Wednesday, March 5, 2008

الوجه الاخر للضحوكه دائما .. للكبار فقط






.. كل اما اشوف عمرى جرى بيا ..

بخاف

.. كل اما تدبل وردتى فيا ..

بخاف

.. بخاف .. لتموت الفرحه ..

.. بخاف م الدنيا الجارحه ..

هموت .. هسيبهم ..

خلاص مش هشوفهم ..

خلاص علاقتى بالدنيا انتهت ..

خلاص للابد .. خلاص مبقاش فيه قعدة صحابى

خلاص مبقاش فيه شات .. خلاص مبقاش فيه اكل

خلاص مبقاش فيه ماما ولا بابا

اااااااااااااه

رايحه لربنا .. اه فرحانه ومبسوطه اوى .. بس ايه .. لوحدى ..

تحت التراب .. روح تخرج .. قصه تنتهى .. ذكريات ونزل عليها تتر النهايه

ناس بتبكى .. بس هتنسى ..

امى هتفتكرنى .. لما تدخل اوضتى تلاقيها فاضيه

لما متسمعش صوتى الصبح بقولها .. انتى ياست انتى فين شرابى البمبى

اللى انا اصلا معنديش شراب لونه بمبى

وابويا هيفتكرنى لما ميلاقيش العربيه كل تلات ايام عطلانه بسببى

هيفتكرنى اكيد لما يصحى الصبح يلاقينى اكلت البقسماط كله اللى جابه امبارح بليل

علشان نفطر بيه الصبح


صحباتى هيفتكرونى لما ميلاقوش موبايلاتهم بترن الساعه 3 بليل

زملاتى ف السكشن هيفتكرونى لما ميلاقوش حد يلم كانريهاتهم علشان الدكتوره تاخد الغياب

جيرانى هيفتكرونى اكيد لما ميسمعوش صوت سرسعه الساعه 4 الفجر اصل ياسمين بتزاكر

وبتغنى بقى المبدعه بسلامتها


صحابى ع النت هيفتكرونى لما ميلاقوش حد كل شويه يبعتلهم نيدنج ورينج ويطلع اوف لاين

ويدخل تانى يهنجلهم اميلاتهم

كمبيوتر بتاعى هيفتكرنى .. لما ميلاقيش حد ينضفه والتراب يكركب عليه

لبسى هيفتكرنى لما ميلقيش حد يلبسه ولما يتزنق يقعد بيه ع اى عربيه فيات قدام الكليه

قلامى هتفتكرنى لما ميلاقوش حد بيقرقض فيهم وولما يتعصب يحدفهم واحد ورا التانى م شباك المنور

مصحفى هيفتكرنى .. لما ميلاقيش حد بيفتحه وينزف دموع جواااه

انتم هتفتكرونى .. لما متلاقوش حد بيتعفرت ف مدوناتكم

هيصعب عليا امى وابويا اوى .. انا قردتهم الوحيده هههه اه ع اساس ان احنا عايشين ف جبلايه

هخاف اوى .. وانا لوحدى هناك

بضحك وانا بين نفسى وبينى خوف الدنيا كله ملينى

بخاف .. نتفارق .. بخاف يسبونى

كل اما احن لناس حبيتهم .. قلبى يحس بشوق ناحيتهم

ااااااااااااه .. اللهم هون علينا جميعا سكرات الموت

اااااااااااه .. يارب رحمتك .. يارب غفرانك .. يارب جنتك

يارب زهد دنيتك .. يارب محبة رسولك .. يارب بصمه حلوه ف دنيا زوال

59 comments:

Anonymous said...

