Monday, July 28, 2008

م شىء وف شىء والى العدم

تحديـــــــــــث


Mero.. said... ..
الجواب بسيط هتلاقيه في اي كتاب عقيدة كتاب القدر باب أفعال العباد.."الانسان مخير يختار الصواب أو
الخطأ ..الطاعة أو المعصية..كل الطرق امامه بكل حرية..ودا له شواهد كتير في القرآن بس مش هطول واكتبها
..من الكلام دا الانسان مخير لكن في نفس الوقت..ارادته واختياراته لا تخرج ابدا عما اختاره الله بعمله
وارادته لانه أدرى به ويعلم سلفا ماذا سيختار..زي مثلا ولله المثل الاعلى الاب بيدي ابنه جنيه
وهو عارف تماما انه هيجيب بيه شيبسي ..الواد ممكن يجيب أي حاجة..بس الاب عارف ابنه كويس..
ولله المثل الاعلى ربنا عارف الانسان احسن منه فعارف كل اختياراته وتحركاته سلفا لذلك فارادته وعلمه مقدمة..
وبالتالي الانسان من النقطة دي مسير..حطي الاتنين على بعض يبقى الانسان "مسير ومخير في نفس الوقت"..
...........................................................

قال الله تعالى انا هديناه السبيل اما شاكرا واما كفوروقال الله تعالى ونفس وما سواها فالهمها فجورها وتقواها
قد افلح من زكاها وقد خاب من دساها .. في امو حنا مخيرين فيها وفي امور لايعني الانسان يختار شي معبن
لأن له اختياراً وله مشيئة، فهو مخير من هذه الحيثية؛ لأن الله أعطاه عقلاً وإرادة ومشيئة وفعلاً،
وَلَوْ شَاء رَبُّكَ لآمَنَ مَن فِي الأَرْضِ كُلُّهُمْ جَمِيعاً أَفَأَنتَ تُكْرِهُ النَّاسَ حَتَّى يَكُونُواْ مُؤْمِنِينَ [ يونس الآية 99]
لقد رفض الله أن يكرة الناس على الايمان و كان هذا فى امكانة و لكنة اراد للأنسان ان يكون حرآ مختارآ ,
يختار الأيمان او الكفر كما يشاء لكن ممكن يحصل مفاجاه انت مش مختارها او اشياء انت مجبر عليها كيوم ميلادك
او وفاتك و مرضك باختصار اللي تعرفه انت مخير فيه اللي ما تعرفه (الغيب) انت مجبر عليه






المكتوب مكتوب ..!!

الانسان ’مسير وغير ’مخير

الانسان ’مسير وفقا لسيناريو ربانى

ف اروع مسرحيه .. لحياه البشر

كلنا شخوص فيها .. ولكن م البراعه

اننا جميعا نجسد جميع مشاهدها

فانا ااكل واشرب وانام وامشى

وانت كذلك ..

انا الابنه والام والصديقه والزميله والطالبه

وانت كذلك .. باستثناء حرف الهاء م كل كلمه

حتى الصفات الانسانيه بقبحها وبجمالها

فانا الطيبه والشريره

وانت ايضا الطيب والوحش

ولكن ايضا الانسان ’مخير

كم م مره .. وضعتك حبكة السناريو

ف نقطه بين طريقين .. وتركت لعقلك البشرى الصغير

وقلبك البشرى الاصغر .. ونفسك الانسانيه الغروره

فرصة اتخاذ القرار ..

حقيقة .. ما اروعها لحظه .. ان كنت لم تدرك روعتها

فانت لم تدرك روعة الحياه بعد ..!!

تخيل لو كنا نعمل طبقا للسيناريو بحذافيره

نسير ع الطريق المكتوب .. ولا مجال لنقطه بين طريقين

حتما سنشعر بالملل .. سنشعر بالكسل .. سنشعر بخيبة الامل

ماهو كله مكتوب ..!! هنشتغل ليه .. هنتعلم ليه ..

ولكن الخالق عز وجل .. منحك حق الاختيار

ولتعلم .. ان ماستختاره .. كان مختار لك منذ البدايه


يالله .. سبحانك ربــــــــــى

تذهب انت بفكرك وتصول وتجول .. ماذا اختار

علمى ولا ادبى .. وتلجأ لخبرات م سبقوك

وما تلبث .. ان تلجأ للاوبشن

الاوبشن الربانى لمعرفة الغيب ...

تفشل ف اتخاذ قرار مصيرى لحياتك

فتلجأ للخالق .. تصلى صلاة الاستخاره

للاطلاع ع النص .. السيناريو الربانى

تصحى الصبح .. محلمتش بحاجه

لتوهم نفسك .. بانه طالما محلمتش بحاجه يبقى خير

وتختار .. انت تختار .. ما هو بالاساس مختار لك

تفشل .. واصلا مكتوبلك الفشل

تنجح .. واصلا مكتوبلك النجاح

يالله .. اصل لنفس النتيجه

الانسان ’مسير غير ’مخير

.. والكافر .. انسان اختار له الخالق عز وجل

جهنم وبئس المصير .. ولكن لو اراده اكثر الناس ايمانا

لكــان

فلماذا لم يرده مؤمنا .. ولماذا المؤمن لم يرده كافر

اديان سماويه ورسل تدعو الى الله ..

