياااااااااااااااه
اليوم دا كنت حاسس اني بحب العريس قوي
متفهمنيش غلط
والعروسه كمان كنت بحبها قوي معرفش ليه
LOL

تصدقي وتؤمني بالله يادكتوره انا حزين
هقول حسبي الله ونعم الوكيل
ربنا ينتقم منهم
ربنا ينتقم منهم
بنا ينتقم منهم

الراقص مع الذئاب said...

السلام عليكم
انا بعت رد مش عارف وقع في السكة باين
المهم الموضوع جميل بس طبعا الحجات ديه بيبقي ليه جذور وموااااااااال طويل
مين اللي في مصلحته ان الشعب يفضل مغيبب...وخصوصا الشباب

دي خطط صهيونية بتشتغل علي المدي البعيد

بس اللي مجننني ان الناس ديه بتجيب الحشيش منييييييييين

وبعدين ايه حكاية حارة اليهود؟؟؟
اوعي تكوني جامعة الزقازيق
اصلي خريج هندسة الزقازيق
ايام مش حلوة الله لا يعودها تاني

جزاك الله خيرا علي الموضوع يا دكتورة

دمتي في خير

السـيد شبـل said...

موضوع هايل وتمنياتى بالتوفيق






للتعرف على اهم مبادره للتقريب بين الاخوان والناصريين وايضاح صوره كامله حول الاشتراكيه الاسلاميه

السيد شبل ... بلا اسم

www.bela-esm.blogspot.com



لكم خالص تحياتى وتمنياتى بالتوفيق

السيد شبل

بت خيخة وأى كلام said...

اولا بعتزرلك عن عدم زيارتك فى الفترة الاخيرة
انا جيت ولاقيت ان واحدة صاحبتك توفت اسمها يمنى الله يرحمها
ولقيت النيو لوك بتاعك الجديد
مبروك عليكى
ولاقيتك كاتبة كلمة حق فى الريس مبارك
انتى حرة
ولاقيتك كاتبة البوست ده عن الحشيش
برافو عليكى
وبجد من كتباتك خلتينى افكر فى كذا موضوع كنت عايزة اكتب عنهم زمااااااااااان اوى
وانتى هتكونى السبب فى كام بوست هاكتبهم قريب
شكرا ليكى
اختك خيخة

مطرح ما ترسى....دقلها said...

فعلا واضح انك بدأتى تاخدى شرعى ..
وطبعا كمان شوية هتقولى انك عاوزة بقى تتخصصى شرعى وبتاع..

وبعدين بتتكلمى على ولاد الناس الهاى لايف ليه ..
هو الواحد لازم سيرته كدة تبقى على كل لسان!!!!

ما العيال كلها محششة وزى الفل .. ودماغ فى البتنجان .. وعااااادى..

طيب ياستى ..
اسلوبك روعة ..
ولو استمريتى فى التحسن الرهيب ده ..
هتنافسى معاطى واحمد رجب وبهجت والناس دى..

تحياتى

عاشقه الفردوس said...

كده كده يااجدع بنوته

فعلا والله بقت مشكله
بس متخافيش والله باذن الله الشباب هيرجعو
تفاءلو بالخير تجدوه

باذن الله طول افي ناس كويسه وبيهمها دينها واخلاقها ومبادئها ذيك طول ماتتاكدي باذن الله ان كل حاجه ان شاء الله هتتصلح

كنتم خير امه اخرجت للناس تامرون بالمعروف وتنهون عن المنكر

سلام يااجدع بنوته

DR.HAMAS said...

ربنا يعافينا يا أختنا الدكتورة

و يعافى كل شباب بلدنا يا رب

موضوع ظريف جدا ربنا يكرمك

مش كدة و لا ايه ؟؟؟


هههههههه

جزاكم الله خيرا


د.حمـــــاس

د/اجدع بنوته said...

لا باخد رمددد ههههه وامتحانه يوم الحد دعواتكم يارداله

انا اعرف بنت باباها مبيقلهاش غير انا بنتى موزه

هههههههههههههههههههههههههه

يلا ربنا يهدى الجميع وشكرا ع مشاركتك يا دكتور محمد

د/اجدع بنوته said...

ابىىىىىىىى
ياسلام والله الحشيش بيطول شعرنا

انتى بتكلمى جد ولا بتهزرى


ده لو ع كده انزل اشترى فوراااا والله

ههههههههه

ربنا يخليكى يااابى

د/اجدع بنوته said...

اتفرجتتتتتتتتتى

ومتشلتيششششششششششش

انا كنت خلاص متمالكه اعصابى كنت هضرب دماغى ف شاشة التلفزيون

بس افتكرت انه مش هيخسر حاجه ابويا هو اللى هيدفع التمن فعدلت عن هذه الفعله

د/اجدع بنوته said...

