موزتى .. اعرى وارفع فيها مهما تطول السنين

السلامو عليكم ..

وعليكم السلام .. ازيك ياسمسمه يااختى

اهلا ياحبيبتى انشالله يخلهملك

النهارده جايه اكلمكم عن الاعداء .. الاخوه الاعداء

اولا بنسميهم اعداء ليه ..

لان لما تبقى حد نايم 12 ساعه كل يوم فانت عدو

ولما تبقى حد بتخرج برا بيتكم تتسرمح بواقع ساعتين يوميا

فانت عدوو

ولما تبقى حد بتنزل الجامعه مرتين ف الااسبوع المره ساعتين

فانت وبكل تاكيد عدو

وعندما تزيد عدد مرات ترددك ع كافتريا الكليه بواقع المره ربع ساعه ..

فانت ومما لاشك فيه عدو

ولما تزاكر قبل الامتحان بيومين وتزاكر عشر صفحات و8 منهم يجى الامتحان

ولما تبقى لا تفقه الفرق بين الصفحه الرئيسيه لجريدة الاخبار والاهرام ..

فانت بالدليل القاطع عدوو

وعندما تمتلك حساب ع الفيس بووك والهاى فيف والسكاى بى والياهو والهوت ميل والاى ام

.
اذن فمرحبا بك عزيزى العدو .. نحن نكرهك بشده

كيف تعرف العدو م ع بعد 30 متر ..

..

للعدو مواصفات مميزه ..

تجده مهندما .. الى حدا كبير .. قد يجعلك تفكر .. هو النهارده العيد

ولا الريس جاى .. هو ايه العيال النضيفه دى ع طول بتيجى م فين

تجد حذائه كلاسيكى لامع .. لتتساقط عليه احلامك واحلام بلدك كلها وتتكثف وتطلع تعمل بلونه

وتنفجر فوق نفوخك تحت اشعار اخر

تجد شعره .. مرتب خصيلات خصيلات تكسووه طبقه سميكه لامعه

لتجد نفسك ع وشك ان ترى انعكاس نفسك ف خصيلات شعره

لترددها ف نفسك .. ايه العواكس دى ياولاد

..

عندما تقترب م العدو .. وتقترب اكثر وتتوغل ..

تجد العدو مصاحب بهاله م الروائح الجميله جدا

فمتبقاش عارف .. امه بتغسل بداونى نسيم الصباح

ولا بيغسلوا باومو .. فتطرد م مخيخك الصغير هذه الافكار

وتنتهى لاستناج واحد .. ايه العيال اللى راسمالها منظرها دى

(( ماهو مش حيلته غيره بعيد عنك ))

..

عندما تنظر بغته ف عين العدو ..

تجده سعيدا ببلاهه تكاد تتناثر اشلائه امامك معبره عن سعادتها المطلقه

لتخرج لك لسانها وتقولك .. يامواطن يابائس

(( انا بائس يااشلاء مش لاقيه اللى يلمك ))


كيف يمضى العدو وقته ..

يستيقظ العدو صباحا (( الساعه 12 ف ادان الضهر يعنى ))

يتذكر انه لاطع البت مها مستنياه ف مدرج اداب .. ليرتدى البدى الاسود والبنطلون اللو ويست الرمادى

والشوز الكلاسيكى البحت .. ايون اللى بتتكاثف عليه احلامك ده

ينزل فورا .. ويصل للكليه

ما بين نزوله ووصوله .. فارق زمنى ساعتين

امضاهم ف التلطيع مع كل م لمحتهم عيناه ف الشارع

ليدخل الجامعه

احمد يامااااان اشوفك امس

وليد استنيتك بروح امك

صباحو يازياده ..

بهجت ننوس عينها فينك يابرنس

مها ازيك يامها .. قلبى يامها .. نور عينى يامها

صافى ارحمينى م نظراتك .. دوبت ف حبك دوب

ايه ياشاهى انتى حلويتى كده ليه يابت .. بالبرسيمى اللى انتى لبساه ده

يذهبوا جميعا للكافتريا .. ثم الى جنينة الجامعه

ليتبارواا ف المسك واللمز والغمز والكوشتينه والشطرنج وسلطح

ليعلنوها ف نفس واحد .. الحرس بيطرد الناسس ياجماعه يلا نقوم

وهذا هو تقليدهم الدراسى البحت مبيمشوش الا لما الحرس يطردهم

قد ايه حرص ف طلب العلم ..