لنصير مؤمنين او غيره

عابدين جدا او بدرجات مختلفه

ان كنت تصلى الفروض الخمس فقط

فهذا ما هو مكتوب لك ..

وان كنت ستصلى غدا الفروض الخمسه والسنه

فهذا ايضا مكتوب لك

وان كنت غدا لن تصلى الفجر .. سهوا

فهذا ايضا مكتوب لك

ان كنت كافر وستؤمن .. فهذا مكتوب لك

وان كنت كافر ولن تؤمن .. فهذا ايضا مكتوب لك

يادماغــــــى


سبحانك يالله .. سبحانك يالله

سبحانك يالله .. سبحانك يالله

عقل بشرى .. يظن نفسه الاعلى ذكاءا

والاقدر معرفة .. ولما لا

وهو م اكتشف الذره والجنين والفيروس

واخترع الطائره والكمبيوتر

بس .. لو عرف .. ان ده كله مكتوبله م الاساس

كان عرف مدى ضئالته قدام الخالق وعظمته

ولكانت انكسرت نزعة الغرور الانسانيه

ولكن .. كل مجازى بعمله ؟؟

انهى عمل .. اللى مكتوبلى وهعمله

والا اللى هيوهيئلى انى انا بختاره وبعمله

كالعاده ..

اعجز عن التفكير

وجيم اوفر

واصل لنهاية الافق الكونى المسموح فيه بالتفكير

وانتهى بـــ

اشهد ان لا اله الا الله وان محمد رسول الله

سبحان الله .. ولا حول ولا قوة الا بالله

.. ادخل هذه الدائره الفكريه والتى اسميها

بـ م شىء وف شىء والى العدم..

افكر ف دائرة المجهول ..

اعلم انها اخطر دائرة قد تجد نفسك فيها يوما

فيا .. الى الجنون .. او الى شىء اخر

ولكن انا ادخلها ..

عندما اشعر بفوران نفسى البشريه

عندما يعلن عقلى البشرى العصيان ويظن انه اقترب م القمه

عندما ينزع غرورى البشرى .. سلامى النفسى

ادخلها .. لاخرج منها مطمئنه كما كنت

مسيطره ع نفسى البشريه .. ملجمه عقلى صح ..

واحمد الله .. انى اعرف حدود هذه الدائره المغلقه

وهى .. انه عندما يعجز عقلى عن التفسير

هذه هى النهايه .. والتى يجب ان ارجع منهااا فورا

وانتهى كما قلت

بـ اشهد ان لا اله الا الله وان محمد رسول الله

سبحان الله ولا حول ولا قوة الا بالله

سؤال للمناقشه ؟؟

هل دخلت الدايره ده ؟؟ ولا بتبعد عن الشر وبتغنيله ؟؟


ولا بتعتبرها دائره محظور الاقتراب منها اصلا ؟؟

73 comments:

Mafrousa said...

يااااااااااااااااااااه
ياريتني كنت بعتلك الميل من زمان يا اجدع بنوته
الانسان يا حبيبتي مخير فى تسيره
يعني انتي مخيره تمشي يمين ولا شمال و لو اخترتي المين تبقى مسيره بكل مافيه من عراقيل و مشاكل و عواقب و جزاءاتو منح
و هكذا بالنسبة للطريق التاني
فهمتي حاجه؟؟؟
انا بقول ان الانسان مخير فى تسييره
سلام و حمدا لله على سلامتك

Moustafa` said...

انا جواها دلوقتي
---
على فكره انتي بتسألي اكترم ا بتجاوبي
ولما بتقفي - عند ليفل قليل اوي - بتقولي كفايه العيب ف دماغي
وبتطلعي مطمئنه وبالشهداتين
--
عل الأقل اقري فى عقيده التوحيد والقدريه .. او أبرحي فى كتب التصوف ممكن توصلي لمعرفه نفسك وبالتالي لمعرفه ربنا
------
في النهايه أشهد ان لاإله إلا الله
وأشهد ان محمد رسول الله
حلو وبسيط الطرح
وحمد الله عل السلامه م الغيبه الطويله دي
يارب الأومتحانات تكون خلصت على خير
سلامات

Moustafa` said...

كل ميسر لما خـُلق له
بس لينا حق الإختيار

FreeKiller said...

الموضوع ده جه عالجرح
اصل بعد امتحان الشرعي ده
الواحد عاوز اي حاجة تصبره

عموما احيانا بفكر فيها بس ببطل على طول
مالهاش لازمة الواحد يتعب دماغه ف التفكير ف حاجات هتضر اكتر ما هتنفع

و بهنيك عالعربي بتاعك
مع ان في غلطه املائية
بس يللا سماح

دكتور بهــدوء said...