انتى اللى منورانا يازمرده

ولو ف ناس نسيت فدورنا نفكرهم

مش كده ولا ايه

د/اجدع بنوته said...

شاااه ايران ياجدعااان

شهرااام باشا منورنا

ملحوظه اسجل اعجابى باسمك جدا

اسم كله هيببببه

واه انا اللى مصمماها شوية عك كده م اجتهاداتى

د/اجدع بنوته said...

وحياتك يامروه 10 سنين وهتلاقيه ف متناول الجميع

زى ماقلت سجارة حشيش لكل مواطن

د/اجدع بنوته said...

ماسسسك جبت السيره لييييييييه

ماانا كمان دخنت حشيش سلبى مره انا وماما ههههههههه ف تاكسى

بس الصراحه دمااااااااااااااااااااااااااااااااااااااااغ

وكل منفتح الازاز الراجل يبص ف المرايه وعينه حمراااااا ويقول اقفلوا الازاز

وانا اترعبببب هههههههه كان يوم احمر والله

بس الحمدلله نجينا منه حتى لما قلناله خلاص هنا هننزل

قال لا انتى قلتى الحته الفلانيه لسه بدرررررى

مش كان ناوى يعتقنا لوجهه الله

بس راجل محترم عند الحته اللى قلتله عليها ونزلنا

بس ملحوظه .. ريحته حلوه اوى ع فكره مش زى السجاير العاديه

الظاهره الحاجه المتكلفه بتختلف برده

وربنا ينتقم منهممممم يااااااااااااااااااااااااارب

د/اجدع بنوته said...

حظابطططططططططط بعت رد ووقع منه

ازاى اصلا يقع .... اكيد وقع م الهيبه ياباشا

اه انا طب الزقازيق .. بس ليه ايام مش حلوه

ده انتو هندسه اعلى جو واعلى دماغ واعلى حياه

بنحقد عليكم اوى

جزاك الله خير ع الرد ..

ودوركم بقى ياحظابط .. احنا نكتب

وهما يشربوا

وانتو تقبضوا عليهم

لووووووول

هذكا هى المنظومه

د/اجدع بنوته said...

ميرسى يادكتور سيد

والله انا روحت المدونه لقيتك ضفت كزا بوستتتت

ماشاء الله ع النشاط تتش وود

هروح اعمل سندوتشين الفول اللى هما ومج الشاى اللى هو

واجى احلى بالمدونه

تحياتى

د/اجدع بنوته said...

ام شيكووووو ف بيتنا يامرحبا يامرحبا

ربنا يرحمها يااارب

واضح انك بتعزى الريس اوى فعلا

اى خدمه اهو بديكم خلاصة خبرتى

بس ليا شرطططططط

تكتبى ف الاول ..

استلهاما م اجدع بنوته

الحقوق الفكريه والملكيه بت خيخه واى كلام

نورتينى ياام شريف

د/اجدع بنوته said...

هو انا عامله البوست علشان تتنبأوا انا باخد راوند ايه دلوقت

ههههههههههههههههههههه

ميرسى ياسيدى وانافس احمد رجب ..

متتكلم ع قدك ياكريمىىى

ان كان اللى بيتكلم بيثبت

فلازم يكون الكلام ف حدود المعقول

علشان اللى بيسمع يتثبت

شكرا جدا ع التثبيته وتحياتى

د/اجدع بنوته said...

باذن الله ياعاشقه

متفائلين خير والله

وشكرا ع المرور

د/اجدع بنوته said...

وجزاك يا دكتور حماس

وجزانا جميعا يارب

mahmoud farag said...

ايه يا بنتي الموضوع الجامد ده؟؟

من كلامك باين عليكي في رابعه ... ربنا يقويكي .. خدي بالك من الشرعي والكوميونتي ... الباقي سهل

افتكرت فيلم الكيف لما قريت البوست بتاعك وفكرت هل الحشيش لوحده ادمان؟؟ ولا اللي بيخلطوه عليه من حبوب هيا اللي بتخلي الادمان ده حتمي ؟؟

الحشيش لوحده علي فكره البيوور يعني .. غاااالي جدا وأعتقد انه المشكله في الاضافات اللي بتتحط عليه .. ده توقع لأني مجربتهوش خالص هههههههه

المهم ان دعوتك جميله ولكن مكانها مش هنا

هنا فيه ناس بتفكر .. ناس بتكتب .. ناس بتقرا .. ناس مثقفه وتعليمهم راقي .. أتمني دعوتك دي تبقي في المكان الصح .. مجله في الجامعه أو تكون في ندوه في كليه وقدام الشباب اللي عندهم الأفكار الغريبه دي

شكرا كثيرا لكي

Dr.Mohammed Gohary said...