يخرج الاعداء بعد يوم مضنى يصلوا الى منازلهم

ومابين فتحهم لباب الشقه وبين خروجهم م الجامعه ساعتين فارق زمنى ايضا

امضاهم كلا ع حده ف التلطيع ما بين المخطره والمعاكسات

يتغدوا ويريحوا ساعه بعد هذا المجهود القاتل جداااا

تدق الساعه ال 8 ف اذان العشاء .. ليخرج نفير الحرب .. توووووووووووووووووت

يتسارع جميع الاعداء فردا فردا ليلبوا نداء الوطن

وع انغام والله وعملوها الرجاله ووقفوا وقفة رجاله ...

يتبارى الجميع ف وقفتهم ع ناصية الحى ..

اللى بعربيته واللى بعجلته واللى برجله

المهم ان الكل بيوقف بما اوتى م قوه .. ف سبيل الله

خمس ساعات م الكلام والاراء الجباره

والتى لو كانت مصر امراه لها اذنين وسمعت كلامهم بصراصير ودانها

كانت خلعت هدومها ف ميدان عام ورقعت بالصوت الحيانىىى

ف نهاية الوقفه .. يتجمع الاعداء ليحزنوا حزنا شديدا بتجاهل

المؤسسات الدوليه والوطنيه ليهم ولارائهم .. واللى لو بس انصتوا لارائهم وخبرتهم

لكان زمن بيوت مصر كلها مفتوحه لمزاكرة الكميا واللى يسقط يزاكروله احياء

.. يترك الاعداء الناصيه بعد ان تتجمع حولهم كلاب المنطقه معلنه

بان خلاص وقت البنى ادمين خلص .. متغوروا ف داهيه منك له بقى

ليخيم الظلام ع المكان .. لا تضيئه سوى لمحات م اشعه حمراء

ناتجه عن احتراق وريقات التبغ الباقيه ف عقاب سجاير المالبرو وال ام

ليذهب كل عدو الى بيته يفتح جهاز الكمبيوتر خاصته ..

ليتفقد احوال المزز النتيه الجامدين فحت ..

ويتعرفلوا ع كام مززه لتوطيد العلاقات المصريه بالعالم كله م الجنسيات المختلفه

م الفيس بووك للهاى فيف للهوتميل لشات مصراوى ...

انا هانى .. م المعادى وبدرس بزنس ادمنستريشن

ف نفس ذات اللحظه يفتح كونفرسيشن اخر .. مع اخرى

انا تامر .. لبنانى وجاى سياحه كام يوم ف مصر

ليسطرها ككومينت ع صوره لاخت كوستاريكيه ترتدى م الملابس ما لا يكفى لستر وليد يبلغ م العمر 20 دقيقه

انتى جامده كده ليه ..!! .. (( مش بقلك بيدعيم العلاقات ياعم ))

لينتهى يومه مؤسسا جروبا جديدا ع الفيس بوك بعنوان .. للتعارف الشفاف فقط

ولا اخفى عليك سرااا الالتزام الدينى .. فهم لا يناموا مطلقاااا

الا بعد ان يسمعوا اذان الفجر كاملاااا وينتظروا اقامة الصلاه .. وبعدين ينامواا

.............

دول اعدائنا واعداء بلدنا .. وللاسف هما اخواتنا واصحابنا واولادنا وشبابنا

دول اللى جايبنا وراا .. ودول اللى بيهم ممكن نطلع قدام

ده شاب مصرى ..

فرفش تعش تنتعتش ..

ناسيا او لست ادرى متناسيا ..

ان هناك مايسمى بالدين وتعاليمه ..

او مايسمى بالاخلاق والاخلاقيات ..

او مايسمى بالسلوكيات وحرمة الطريق ..

كل مايشغل باله .. الحرمه .. بس حرمه م لحم ودم وعضلات

يأكل ويثرثر وينام ...

ارى م الظلم للحمار .. ان نطلق عليهم هذا المسمى

فالحمار يبذل م المجهود ولو تركنا له الفرصه يفكر ..

ستخرج منه باراء تجبرك ع احترامها ..