فعلاً فكرت في الموضوع ده بس من ناحية تانية
وهي إزاي الناس أصحابي على النت حيعرفوا إن محمد علام مات ؟
عامة ربنا يديكي الصحة وطول العمر ويفرح أبوكي وأمك بيكي بإذن الله وبأولادك وأولاد أولادك كمان
وبالنسبة للوحدة اللي بتقولي إنك حتحسي بيها فأسأل الله العظيم رب العرش العظيم أن يجعل قبرك وقبورنا وقبور المسلمين روضة من رياض الجنة ننسى بها وحشة القبر وظلماته وأن يجمعنا بأهلينا وبمن نحب في ظله يوم لا ظل إلا ظله ، وأن نجتمع على حوض النبي (صلى الله عليه وسلم) ليسقنا من يديه الكريمتين شربه هنيئة مريئة لا نظماً بعدها أبداً
وفي الختام أقول إننا مش خايفين من الموت لإننا أموات قبل أن نولد ، المهم إننا نموت وربنا راضي عننا وأعمالنا الصالحة تنور علينا قبرنا بإذن الله
لا أسكت الله لك حساً ولا تدوينة ولا حرم عربيات الفيات من قعدتك البهية قدام الكلية

د/اجدع بنوته said...

يااااااه ياعلام

بجد شكرا ع الرد

اثلج صدرى كثيرا

وبسيطه ياعم هنبقى نعرف

مفيش ارخص م دقيقة المحمول

ههههههههه

زى الهوا said...

يااااااااااااااااه خوفتينى اوى , تعرفى انى كتير بافكر فى الموضوع دا , وارجع واقول عادى الكل هيزعل وهيتأثر بس الحياة هتسير عادى مش هتقف بيا يعنى , زى اى حد غالى عندكوا قبل كدة , مثلا خالتى لما ماتت العيلة كلها قعدت متأثرة تقريبا سنة كاملة وماكناش عارفين نزاول حياتنا عادى , بس مع الوقت اللى بينزل شغل نزل واللى وراه امتحانات ذاكر , والحياة عادية جدا , وهيه برده فى بالنا وديما بندعيلها ربنا يرحمها كلنا مانفتكرها , دا غير انى ساعات بادخل اشوف صورتها , بخاف انسى ملامحها وضحكتها , ماتخافيش صوتك المسرسع دا على قلب والدتك زى السكر , وهيبقى زكرى جميلة , وبعدين ماحدش عارف هيموت قبل مين , بس حاولى تسيبى بصمة حلوة فى قلب كل واحد منك

د/اجدع بنوته said...

سماح هى الحياه كده

لازم اكيد المركب هتمشى

الدنيا لو هتقف كانت وقفت عند سيدنا محمد

اهو الواحد بيحاول يسيب بصمه فعلا

ميقدرش الزمن م بعده يزيلها

Anonymous said...

"زي الهوا"
فكرتيني بجملة قالها راجل كبير لما إبنه مات ، دخل عليه وهو ميت وقاله (الرسول أشرف الخلق مات ياإبني ومفيش بعد كده)
فلو كانت الحياة لتقف لموت إنسان لإنتهت بموت النبي (صلوات ربي وسلامه عليه) ولكن الدنيا إستمرت والحياة إستمرت
المهم أن نحاول إحترام ذكرى من مات وندعوا الله أن يجعل آخر أعمالنا أصلحها ، وأن يجعل آخر كلامنا لا إله إلا الله ، محمد رسول الله
وبإذن الله نجتمع تحت ظل عرش الرحمن لأننا نحب بعضنا في الله دون النظر لأي غرض دنيوي زائل

Hosam Yahia حسام يحيى said...

بوست جميل ومؤثر جدا جدا

اللهم ارحمنا اذا غشينا التراب

ونسينا الاهل والاحباب

سنووايت said...

موضوع في وقته
اظنك عارفة السبب
ربنا يرحمنا ويهون علينا فراق احبابنا ويهون عليهم فراقنا

د/اجدع بنوته said...

هى الدعوه

الحلوه

والسيره العطره

اللى بتبقى لينا ع الدنيا

والعمل الصالح

اللى بيبقى معانا ف الاخره ياعلام

د/اجدع بنوته said...

اللهم ارحمنا اذا غشينا التراب

ونسينا الاهل والاحباب

يارب ياحسااااااام

د/اجدع بنوته said...

عارفه ياسنووايت

ربنا يرحمهم يارب وف الجنه ونعيمها

ويرحمنا جميعا

عصفور المدينة said...

فما أوتيتم من شيء فمتاع الحياة الدنيا وما عند الله خير وأبقى للذين آمنوا وعلى ربهم يتوكلون

Anonymous said...