هاااابي ريترن سمسمه

والوجه الفلسفي الجديد
الدايره دي ياما بدخل فيها
بس غالبا دلوأتي إلي حد ما باول امنع نفسي م التفكير الكتير
دخله اجازه ويجعله عامر

blue-wave said...

زمان لما كنت صغير كنت بفكر فيها كتير
وبخرج منها لدوائر اكبر واوسع
الا ان وصلت لحقيقه مفادها
اد ما عليك
ودع التوفيق لله
تحياتى

Mero.. said...

سبحان الله انا لسه كاتب الكلام دا في رد لواحد علق عندي المهم..الجواب بسيط هتلاقيه في اي كتاب عقيدة كتاب القدر باب أفعال العباد..
"الانسان مخير يختار الصواب أو الخطأ ..الطاعة أو المعصية..كل الطرق امامه بكل حرية..ودا له شواهد كتير في القرآن بس مش هطول واكتبها..من الكلام دا الانسان مخير لكن في نفس الوقت..ارادته واختياراته لا تخرج ابدا عما اختاره الله بعمله وارادته لانه أدرى به ويعلم سلفا ماذا سيختار..زي مثلا ولله المثل الاعلى الاب بيدي ابنه جنيه وهو عارف تماما انه هيجيب بيه شيبسي ..الواد ممكن يجيب أي حاجة..بس الاب عارف ابنه كويس..ولله المثل الاعلى ربنا عارف الانسان احسن منه فعارف كل اختياراته وتحركاته سلفا لذلك فارادته وعلمه مقدمة..وبالتالي الانسان من النقطة دي مسير..حطي الاتنين على بعض يبقى الانسان "مسير ومخير في نفس الوقت"..

ان بي : اتمنى الكلام في العقيدة صحيح عادي نتناقش ونفكر ..جميل..لكن باب القدر بالذات مفهوش لعب ياريت تنبهي على الزوار بلاش نقول راي لو مكنش مبني على علم مسبق..
تحياتي لاختيار الموضوع .. نقطة رائعة :)

بحبك يامصر said...

الاول حمدلله على سلامتك يا اجدع بنوته
بعد كده اقولك رأيى اكيد الانسان مخير فى جزء كبير من افعاله والا مكنش ربنا هيحسبه عن اخطائه ويثيبه عن افعاله الخيره وده لان الله عادل لا يجوز ان يحاسب العبد على فعل لم يختاره العبد
وقد ميز العلامه بن رشد بين عالمين وهم
عالم الاراده البشري وفيها الانسان مخير عن افعاله وعالم الظروف والعوائق الخارجيه وفيها الانسان مصير
والحقيقه انا بميل للرأى ده ان الانسان له مطلق الحريه فى اختيار تصرفاته وافعاله الا ما يعوق اختياره من ظروف خارجيه
وشكرا

عاشــــــ النقاب ـقــــة"نونو" said...

السلام عليكم
حمد الله على سلامتك والله زمان
الحمد لله على نعمة الاسلام
تدوينة مميزة
ما تغيبيش بقى

في حب مصر said...

السلام عليكم
اولا حمد لله على السلامة بعد الغيبة الطويلة قوي دي
بالنسبة لموضوع الجبر والاختيار فده موضوع قديم قوي ظهر في بدايات الاسلام بعد فترة الصحابة وظهر فيه تلات مدارس اساسية
الاولى بتاعة جهم بن صفوان وبتقول ان الانسان مسير مش مخير.. واستند على حديث الرسول الكريم اللي بيقول في نهايته "رفعت الاقلام وجفت الصحف".
التانية مدرسة المعتزلة بتاعة واصل بن عطاء ومدرسة الاشعرية ودول بيقول ان الانسان مخير . وحجتمه بسيطة ان ربنا عادل وعلشان هو عادل مش ممكن يحاسب الناس على حاجات هو فرضها عليهم.. فالحساب يقتدي الاختيار.. حتى يكون الثواب والعقاب عادل.
المدرسة التالتة بقى هي بتاعة محمد عبدة ودي بقى اللي بتقول بنظرية اسبقية العلم الإلهي، وهو نفس المعني اللي انتي ذكرتيه. فهو بيقول ان الانسان مخير علشان ربنا عادل وبيحاسبة على اختياره لكن ربنا يعلم منذ الازل ان هذا الانسان سيختار هذا الطريق ولذا كتبه له

ورأي محمد عبده بصراحة هو اكتر رأي مقنع، لان ربنا مش ينفع يدخل واحد النار او الجنة بسبب حاجات هو فارضها عليه والانسان برضه مش مخير قوي في كل شيء
انا زمان كانت دماغي هتنفجر من الموضوع ده لما كنت بدرسه.. وفي النهاية قررت انساه..هههههه

وعلى فكرة فيه اسئلة تاني من نفس النوع قررت انساها زي مثلا: ايه هو مفهوم الابدية. يعني بعد يوم القيام فيه ناس تدخل النار وناس تدخل الجنة للابد.. بس الابد ده قد ايه مليون سنة .. 100 مليون سنة.. تريليون سنة.. وبعدين؟
سؤال تاني: بعد السموات فيه ايه.. يعني ايه هي حدود الكون.. وفين اخره .. وبعد الاخر ده فيه ايه؟؟

كفاية كدة علشان انتي فكرتيني بحاجات ملهاش حل
هههههههه
تحياتي

Anonymous said...