بعكس التفاهه التى يحيى ويموت فيها هؤلاء الشباب

واللى بقعده واحده معاهم ..

ان لم تخرج م تحت ايديهم .. mental retardation

ابشررر فانت تملك م القوى العصبيه والنفسيه مايكفيك لتحمل ضغط

كوندليزا ريس وعلى مصيلحى ونيكولا ساركوزا مع جورج بوش .. ان يحادثونك ف وقت واحد

...

مش بقول ان الكل كده طبعا .. بس الاغلب بقى كده

قد ايه بفرح لما بشوف شباب ف سنى او اصغر لسه بيفككر ولسه بيتكلم كلام

يفرض عليك احترام عقليته وتفكيره ..

يارب يهدى جميع شبابنااا ويبارك ف الكويس ويزيدهم يارررب ..

ملحوظه ...

والنبى شباب بالمواصفات دى .. يغنولهم خلى عيونكم عليها خلى ايديكوا ف اديها يامصر تعيشى لينا

ولا اخفيكم سراا ..هما فعلا بيسموعها وحافظينها عن ظهر قلب
.
.
خلى عيونكم عليها خلى ايديكوا ف ايديها يا موزه تعيشى لينا

ساعة الجد تلاقينا شيلين مطوتنا ف ادينا حالفين للى يعاديها

موزتنا .. رجالتك مستعدين ..

موزتى الود ودى .. احضن ايديكى بيدى

واشيلك جوا عينى .. اصل انتى غاليه عندى

موزتى الله حاميها .. حاطين ايديهم عليها ..

هنعرى ونرفع فيها مهما تطول السنين

موزتى اجمل جميله .. بلنسز زرقا وكحيله

موزتى كريمه واصيله .. لو رن ع تلفونها مين

...

باخسارة الرحله ..

شكراا

ولكم منى ارق التحيات

المؤامره .. كلكم عليا ولا ايه

العواف

..
يحكى ان ان وان ... الصراحه

.

مش عارفه اول مااقول الصراحه دى بحس انى هكدب ههههههه

الصراحه الصراحه .. انى حاسه بانفراجه ف شعورى الوجدانى

معرفش ده علشان خلصنا الراوند التانى

.

ولا علشان حضرت البرزنتيشن بتاع روند 1 واتاكدت ان احنا شغلنا ف الكوبسى كان برقبتهم

ملحوظه .. لو انت مش ف طب متحاولش تفهم السطر اللى فوق ده

ملحوظه تانيه .. لو انت ااقل م 4 طب فبرده متحاولش تفهمه

بس المهم انى حاسه بانفراجه وخلاص ... ديمها علينا يارب انفراجه

.

وبارك ف زاويتها الحرجه

الجو برد جدااا ... النهارده واحده بقولها الجو برد بقى احنا ف طوبه

قالتلى اه الرطوبه عاليه اوى

...

مرضتش طبعا اوضحلها الكلمه علشان البنت متتقهرش ع سمعها اللى راح ف الكليه

ولا نظرها ايام مكان عندها نظر .. كله راح كله اتكسرررررررررر

مش عارفه ياجدعان انا حاسه ان احنا كل مبنكبر سنه ف الكليه

.

كل مبنكش وبتزيد علينا ملامح الشيخوخه

ندخل بقى ف الموضوع

حاسب ياابنى وانت داخل .. خد بالك م البلاطه المكسوره

صلو ع النبى .. امبارح بليل كنت ف حديث شيق مع ناس مايتخيروش عنكم

ثقافة ايه ورجاحة عقل ايه وكاريزما ايه وكيبورد ايه

...

الواحد منهم يتفك بتلاته نايتى

كنا بنتكلم عن نظرية المؤامره .. هل فعلا الشعب المصرى

بقى مريض بالمؤامره

طبعا مش محتاجه اقلكم .. احم احم ..

انى انا اللى افتتحت المناقشه وانا اللى رشيت الميه

...
وكعادتى مع كل فكره بطلقها م نفوخى العامر بالافكار الشاذه

.

بتقابل باستهجان شديد م كل المحيطين بيا

فالصراحه .. انا خدت بالجزم .. لاااااااااا مخدتهاش ع دماغى

عيب ياشخص تظن فيا كده .. اخدتها تذكار طبعا

ليه دلوقت ....