والله أنا برضه هازعل وهافتقدك و أفتقد المناقرة معاكي , و البيزنس الفاشل اللي بنعمله .............. مع تحياتي

3araby said...

بوست درامى جدا , ولا يقل عن روحك الحلوة فى الكتابة وده بثبت كفاءتك غى الكتابة على كل لون كوميدى و دراما و تشويق .. بسم الله ما شاء الله .

بالتأكيد الدنيا لا تقف على احد , و كلنا فى قطار الحياة وكل واحد مننا له محطة هينزل فيها .اهم شئ حب الناس لبعض والمحبة تكون لله وليس للمصلحة .. كمان اللى بيفكر الناس بشخص يتوفى هو السيرة الحسنة التى تظل فترة طويلة ذكرى لاقرب الاقارب و الاصدقاء , هذا كلام فعلا عن تجربة مع اعز اصدقائى كان قد توفى ولكننا حتى الان مازلنا نتذكر سيرته الحسنة و ندعو له ولامه بالصبر .

وطبعا الحمدلله عامل حسابى انى ممكن انتقل للدار الاخرة فى اى وقت لذلك لست قلقلا لانى عارف انى لم اغضب ربي ,
كمان انا سيبت البلوج و الباسوورد لاحد اصدقائي الذى سيقوم بنشر الخبر ... فهذا هو حال الدنيا .

برافو يا دكتورة على البوست الجميل ده اللى واثق انه هيفوق ناس كتير ناسية ان فيه حقيقة اكيدة وهى ان لكل فرد نهاية ..

وشكرا واسف للاطالة .

فرنسا هانم said...

ربنا يخليكى لبابا وماما
وللناس اللى بتهنجى اميلاتهم
واللى بتتعفرتى عليهم
ولخالتك فرنسا هانم
وخلينا احسن فى الوجه الضحوك

ابن حـجـر الـعـسـقـلانـى said...

آآآه ... و الله الموضوع تعبنى جدا

HERO said...

انا اللي هيصعب عليا فعلا المدونة لأنها هتفتقد دم خفيف موزون في نفس ذات الوقت وبتعبري عن رأيك في خفة ظل

عجبني الموضوع وفكرني بحاجات كتيير

صوت من مصر said...

بجد عايز اقولك انى نفسى اعيش لوحدى من غير حد يرخم عليه ولا ارخم عليه

د/اجدع بنوته said...

ربنا يرزقنا بمتاع الاخره يارب

يابابا عصفور

بنت الصالحين said...

ياه يابنوته

بخاف اوي انا كمان

بدخل تحت التراب

لوحدي

بخاف اوي



يارب هون علينا سكرات الموت ويسر حسابنا
واغفرلنا خطايانا

ربنا يكرمك يابنوته

د/اجدع بنوته said...

تفتقد المناقره والبزنس الفاشل يانبيل

الله يكرمك يااخى

د/اجدع بنوته said...

ما هو النظريه ياعربى

ان كلنا عارفين

بس الاحساس نفسه


ربنا يقوينا

د/اجدع بنوته said...

ربنا يخليكى ياخالتو

انا قولت

اوريكو كل الوجوه

ههههههههههه

د/اجدع بنوته said...

اسفه والله

لو كان سببلك اى تعب ياابو العساقيل

د/اجدع بنوته said...

شكرا جدا ياهيرو

قلبت عليكم المواجع يعنى

لا حول ولا قوة الا بالله

د/اجدع بنوته said...

تعيش لوحدك فين يامحمد قولنا كمال

اقولك روح موت يعنى

لا طبعا مفيش احسن م اللناس وعشرتهم

تحياتى

د/اجدع بنوته said...

يارب ياعاشقة الفردوس

وينولنا الفردوس جميعا

بنوته مصرية said...