الله عليكي
فعلا الانسان مسير في اشياء و مخير في اشياء
ففعل لخير اختيار و الشر ايضا اختيار
امما القدر فلا نملك منه شيء
اسلوبك رائع اختي
تقبلي مروري

مصطفى حسان said...

بصي انا عاوز اقول لك على حاجه .. صعب قوي تلاقي انسان مادخلش الدايرة دي لأن طبيعة العقل البشري في الأساس طبيعة ثائرةوترفض الأفكار الجاهزة .. ولو حد كان مقتنع انه عمره مادخل الدايره دي ولو من بعيد يبقي مابيفكرش أصلا ومابيسمحش لنفسه انه يفكر وده الخوف عليه من الوقوع أكتر من الشخص اللي بيسمح لنفسه انه يخرج عن الحدود المألوفة

لكن انا عاوز اقول لك على حاجه .. مش دايما الفلسفة بتبقي منجده .. هي مشكلتها انك بتسأليها سؤال تجاوبك بعشرة اصعب واصعب ..

المهم .. انا مش عاوز اتكلم عن الموضوع اللي انتي طرحتيه لانه طويل جدا وواسع قوي فصعب اناقشه في كومينت ثم اني أعتقد ان المشكله اللي بتطرحيها هي مش في التسيير ولا التخيير بس ، واعتقد انك بتتكلمي في الشكل العام للتفكير وهل ينفع يكون ليه حدود واللا لا وطبيعة العقل البشري هل هي قاصره فعلا واللا لا

تحياتي على الموضوع الرائع الذي لا يعيبه إلا اختلاط بعض الأفكار

Doba said...

وحشتنى شقاوتك يا بنت الأيه انتى
وحشتنى دماغك اللى بتتفلحس وتمخمخ وتطلع بالدرر الحلوة

البوست تحفة فى طرقته ومحتواه
ومنهجك فى التفكير والحفاظ على دربه ماشاء الله عليها

ربنا يباركلى فيكى
وانتى عارفة غلاوتك عندى
================
مش ناوية تزورى أقاربك فى فيصل
نفسى اشوفك واتعرف بيكى
يا سوسة انتى

سلام يا اجدع بنوتة
هبة

Soooo said...

والله العظيم ليكي وحشه
اصل انا كنت بادخل على مدونتك الاقيكي عامله مواضيع طبيه وحوارات دكاتره .. وانا لا افقه اي شيء في الطب غير البنادول والفوار بتاع الحموضه

بس المره دي لقيتك راجعه ومنزله موضوع في صميم الصميم

وايوان ياستي .. دخلت الدايره دي واتسحلت فيها بطريقه يالهووووووي
كنت هاشد شعري وكتاب الله

لكن بعدها وصلت لحاجه بسيطه قوي
حاجه هي روح الدين الاسلامي

اسلام يعني تسليم بمشيئة الله مع العمل على الاصلاح والتقويم .. الاصلاح من الفرد والمجتمع .. والتقويم بما يتفق مع النهج السليم الفطري وباسلوب ارشاد بسيط

زي مانتي اتكلمتي ببساطه كده في الموضوع اللي كتبتيه

ليكي وحشه والله يا داكتوره .. وكان نفسي تنوري قاهرة المعز وتيجي يوم الجمعه .. لكن بما ان الحوار فيه رخصة سواقه وشنطة اسعافات وقانون المرور الجديد .. يبقى ربنا يوفقك ويسترها على اللي يعدي من قدامك وانتي سايقه التوك توك




سلاموووووووووز

دعاء مواجهات said...

انا بردو اللى كتاباتى ضربشمسااوية يادكتورة

اومال انتى اية بقى

اروح انادى كساب واقولوا انى بتسرقى تفكيرة بقى

هاة اروح ...

ههههههههههههههههههه

لا بجد كلام زى العسل من واحد اعسل بجد

يابنتى بجد مفتقداكى جدا

ووحشانى جدا جدا

كل ما اجى مش بلاقى جديد
نورتينى

اوعى تطنشينا كدة تاانى


بييس

سلطان الغرام said...

بسم الله ما شاء الله عليكي ان قريت الموضوع اكتر من مره وكلى مره بكتشف فيه جديد بس فيه ساعات حاجات بتوه مني بس موضوع جاااااااااااااااااامد قوي وبحيكي عليه وبالفعل الانسان مسير وممكن نقول انه له حق الاختيار بس بعد المشوره ومن هنا هنقول المشوره بتكون من ربنا وبالتالي ممكن نقول برضه مسير ومش هنختلف كتييييييير واتمني منك انك تزوريني في مدونتي

حنين القلب said...