لا بجد دكتورة شرعي وسموم يا ولاد

عرض اكتر من هايل
احني رأسي وأرفع القبعة-البرنيطة يعني-احتراما لسيادتك وللموضوع الهايل

مستني جديدك دايما يا سمسمة
أقصد يا أجدع دكتورة

د/اجدع بنوته said...

دماغ يامحموود

وهو احنا بناقش هنا الحشيش ادمان ولا وهو بيووور مش ادمان

دماغ انت ههههههههه

دعوتنا دى اتعملت فعلا ف اماكن عامه

وف نشرات واتوزعت الحمدلله

بس احنا بننشر الرساله وبنحاول نغطى اكبر شريحه ممكنه

د/اجدع بنوته said...

ميرسى جدا ياجوهرىىىى

هترفعلى البرنيطه مره واحده

عؤبال يارب مترفعلى الجزمه ... علشان اخدها تزكار

الجعرّ و أبورمّانة said...

فعلا موضوع الحشيش ده زاد عن حده أوى .. وخصوصا ان الكوين دلوقتى بقى بيعمله 100 جنيه واكتر .. ومابيكفيش غير 3 ودجات وكام جوينت .. يعنب موت وخراب ديار

هههههههههههه بهزر

بس واضح ان الكوميونيتي واكل عقلك خالص ..

تعرفي ايه الحل ؟ ان كل أب شاكك ان ابنه بيشرب حشيش يستنّاه في البيت وف ايده ابوبة تحليل البول .. لاتقوليلي برازولين ولا غير برازولين - صحيح انتى عرفتى الموضوع ده منين ؟ -

تحياتى
أبورمّانة

anwer said...

اولا احب اشكرك علي المدونة الجميلة دي
اول مرة ادخلها و تقريبا اقربت اخلصها اه
ثانيا:عندك حق في كل كلمة قلتيها
بس في حاجة استوقفتني بجد
بقالي كام يوم بروح العب استيمشن اسبوع اتنين كدة
في كافية معرووف اوي في اسكندرية و القاهرة
بس مكنتش متخيل كمية البنات دي كلها الي بتدخن
و مش كدة وبس
كنت بروح بليل فالموجودين بنات كبار استايل و بتاع عادي الي مخلي الكرسي اتنين متر و هي لازقة في الواد مش حيخليني استغرب علي التفاحة و السجارة و مش بيبقو حبيبة بس و شلة مع بعض 3 بنات وولدين كدة وصحاب مش اكتر منا برمي ودني نياهاهاهاهاهاا
و بيتعاملو مع بعض زي مبعامل لاشين صاحبي بالظبط من زغد و خبط ومتتطلب الكوول مع مانشط في صدره
بقيت اروح الصبح و الكافيه ده بالقرب من او بصراحة اقدام كلية فنون جميلة
البنات بتوع فنون جميلة
بجد لة شفتهم في الشارع ماشين عالي الرصيف انزل من جني العربيات علشان معكرش صفو ادبهم و اخلاءهم
كل واحدة ماسكة سجارة و الي بتشيش
و الحياة بييس مش ناقصها الا دبابايس
و اخيرا البنات الي شغالين جوة
مرة خدت بالي و هما بيغيرو شفتتات و مروحين انهم محجبين
بيقلعو الحجاب علشان يشتغلو و دي في حد ذاتها قصة تانية خاااالص
و مصيبة في حد ذاتها
يعني دول بمازاجهم
لكن دول متعرفيش اه الي خالها تقلع الحجاب
انا اسف علي الأطالة وصراحة مستخصر الكومنت
كان ممكن يبقي بوست بس مش خسارة في مدونتك الجميلة

Anonymous said...

I like your blog
借錢 借貸 票貼 當舖 當舖 票貼 借款 借貸 借錢 票貼 二胎 週轉 融資 借錢 借貸 票貼 借貸 當舖 票貼 借錢 借款 借錢 借貸 票貼 借貸 借錢 票貼 當舖 借貸 票貼 借錢 借錢 借貸 票貼 貼現 貼現 借貸 票貼 二胎 借錢 借貸 借款 二胎 二胎 借款 借貸 借貸 借錢 當舖 借錢 借貸 票貼

Anonymous said...

借錢網 借錢網 借錢網 借錢網 借錢網 借錢網 借錢網 借貸票貼急救網 借貸票貼急救網 借貸票貼急救網 借貸票貼急救網 借貸票貼急救網 借貸票貼急救網 票貼指南 票貼指南 票貼指南 票貼指南 票貼借貸急救網 票貼借貸急救網 票貼借貸急救網 票貼借貸急救網 票貼借貸急救網 票貼借貸急救網 借貸指南 借貸指南 借貸指南 借貸指南 借貸指南 借貸指南 支票貼現 支票貼現 支票貼現 支票貼現 借錢網 借貸票貼急救網 票貼資訊網