تقابل اى حد ف الشارع يقلك اصل البلد .. اصل ولاد الحرميه .. اصل اصل

ابنك لو سقط ف الامتحان هيقلك يابابا اصلها كوسه يابابا

عماره وقعت اصل الحى ومهندسينه واكلينها والعه يابيه

واحد مسلم او مسيحى غير دينه .. اصل معرفش ايه والدول الخارجيه

.

وتمويل خارجى ودسائس وفطير وباتيه بالجبنه

روحت محترم تجدد رخصة عربيتك الغير محترمه لقيت عليها غرامات .. اصل ولاد الحرميه

ابن العميد بتاع كليتك طلع اول دفعتكم .. اصل ولاد ستين ف سبعين فاكرينها وراثه

الاهلى خسر الماتش

..
يطلع المدرب يقولك .. اصل ياجماعه الظروف الجويه كانت غير ملائمه .. اللاعيبه كانت لابسه شورتات خفيفه

تطلع اللاعيبه تقول .. اصل والله الحكم ابن الظالمه .. كان لينا ضربة جزاء مستحقه

يطلع الحكم يقولك .. انا واثق م نفسى .. دوروا ع الباقيين

تطلع الظروف الجويه تقولك .. لا تكشف راسها وتدعى عليهم كلهم

ليه دايما نظرية المؤامره متحكمه فينااااااااا

حضرتك شلت ماده .. اصل الدكتور ف يوم عديت وبصتله بصه م تحت النداره فهو اتغاظ منى وقال لازم اشيلك

حال البلد وحش .. اصل حكامها ومسئولينها ناهبينها

ست ام احمد اتخانقت مع جوزها .. اصل نفيسه جارتهم عملاله عمل .. او اصل اخته الناقصه مقوماه عليها

الملكه ديانا ماتت .. اصل معرفش مين دبرلهم الحادثه

فيلم الممثله هانم طالعه السلالم فشل .. اصل الفنانه هايدى اللى هيا والحته الجونيه

.

وست ابوها تئامرواا عليها وضيعولها الفيلم

.

لقيوا افلام ومشاهد مش ولابد للفنانه نازك اللى ماشيه بشرفها ..

.

اصل الفنانه التانيه اتغاظت م نجاحها المبهر فحبت تضيعها فتئامرت عليها

.
ياخوفى ف يوم م الايام يجيلى عيان .. اقوله مالك ياحاج .. يقولى اصل جسمى متئامر عليا .. اعضائه عملت ثوره
.
دور وفتش ف نفسك انت كمان .. هتلاقى عدى عليك موقف ع اقل تقدير .. رجعت وفسرته نسبه للمؤامره

.
ليه لما حاجه تحصل منقولش .. قضاء وقدر .. او احنا غلطنا ف كزا علشان كده حصلت الحاجه دى

مش اول الاسباب دايما نلجأ للمؤامره

ليه منفكرش ف الحاجه م زوايا كامله ناخدها فوميين تفكيرر لحد متقرح ف ادينا

.
ولا هل بنستسهل ونشترى دماغنا

..
معاك ياباشا ان ف فعلا حجات بتبقى مؤامره ونص

.
ع راسى ياباشا .. ع راسى م فوق كمان

.
بس مش كل حاجه بتحصلنا تبقى مؤامره

.
هل الشعب المصرى م كتر اللى شافوه ع وشك انحدار نفسى

واوله هو المؤامره

..
هل ف يوم م الايام هنمشى .. وكل واحد بيتلفت للى جنبه

وخايف يجى حد م ورا يضربه ع قفاه

..
هل اى حد هيحط ايده ف جيبه هتنتظر انه يطلعلك مطواه

..

وهتفاجا انه مطلع المنديل يمسح عرقه

علشان هو كمان نظرية المؤامره هدتله حيله وجابتله هرنيااا

هل تحديات المجتمع والمعوقات والصعوبات اللى عايشنها

.