البوست بجد جامد يا ياسمين
بس تفتكرى لو حبينا مش ندخل الدايرة دى اصلا هنقدر انا علطول ادخل فيها بس بحاول مش اطول واخرج ساعات احس ان التفكير مش بيوصلنى لحاجه واسئل اسئله مش بلاقى ليها رد
وانا مقتنعه ان كل مسير لما خلق له
تقبلى مرورى

اهو ده عيبه said...

موضوع مهم ومحير وبيدفع الانسان للتفكير
هتخلى الواحد يقعد يفكر ويعصر دماغه
بس بجد احييك انك تطرقتى للموضوع ده

ابو اعصار said...

قال الله تعالى انا هديناه السبيل اما شاكرا واما كفور
وقال الله تعالى ونفس وما سواها فالهمها فجورها وتقواها قد افلح من زكاها وقد خاب من دساها

في امو حنا مخيرين فيها وفي امور لا
يعني
الانسان يختار شي معبن لأن له اختياراً وله مشيئة، فهو مخير من هذه الحيثية؛ لأن الله أعطاه عقلاً وإرادة ومشيئة وفعلاً،
وَلَوْ شَاء رَبُّكَ لآمَنَ مَن فِي الأَرْضِ كُلُّهُمْ جَمِيعاً أَفَأَنتَ تُكْرِهُ النَّاسَ حَتَّى يَكُونُواْ مُؤْمِنِينَ [ يونس الآية 99]

لقد رفض الله أن يكرة الناس على الايمان و كان هذا فى امكانة و لكنة اراد للأنسان ان يكون حرآ مختارآ , يختار الأيمان او الكفر كما يشاء
لكن ممكن يحصل مفاجاه انت مش مختارها
او اشياء انت مجبر عليها كيوم ميلادك او وفاتك و مرضك
باختصار اللي تعرفه انت مخير فيه اللي ما تعرفه (الغيب) انت مجبر عليه
موضوع فلسفي وعمل رفرش لدماغي شكرن لك

Anonymous said...

رايي مش معاكي قوي
الانسان لا مخير ولا مسير مية في المية
لانه لو مسير يبقى من الظلم ربنا يحاسبه على اخطاء مش بايده يتجنبها
ولو مخير دة بيلغي دور القدر والغيب
انما الانسان ميسر
" فسنيسره لليسرى "
حسب كل واحد واستعداده لقبول فكرة
الشر او الخير
واحنا عيال كانوا بيقولولنا ان الانسان بيختار طريقه
وكان بيبقى نفسنا قوي لو نختار طريق الخير
دة عشان فطرتنا نقية
بعدين المسالة ممكن تتغير
والطريق اللي حنختاره
بارادتنا الحرة
هو اللي حنمشى فيه

جهاد خالد said...

يااامرحبا يااامرحبا

اخيرا رجعت ياباشا

منووورة والله

اما بالنسبة لتعليقي بقى

فالقوم اسلفوا واجادوا وبينوا

وبنتفق بالخصوووص مع
mero

لاني تقريبا كنت هقول مثال مشابه


ربنا يكرمك وتخرجي من الدايرة على خير
:D

نونو said...

على فكرة اسلوبك حلو اوى
وشيق
جدااااااااااااااا
غصب عنك تكملى وكمان تعييدية كذا مرة مسيرين فعلا
بس اكييد احنا اللى بنختارررر
فكرتينى بزمان وانا صغيرة
دومتى مبدعة

آخر العنقود said...

ياااااااااااا حمد لله على السلامة ياسمسمة
بجد ليكى وحشة باسلوبك المميز والجميل ده
وبوست رائع فى الفكرة والعرض والامثلة
وقولتى كلام جوا كل واحد فينا بجد
ربنا يرزقنا الرضا والصبر على قضاءه وقدره
والعمل بما نعلم وقت ماينفع

تسلمى يادوك على كلامك المميز

ٍSOU said...

دخلت فيها كتييييير بس ماحاولتش اوصل لنهاية ليها كنت على طول برجع لبدايتها و اخرج منها جرى ..موضوع معقد و ماعتقدش ان العقل البشرى ممكن يستوعبة و لو فضل يفر لية هايوصل لطريق مسدود و لطريق غلط

عايش... ولكن !!!! said...

انا فكرت فى الموضوع ده كتير زمان
بس فى الاخر لقيت ان الانسان فى بعض الاشياء مخير وفى اشياء اخرى مسير
يعنى مثلا الولاده والتنفس
فى حاجات تانيه مخير فيها زى الدين ونوع الاكل وحاجات كتير جدا

بس عموما ربك له فى ذلك حكم
ولازم يكون عند كل واحد مننا يقين وايمان ان الحاجه اللى حصلتله دلوقت احسن من حاجات كتير كانت ممكن تحصله لولا ستر ربنا
لو راى ابن ادم المستقبل لاختار الواقع

مصر يا موكوسه .....يا مزارع الكوسه said...

كفااااااااااااااااااااارة
اتاخرتى اوى كده ليه
بس مش مشكله
بركه انك جيتى بالزلامه
والبوست جااااااااااااااااااااااااامد
طحياطى

Unknown said...