يااااااااااه

انتي تعرفي ساعات اتخيل منظر اهلي

وشكل جوزي ازاي وافكر هيفضل اد ايه زعلان وهيتجوز ولا لاء


وبنتي وهي بتعيط عليا وتقول مامي فين

دانا لو سبتها ونزلت برجع الاقيها موته نفسها من العياط

ساعات بكون انانية واقول تموت معايا علشان مش تبهدل وارجع اقول يارب احفظها واديها طولة العمر

وارجع اقول الانسان كل ما بيعيش بيشيل ذنوب وافكر في الحرام والحلال

وافكر في لبسي اني عاوزة اغيرة وانتظم في الصلاه وازاي اربي بنتي تربيه اسلاميه وازاي اخليها تحفظ قرءان
حاجات كتيرة بفكر فيها وبخاف من الموت

بس ربنا غفور رحيم
ربنا يرحمنا برحمته ويغفر لينا ولا اموات المسلمين يارب

خوفتيني اووي يا بنوته

ربنا يديكي الصحه وتبقي عروسة جميلة

هوندا said...

اجمل حاجة تريح الواحد المحاسبة الدوريه للنفس
لو مطلعتش كل يوم خطوة لقدام فى علاقتك مع ربنا هترجع لورا لان محدش بيثبت مكان
ربنا يهدينا ويهدى بنا ويجعلنا سبب لمن اهتدى

عايز أتعلم said...

ياااااااااااااه
بوست جميل ومؤثر يا دكتره
بس نسيتي حاجة من اللي هيقوللنا عنك لو لاقدر الله حصللك حاجة
الكمبيوتر هيفتكر بس مش هيقول ......هههههههههههه

عايز أتعلم said...

أرجو زيارة مدونتي ..تم افتتاحها من يومين

الفارس الملثم said...

بداية شكلك عاملة قلق في المنطقة وعلي النت مممممممممممم

بصي اكيد كل واحد فينا فكر في الموت ,وساعات لما بتضيق علينا دايرة الحياة وتوجعنا الدنيا بمتناقضاتها بنتمني الموت كطريقة اخيرة للخروج من دوامة الحياة دي
لكن طبعا الموت والحياة بايد اللي خلقنا وحده وهو فقط اللي يعلم امتي انغادر الدنيا

كمان الموت انا بشوفه اشبه ببحر كبير اوي ومحدش يقدر يدعي ان اجتيازه ايكون بالامر الهين

في نقطة اخيرة ياتري لما الواحد يموت الناس اللي يعرفوه ايفضلوا فاكرينه ولا ايسقط سهوا من الذاكرة بمرور الوقت
تقبلي مروري

رفقة عمر said...

يابنتى وجعتيلى قلبى
وابكيتينى ربنا يطيل عمرك مع حسن عمل وحسن خاتمه اللهم امين
حلو اننا نفتكر الموت حتى نحسن من اعمالنا ونزداد قربا من ربنا
ربنا يبارك فيكى ويقدر لك الخير اللهم امين يارب العالمين
احبك فى الله

Unknown said...

ياااااااااااه
صعبه اوى الكلمات دى
انا برددها كتير برضه...بس بيتعبنى طول التفكير فيها
تذكرة مؤلمه موجعه...لكن لا مفر منها
ربنا يرزقنا حسن الخاتمه
خالص تحياتى لكى اختى العزيزه
انى احبك في الله

Anonymous said...

انتى عبرتى عن كل واحد فينا كلنا بنحس بنفس الاحساس ربنا يتغمد الجميع برحمته

semsem said...

يااااااااااااه كلنا حسينا وفكرنا فى الاحساس ده
ياااااااااه
يارب اغفر وارحم وانت خير الراحمين
يااااااااااه
صعب اوى الاحساس ده
وربنا يخليكى لاهلك وصحابك ولينا يا اجدع بنوووووته

تــــايه ومش تـــايه said...

المه اننا نعمل حساب يوم زى ده
ومش مهم بقا ايه اللى هيحصل بعد ما نموت

د/اجدع بنوته said...

ربنا يخليكى يااحلى بنوته مصريه

ويباركلك ف بيتك وجوزك وبنتك يارب

د/اجدع بنوته said...

ربنا يهدينا يارب ياهنودا

د/اجدع بنوته said...

ههههههههههههه

متقلقش يااخو الدكتور الحر

خبرى هيوصلكم باذن الله

بس قولوا يارب

ههههههههههه

د/اجدع بنوته said...