والزمن اللى بقى ع رقبتنا زى السكينه

بتنحر فينا وف اخلاقنا وف صحتنا وف نفسيتنا

..
ومما لاشك فيه انها بتنحر طبعا ... زى السكينه ف الحلاوه

.
ع فكره

..
ف ناس وحشيين بتحركهم اغراض دنيئه واقفين ع باب المدونه

بيضربوا اى حد يدخل عندى

..
علشان كده مش هلاقى منكم اى كومينات ياحبايبى

شوفتوا المؤامره

.
بلد بتاعة مؤامرااااااااااااااات صحيح

كلكم عليااااااااااااا ولا ايه

انا عايزه احب واتحب

اضع بين ايديكم اليوم .. موضوع غريب جدا

ده حديث دار بينى وبين احدى زميلاتى فى الكليه المصونه

وانا استأذنتها انى انقلهلكم هنا فردت وقالت

,, وريهلهم يمكن يحسوا باللى انا كنت فيه ويعرفوا فضلك عليا ,,

لا فضل ولا حاجه ياشيخه عيب تقولى كده .. احنا ولايا زى بعض لوووول

البنت عباره عن قنبله موقوته كانت على وشك الانفجار فعلا

وهذه البنت مقدما كده مش انا وربنا

كل ماكان يشغلها ف الحياه انها .. عايزه تحب وتتحب

البنت ع درجه كبيره جدا م التدين وحتى علاقاتها بزملائنا الاولاد ف الكليه

محدوده جدااا تصل الى العدم اصلا وملهاش لا ف اللف ولا الدوران

كعادة كل بنات كليتنا المصونه

بس برده كل انسان منا وليه مشاعيره

هو الانسان ايه غير بنطلون وتيشيرت وشوية مشاعر فوق بعض

تحكى هذه الفتاه فتقول ..

شايفه ياياسمين .. كل البنات اتخطبت وبقت ماشيه مع خطيبها ورايحه وجايه

ويتصل يقولها وحشتينى وهى تعمل نفسها مكسوفه وم جواها هو واحشها مليون مره

يقولها بحبك .. ويجبلها ايس كريم

,, ايون انا عملت زيكم اول ماسمعت ايس كريم ده جبت الارض م الضحك ,,

قلتلها ياستى لو ع الايس كريم منتى كل يوم بتاكليه معانا

فردت وقالت .. وهى خلقكم دى خلللق .. قلتلها اه فعلا الواحد محتاج يجدد مناظر

الحب ده .. ااااااااااااااااه .. ولقتلكم عنيها دمعتت .. وع وشك الانفجار فعلا

فاخدت الموضوع بجديه وقولتلها قمستك ونصيبك هيجولك اكيد

وحوشى عاطفيتك اللى هتغرقنى ده ..

قسمتى ونصيبى ماكل يوم بيجولى .. بس بابا الهى ... ربنا يهديه

المهم تبينت ان البنت طبعا كحال كل البنات بيجيلها عرسان طبعا

والسيد والدها المحترم بيطفشهم بكل سلاسه حتى بدون الرجوع عليها

بحجة ان لسه قدامها كتير ف التعليم ..

الخلاصه بقى ,,

ان البت هتحب ع روحها .. وبتقف تبص لكل الكوبلات اللى عندنا ف الكليه

بكمية غل مصاحبه بشلحة حقد مضاف اليهم ملعقة يارتنى كونت مكانك يامعصعصه

ومش كان حاكمها بجد غير دينها ..

انا مبقلش انها كانت ع وشك الانحراف .. لا .. ولا هو ده المضمون

النظريه كلها البنت كانت عايزه تحب ياجدعاااااااااااااااااان

وانا مروحه ف العربيه مع بابا حقا ترددت وكنت ع وشك ان افاتحه

واخد راية ف الموضوع ده .. كعادتى دايما مع بابا انى بستنجد بخبرته

بس معرفش ايه اللى شلضم لسانى واكتفيت باختلاس النظر ع كل الكوبلات اللى ماشيه ف الشارع

وافتكرت ايام الفلانتين ,, انا لا اطيق هذا اليوم بهذا المسمى ,,

بس ارجع واقول الفكره نفسها .. وكل اتنين مختوبين جايبين هدايا لبعض وبيعبروا عن حبهم

واحنا قاعدين زى عواجيز الفرح نتفرج عليهم ...