بدون الدخول مره اخرى فيما كنت مخيرا ام مسيرا
ام انا مسير ولكن يظهر لي اني مخير
او اني مخير ولكن بشكل لا اشعر به انا مسير
فهمي دوامه فعلا
اختاااااااااااااري ما ترينه مناسبا لك وما تحلمين به
وحاولي تحقيقه
على الاقل لو وصلتي فانت اخترتي ما تريدين
ولو لا قدر الله لم تصلي فانت قد حاولتي
واعتبري ان ما تريدين هو ما انت مسيره من اجله
تحياتي

NIDAAL .R said...

الدائرة دى دخلتها قبل كدة كتير
بس لما عرفت انى بفكر فى المجهول و بما انه مجهول هيبقى استحالة اعرفه
و فعلاً كنت ببقى على وشك الجنون لما بخش الدائرة دى ..
احنا بندخل منطقة مش بتاعتنا و علشان كدة بنتوه فيها
ولا ايه ؟

Marwa Friday said...

صباح الفل

مسير ومخير
الاتنين

عارفة انا درست فلسفة ثانوية عامة ودرست مدارس مختلفة فيها آراء حول كون الانسان مسير من مخير.. أكتر حد عجبني كان الشيخ محمد عبده
الوسطية

ابقي اتفقي نتقابل سوياً سوا سوا بإذن الله

عشان عايزة أشوفك متخيلاكِ اللي في الصورة بتاعة البروفايل
عسل

:)

صباحك فل

almasry said...

بسم الله ااما شاء الله



أسقراط بعث من جديد أم انك ستكونين فريقا غير المعتزله والأشاعره وغيرهم ممن تكلم فى الاختيار والتسيير لكن على أغلب الأوضاع انا متف معاكى



تحيـــــاتى
المصـــــــــرى

موناليزا said...

عودا احمدا ياسمسم
ويارب تكونى وفقتى فى الامتحانات
بس هو فيه سؤال هو حرف النون مش موجود ليه؟
يعنى" من" حرف جر ماينفعش تكون من غير نون
وايضا "فى"حرف جر ماينفعش تكون من غير ياء
نيجى بقى على الموضوع المهم اللى انتى بتتكلمى عنه
انا شايفة ان الانسان مخير فى حاجات ومسير فى حاجات تانية
يعنى مش معقول ارمى نفسى فى النيل واقول ما ربنا اللى عايز كده ده انا كده ابقى بستعبط يعنى
لكن من ماتوا حينما غرقت بهم العبارة ده بجد مكتوب لهم الموت غرقا يعنى فى الحالة دى كانوا مسيرين
اما كونى ارمى نفسى فى النيل او لا انا كده مخيرة

•√أريـ السمر ـج√• said...

موضوع شيق اوي و اظن كلا واحد دار جواه التساؤلات دي

انا مقتنعةأن أحنا مخيرين و مسيرين بنفس الوقت

موضوع جميل و حمد لله على سلامتك

رحــــيـل said...

حمد الله على السلامه
شوفى بندخل ونخرج منها
مش بنوصل لحل لان احنا مهما بلغ بينا العقل فهو اقل كتير من احنا نوصل للنقطه نستريح عندها بحل يرضينا
الانسان مخير ولا مسير؟؟؟؟
انتى جيبتى من الاخر كله مكتوب
سواء حسينا احنا مخيرين او مسيرين

كله مكتوووووووووووب

تحياتى لكى

صوت من مصر said...

ياه من زمان نفسى اقولك انى متبع بس للاسف ؟
عموما عجبنى الكلام وحسيت كانه فعلا انا من ينطق بالكلمات من على لسانه لكنك خطفانه كلنا ؟
تسلم الايادى واسف جدا على التاخير

الباحث عن الحقيقة said...