كمان الموت انا بشوفه اشبه ببحر كبير اوي ومحدش يقدر يدعي ان اجتيازه ايكون بالامر الهين

الله ع تشبيهك يافارس

د/اجدع بنوته said...

الف سلامه عليكى م وجع القلب

د/اجدع بنوته said...

يارب يرزقنا جميعا حسن الخاتمه

وانا كمان احبك ف الله

ياحطم قيودك

د/اجدع بنوته said...

ربنا يقوينا ياحماده

د/اجدع بنوته said...

ربنا يخليكى ياسمسم

ربنا يقوينا فعلا ع الاحساس ده

د/اجدع بنوته said...

وجهة نظر برده ياتايهه

آفاق الحرية said...

اجدع بنوتة
مش عارف بصراحة اعلق اقول ايه
بس هو فعلا كفي بالموت واعظا

د/اجدع بنوته said...

كفى بالموت فعلا واعظا

تحياتى افاق الحريه

Unknown said...

ايه ده
هيه دي المدونه اللي أنا عارفها ولا لا
انا دخلت ولما لقيت الاستايل متغير
طلعت تاني
وبعدين دخلت تاني
كده احلى
مبروك
أنا عرفت ان هيه دي المدونه من وسطنه الكلام
:)
هاقرأ واجي تاني

مدحت محمد said...

كويس انى الانسان يفتكر الموت
بوجه عام
بيقربه من ربنا

د/اجدع بنوته said...

اه هى المدونه يااحمد

هههههههههههه

شكرا

بس انت كنت تايهه ولا ايه

د/اجدع بنوته said...

يارب دايما قريبين م ربنا يامدحت

Empress appy said...

اخص عليكى يا سمسمه انتى كده زعلتينى وانا بقول عليك الابتسامه الحلوة على قلبى
بص يا ياسمين عمرى ما خوفت من الموووت الحمد لله اما اهلى وناسى واصحابى وكل اللى قولته ممكن يفتكرونى عارف ليه علشان انا مش بعمل حاجه وحشه فى حد وانتى اكيد كده يا سمسم

فقاقيع كلام ـ شروق الشمس said...

السلام عليكم ورحمة الله وبركاته..،

بتخيل في الجنة ـ ربنا يرزقنا كلنا دخولها ـ هنتقابل وهنعرف بعض

أنتي كنتي مدونة كذا

اه صح أنا كنت بعلق عليكي

ونفضل نقول آراءنا في مدونتنا

وهيكون في انترنت وماسنجر؟؟

ولا هتكون في معايير تانية للنعيم

ربنا يرزقنا الجنة وما قرب لها من قولا أو عمل

dr_modymodak said...

حلو اننا دايما نذكر نفسنا بالموت بس الاجمل اننا نعمل لمثل هذا اليوم

فان اليوم عمل بدون حساب وغدا حساب بدون عمل

اللهم ارزقنا الميتة الحسنه واجعل مثوانا الجنه

انا حاسس اني في خطبة الجمعه ههههه جميل يا سمسمه

د/اجدع بنوته said...

تمام يا يا أأبى بس الفراق صعب برده

ومتقلقيش باذن الله هفضل بلسم قلبك ع تول

(a)(a)

د/اجدع بنوته said...

فقاقيع _كلام_شروق شمس

مبدئيا كده الاسم ملهوش حل

يارب يرزقنا الجنه جميعا

بس يبقى ف نت وشات دى صعبه ياشيخه

د/اجدع بنوته said...

هههههههههه يامودى

لا تنفع تخطب يادكتره

هديـــل الـروح said...

السلام عليكم ورحمه الله وبركاته ،،
أطال الله فى عمرك يا بنوته ،، زعلتينى كده وأنا بقرأ البوست على فكره أنا أول مره أدخل على المدونه بس اتأثرت بالكلام أوى ،،ربنا يحميكى ويرزقك يا رب

د/اجدع بنوته said...

ربنا يخليكى ياسلمى

بس الموت هو الحقيقه الوحيده ف الحياه

لا مفر