فوجدت انى الاخرى

كثيرا وكثيرا تمنيت ان اكون مكانها .. ياتى اليها ممسكا ورده

فاقول له يااما جاب الغراب لامه ههههههههههههه

حقا هذه هى رومانسيتى لكنها طبعا كانت هتقوله وحشتنى ياحبيبى

فعلا حق لكل انسان انه يحب ويتحب .. مين منكم ممكن ينفجر لو ملوش اصدقاء

يحبهم ويحبوه .. ومين منكم منفسوش يحب ويتحب

حب برىء .. مشاعر واحاسيس ناصعة البياض ,, مغسوله بأومو

اى دين واى دستور لا يكفل هذا الحق

اذن هو حق لكل انسان انه يحب ويتحبب .. مش انه يتجوز

اصل بعد الكلام ده كله حاسه انى مش عارفه اوصلكم وجهة النظر

بنتكلم عن الحببببب ياجماعه .. الحب البرىءءءءء ابو قلب ابيض ده

وعندما توصلت لهذه الحقيقه .. رفعت سماعة التلفون مباشرة

محدثه ماما صاحبتى .. وحقا كانت جرأة المجنون

وقولتلها اللى فيه النصيب .. وكانت النتيجه

هذه الفتاه ع موعد مع قراية فاتحتها يوم الخميس المقبل

ع ان تعقد حفله ع الضيق يوم السبت الموافق 26/1 ويلبسوا شبكه

لن ولم ولا استطيع ان اصف لكم كم تبدل حال هذه الفتاه ع النقيض تماما

بقت زى الورده اللى اجتمعت فيها الوان الدنيا وصبغتها بلون مختلف

واجتمعت فيها روايح الدنيا واكسبتها طعم ونكهه وريحه مميزه

فتذكرت مقولة امى لما نروح نزور اى عروسه ونباركلها

فتقلها .. هى اللى بتتجوز بتحلو كده ..

طبعا لازم تحلو مش لقيت نصها التانى

اوعدنا ياااااااااااااارب ..

وهذه محادثه م اخرى تحادث زوجها عبر الماسنجر ..

يعنى هما مكتوب كتابهم وفاضلهم شهر ويتجوزوا

ذاتــــــــــــــــــــــــــــي is now Offline

نـــــــــــ: احلى باك

نـــــــــــ: وحشتينى على فكرة

نـــــــــــ: يعنى انتى غيبتى حوالى 20 ثانية

نـــــــــــ: و الثانية فيها حوالى 15 فيمتو ثانية

نـــــــــــ: يبقا الناتج حوالى 300 فيمتو ثانية

نـــــــــــ: و الفيمتو ثانية فيها حوالى مليون ذرة حب بقلبى ليكى

نـــــــــــ: تبقى وحشتينى حوالى تلاتة مليار ذرة حب

نـــــــــــ: و ذرة حبى الواحدة لعيونك تساوى فى مكنونها شمس من الشموس

نـــــــــــ: يعنى وحشتينى قد تلاتة مليار شمس او نجم سماوى

نـــــــــــ: وحشتينى فى الحبة دول قد الكون كللة

نـــــــــــ: وحشتينى

ياحنيييييين ياعاتفى هو ف كده ياناس

ملحوظه متملحظه :: ليها حق البت تتعقد والله تلاقيها قرتلها كام محادثه م دول

نصيحه لكل اب لبنت او لولد .. لازم تحط ف حسابك ان ليهم مشاعر واحاسيس

مينفعش تتجاهلها ولو مفيش فرصه ان بنتك او ابنك يرتبط حاليا

ممكن تفضل جنبه ف اصعب فتره ممكن تمر ف حياته وتحاول تسد الفراغ العاطفى بتاعه

لحد ما ربنا يرزقه بشريك حياته بالصوره اللى ترضى دينه وربه

.

وملحوظه كمان علشان محدش يفتكر ان احنا بننشر الرزيله ولاا حاجه

ههههههههههههههههههههههه اكررر احنا بنتكلم عن الحب الصافى

الذى لا تشوبه شائبه ... اشتته يارب بعد ده كله متفهمش غلط

واختم بهذا البيت والذى دوما ما يردده د/ علاء الفقى

استاذ الانف والاذن بالكليه عندنا

اذا انت لم تعشق ولم تدر مالهوى قم فاعتلف تبنا فانت حمار

.

واسال الله ان يرزقنى واياكم بالشريك الصالح

اللى يعينا ع عبادته ومواصلة المسيره ف الحياه