اسجل اعتراض قوى على هذا البوست
واسبقية العلم الالهي بما يكون لا تعنى القهر وإلا كان هذا الاله يرتكب اسؤ التمثليات والمسرحيات الهزلية حين يرسل انبياءه ليجاهدوا ويكافحوا ويصارعوا من اجل دعوة الكافرين الى الايمان
بينما كان يمكنه ببساطه ان يوجه نبيه نحو هؤلاء الذين سيؤمنون ولا يدعه يذهب مجهوده هباء في دعوة قوم لا يؤمنون لان الله كتب عليهم ذلك
الوست عبارة عن سياحة خاطئة في التأمل في ملكوت الله
الله الذي قال كل نفس بما كسبت رهينة
ووضع الاسباب لتؤدي الى النتائج
فليس في تفاعل الاسباب اي قهر على حصول النتيجة بل هو العلم المسبق لمن يأتي السبب بأن النتيجة ستكون كذا
ولا شك ان علم الله بتفاعل الاسباب ونتائجها اشد يقينا من علم طبيب في معمل كميائي
ولا يسمى شئ من ذلك .تسيير
لقد وصلتي بتفكيرك الى لا شئ ..لذلك لم تجدي سوى اعلان شهادة الاسلام واظنك اعلنتيها باختيارك كطوق نجاة من هذه الحيرة الفكرية لتجدي شئ من الراحة الخادعة لانه وطبقا للموضوع فإنك كنتي مسيرة في ذلك فالله كتب عليكي ان تفعليه وهذا يعني انه ليس لكي فضل تستحقي عليه ثواب ولا عقاب ..كما ان من كفر وجحد لم يكن امامه من سبيل غير ان يفعل ما كتب عليه قبل ان يفعله وهذا القول يعني ان الثواب والعقاب اذن فكرة عبئية وان كان حقيقة فهو لشئ هزلي
نستغفر الله العلي العظيم ونتوب إليه
ان الله الذي جعل لعبده مشيئة الايمان او الكفر :من شاء فليؤمن ومن شاء فليكفر فأن الانسان حتى يملك هذه المشيئة يجب ان يكون حرا مخيرا في افعاله جميعها
واخيرا
توبي الى الله واعلمي ان الله هو العدل لا يعذب انسان بشئ لم يقعله بارادة حره واختيار خال من الاكراه

د/اجدع بنوته said...

زائرى العزيز

استاذى الباحث عن الحقيقه

مبدئيا كده

السلام عليكم ورحمة الله وبركاته

انا مش هرد ع حضرتك ف الكلام اللى حضرتك قولته

انا هرد ع حضرتك ف شك بسيط جالى م وسط الكلام

ربنا ادانى عقل علشان افكر

ولو الدايره دى ممنوع ندخل فيها


او ربنا شايف انها ممكن تضر بعباده الضعفا

بتهيالى كان جه امر سماوى او نبوى بمنع التفكير فيها

فانا شايفه ان تفكيرى ده لا حرام ولا هو والعياذ بالله اكتر م كده


انا كل مره بدخل فيها الدايره دى بخرج والحمدلله اكتر ايمان

وبهدى نفسيا

لكن توبى الى الله دى .. بصراحه مش عارفه موقعها م الاعراب

اما انى انتهيت للشهاده كرد فعل طبيى وعلشان انجى دماغى م جنون محتوم او كفر


لا .. الحمدلله انا بنتهى للشهاده باقتناع تام والحمدلله

انا بفكر .. علشان مابقاش مسلمه موحده

لكونى اتولدت مسلمه موحده

لاب وام مسلمين موحدين

انا مسلمه موحده لان عقلى وقلبى

سلموا بكده

تحياتى

د/اجدع بنوته said...

لطيف جدا ردك يامفروسه

نفس رد ام بيسالها ابنها

ماما احنا جينا ازاى

قالتله ربنا كان عايزينا نيجى فجينا

....

عارفه ان كلامى زى كلام الولد

ملوش اجابه فعلا

بس لطيف ردك برده

وميرسيى ع سؤالك

د/اجدع بنوته said...

شاجى

بقف عند الليفل اللى مينفعش افكر بعديه

تحياتى

د/اجدع بنوته said...

فرى كيلر ياغاليه

يارب تكونى كويسه

وترجعى مصر بالسلامه

وانتى اشتريتى دماغك وزى الفل

د/اجدع بنوته said...

بهدوء

الحمدلله انى مدرستش فلسفه بصراحه

دماغى كان بقى ورقة شفاف

Lobna Ahmed Nour said...

اوكي

موضوع التسيير والتخيير ده كبير اوي وكتير بيخطر على بالي

وهنا انا مقتنعة بحاجتين

اولا التسليم بالقدر وعلم الله المطلق لما كان ويكون وسيكون

ثانيا التسليم بان ربنا وضعنا على طريق الحياة ووضع علامات ارشادية على اليمين والشمال واحنا اللي بنختار

واحشاني مواضيعك اوي .. بلاش تغيبي تاني كدة

۩۝۩ Dr. Flavio ۩۝۩ said...

أولا .. السلام عليكم ورحمة الله وبركاته

يمكن في الأساس أن جاي أشكرك على السؤال وإنك لسه فاكره بتوع طب طنطا الغلابه اللي بينطحنوا في الباطنه والأطفال

بجد أنا سعدت جدا لرؤية تعليقك عندي

نييجي بقه لموضوعك


"انا الابنه والام والصديقه والزميله والطالبه

وانت كذلك .. باستثناء حرف الهاء م كل كلمه"


معاكي .. بس أنا هبقى الأم إزاي؟؟؟؟؟؟

ههههههههههههههههههههههههههههه

"وتختار .. انت تختار .. ما هو بالاساس مختار لك

تفشل .. واصلا مكتوبلك الفشل"

جمله زي العسل وخصوصا انك كتبتيها قبل النجاح .. ضحكتني جدا

موضوع مخير ولا مسير ده .. محير فعلا

ولكن فيه حديث لخص الموضوع ده
"" إنما الأعمال بالنيات ""
لو دورنا هنلاقي إن عمل الانسان مقدر له ولكن الإنسان في نفس الوقت مخير

يعني ربنا مسيرني في العمل ومخيرني في النيه

أخيرا بقه .. دعواتك لأن الباطنه هتقضي عليا .. إدعى نخلصها على خير

سلام الله عليك

د/اجدع بنوته said...

بلو وويف

ونعم بالله

د/اجدع بنوته said...

ميرو

المثال اللى قدمته رائع جدا بصراحه

جزاك الله خير

د/اجدع بنوته said...

بحبك يامصر

درست فلسفه طبعا .. واضح جدا

شكرا ع المشاركه

د/اجدع بنوته said...

نونو

الحمدلله الف مره

الله يسلمك

د/اجدع بنوته said...

فى حب مصر

بصراحه .. وفيت وكفيت وشكرا جدا

ع عرض التلات مدارس

لانى للاسف مبقراش ومحاولتش اقرى

ف الكاتيجورى ده م الامور ..

اما بقى عن بقية الاسئله التانيه

فـ دى الحمدلله عمرى ماجيت جنبهم

وباذن الله يارب مااجيش

د/اجدع بنوته said...

عاشقة الجنه

انا معاكى جدا ف ان فعل الخير اختيار

وفعل الشر اختيار

لان الاتنين بيعتمدوا ع انسانيتنا

انا بالطبيعه اللى تملى عليا اعمل شر

ولا خير

بس دى نقطه غير مخير ام مسيير

شكرا ع المشاركه

د/اجدع بنوته said...

درش

لا ف ناس مدخلتهاش

تقبلت تحياتك وانا معاك ان فعلا ف

تداخل ولخبطه ف الافكار

بس ده طبيعى لانى بتكلم عن مجهول

تقبل تحياتى

د/اجدع بنوته said...

دوبا ياغاليه

ربنا يخليكى .. وباذن الله

هشوفك ف اقرب فرصه

د/اجدع بنوته said...

احمد سووو العزيز

شكرا ربنا يخليك

اسلام يعنى تسليم بمشيئة الله

رائعه الجمله دى

ايه الكلام الكبير ده ..

د/اجدع بنوته said...

دعاء يامواجهات

بيــــس

د/اجدع بنوته said...

سلطان الغرام

لا بصراحه .. انا بدات اقتنع انه مخير

الى حد كبييير

د/اجدع بنوته said...

حنين القلب

شكرا جدا ع رأيك

د/اجدع بنوته said...

اهو ده عيبه

شكرا جدا للزياره

انا سمعت ان كان ف اجتماع مدونى بورسعيد

وسمك وحجات جامده كده ... لووووووول

د/اجدع بنوته said...

ابو اعصار

ردك بصراحه م الردود فعلا ... الاكثر م رائعه

جزاك الله خيرا

د/اجدع بنوته said...

مصطفى السيد سمير

انا مقولتش انه مخير ولا مسير

انا كنت بفكر بين الاتنين

وابدا بده واوصل ان التانى

د/اجدع بنوته said...

النجمه الصامده

رد ميرو م الردود اللى هيتم ارفاقها ف تحديث البوست

فعلا رائع

د/اجدع بنوته said...

نونو

لا موش مسيرين ف كل حاجه

مخيرين ف حجات برده

ابقى تابعى التحديث

د/اجدع بنوته said...

اخر العنقود ياحبيبتى

الله يخليكى

يارب يرزقنا جميعا

د/اجدع بنوته said...

Sou بطيارتها الورق

معاكى حق طبعا

د/اجدع بنوته said...

عايش ولكن

انا اتفق مع رايك

د/اجدع بنوته said...

مدرسة الفشله بنات

واصغر مدونه ف الوسط التدوينى

انتى حتة سكره والله

د/اجدع بنوته said...

دمعاتى

شكرا ع المشاركه

د/اجدع بنوته said...

صح يانضال

بس مش بتاعتنا اوى يعنى

د/اجدع بنوته said...

مروه جمعه

تانى حد يقولى الشيخ محمد عبده

شكلى هبدا اقرى فلسفه والامر لله م قبل وم بعد

د/اجدع بنوته said...

المصرى

سقراط مين بس

شكرا ع المشاركه اللطيفه

د/اجدع بنوته said...

موناليزا

انا بكتب كده اختصارا للوقت يعنى

فى = ف ... من = م

احدى سمات الايقاع السريع للعصر الحالى

وشكرا ع المشاركه

د/اجدع بنوته said...

اريج .. منوره

متفقه مع رايك

د/اجدع بنوته said...

رحييييل

ونعم بالله

د/اجدع بنوته said...

صوت م مصر

الله يسلمك

د/اجدع بنوته said...

يونيك

مشاركتك ليها معنى ووصلى

وان شاء الله مفيش تأخير تانى

د/اجدع بنوته said...

فلافيووووو

ربنا يوفقكم ف الامتحانات يارب

يعنى دى الجمله اللى مسكت فيها اوى

هههههههههههههههههههههه

اه تصدق كتبتها قبل النجاح

فال زى الفل عليكم وعلينا