.. الحكومه م استاد البلوجرز الدولى vs الشعب

العواف عليكم ..

نحييكم .. ونقدم لكم .. المباراه النهائيه لكاس مصر ..

مباشرة م استاد البلوجز الدولى .. معكم الكابتن سمسمه فروه

مباراه تنبأ ستادنا البزرميطى بانها ستكون حامية الوطيس ..

الحكومه vs الشعب

زى مااحنا شايفين قدامنا المنتخب الحكومى بالفنلات البيضا والجزم الاديداس السيلفر

منوريين ف ارض الملعب

ايه ده .. ايه ده .. شايفين اللى انا شايفاه ياجماعه

وانتو تشوفوا ليه اصلا .. اما شعب ابن طماعه ميملاش عينه غير التراب

زى ماانا شايفه .. ان وزير الاعلام مش موجود ف الملعب

و ع دكة الاحتياطى وزير الاسكان .. وزير الاستثمار .. وزير البيئه والبتاع ..

ونزل الملعب فريق الشعب بفنلاتهم السودا وكوتشيات باتا (( متانه وخياطه))

وزى مااحنا عارفين ياجماعه ان باتا شىء يفخر بيه كل مصرى ..

زى مااحنا عارفين ان باتا ابتدت سنة

ايوه وزى مااحنا شايفين الحكام نزلت الملعب .. كابتن شلضم ابو دومه ..

وحاملى الشومه الكابتن مصطفى سنجه والكابتن عبده دهشور ..

ومع انطلاق صافرة كابتن شلضم .. ابتدت المباراه

خرج كابتنا شلضم ربع جنيه مخروم .. اختارت الحكومه الوش ..

وبرده اخدت الضهر .. الحكومه تاخد كل حاجه ياغجررررر

حدف الحكم الربع جنيه .. منزلش الربع جنيه .. اشار الحكم ان الكوره مع الحكومه

ابتدت المباراه .. الجماهير تتعالى هتفاته مصر مصر تحيا مصر .. مصر يااما ياثفينه

الكوره مع السيد الفاضل الوزير على مصيلحى .. ترقيصه .. يباصى لوزير الصحه

ترجع للدكتور على مصيلحى .. وجوووووووووووون م برا ال 19 .. الله عليك الله عليك

(( المواطن المصرى يستطيع ان يعيش ب ثلاثين جنيها شهريا لا غير ))

الكوره دلوقت مع الشعب .. تتقدم نقابة المعلمين .. يراوغها وزير التعليم

ولكن ياووووووووولد جووووووووون .. هو ده المدرس المصرى النيل رواه والخير جواه

(( يقتنص المعلمين الكادر الخاص بزيادة راتبهم بعد طول معاناه))

الكوره دلوقت مع السيد الوزير حاتم الجبلى .. شنكله وكعبله ف وسط الملعب

صفاره وشاره .. ركنيه ع الشعب .. يلعب الركنيه السيد وزيرالسياحه

تسقيطه وجوووووووون .. الجون التانى للحكومه احرزته السيده عائشه عبد الهادى

(( المجتمع المصرى به فائض م وظائف العمل لا تجد م يشغلها .. لذلك لا يوجد مايسمى بالبطاله ))

الكوره مع الشعب .. والنتيجه 2/1 والجماهير عليت بالهتافات ياجماعه

تسقيطه لنص الملعب .. توصل لنقابة الصيادله .. تشابك شديد و يسحبها منهم وزير الصحه

((ضجر الصيادله م قرارات الخاصه بجداول الادويه وحبس الصيادله المخالفين ))

كوره عرضيه رائعه .. تخلصها الضرائب العقاريه بنجاح ..

(( اضراب العاملين بالضرائب العقاريه مطالبين بزياردة رواتبهم ))

ون تو لنقابة الاطباء .. ولا ارووووع .. ياجماعه الناس دى مش نازله تهزر

(( تهديد الاطباء بالاضراب ف حالة عدم الموافقه ع كادر الاطباء ))

اىىى شنكله .. نقابة الاطباء ع الارض ..

ايه ده لا فيه كارت ولا شاره ولا صفاره ولا حاجه

ماعلينا .. ياجماعه الكوره اجوان .. الاسعاف دخل وشال نقابة الاطباء

ان شاء الله خير ياجماعه

ايه اللى انا شيفاه ده .. مدرب الحكومه بيسخن ونزل الملعب

مش ممكن ياجماعه المباراه دى هتدخل التاريخ ..

الكوره دلوقت مع مدرب الفريق .. باكتساح

عابر المستطيل الاخضر كامل .. يطويه كمن يطوى قميصه بعدما كواه

ايه ده .. محدش قادر يسلك الكوره ياجماعه .. ايه اللى بيحصل ده

ايه اللى انا شيفاه ده

جووووووووووووووووووووووووووووووووووووووووووووون

رائعه للسيد الدكتور قائد الفريق احمد نظيف

(( ليس م حق اى موظف حكومى ان يضرب عن عمله .. عايز تعترض

اعترض براحتك محدش قالك متعترضش .. مارس عملك عادى

بس علق شاره سودا ع كتفك حدادا ع مطالبك اللى ابقى قابلنى لو طولتها

بعد متخلص ساعات عملك الطبيعيه خد زمايلك اللى عايزين يضربوا معاك

واطلعوا هاتوا شمسيتين وكرسيين واقعدوا ساعه اعتراض قدام محل عملكم

قانون العمل بيقول ان مش م حق اى موظف انه يضرب .. فاهمين .. ولا ليلتكم هترسى ع ايه

يعنى انتم موظفين حكومه محترمين لابسين جزم باتا محصلتش .. تيشرتات سودا ماركة اتقمع واتلمع

مش عاجبيكم .. شايفين اى عامل ف شركه او مصنع خاص بيضرب .. لا طبعااااااااااااااا

لانهم ناس اخلاقهم عاليه بغض النظر عن انهم واخدين حقوقهم وع قد مبيشتغلوا بياخدوا ..

لكن كفايه انك موظف حكومى بتخدم بلدك .. يعنى انت لو بتحب بلدك تشتغل ببلاش

دى مصر انتو فاهمين مصرررررر ))

.......

واخيرا اطلق الحكم صافرة نهاية المباره ..

ويبقى الوضع كما هو عليه ..

.. هذه الخربوشه ليست للسخريه م احد ..

حاشا لله ..

.. ولكن تعبيرا عن مواقف واراء مضاده ف اطار ترفيهى ..

.. اكن لجميع م ذكرتهم المزيد م الاحترام ..

.. تمنياتى للفريقين بالنجاح والفوز بالكاس مناصفه

.. حتى نحيا ف سلام ..

كان معكم زى مقلتلكم ف الاول مش فيلم هو

كابتن سمسمه فروه

تششششششششششششش

ااقفلى التلفزيون يافوزيه

..
قفلته يااخويا .. كورة ايه وهم ايه .. صحتك بالدنيا

الوجه الاخر للضحوكه دائما .. للكبار فقط

.. كل اما اشوف عمرى جرى بيا ..

بخاف

.. كل اما تدبل وردتى فيا ..

بخاف

.. بخاف .. لتموت الفرحه ..

.. بخاف م الدنيا الجارحه ..

هموت .. هسيبهم ..

خلاص مش هشوفهم ..

خلاص علاقتى بالدنيا انتهت ..

خلاص للابد .. خلاص مبقاش فيه قعدة صحابى

خلاص مبقاش فيه شات .. خلاص مبقاش فيه اكل

خلاص مبقاش فيه ماما ولا بابا

اااااااااااااه

رايحه لربنا .. اه فرحانه ومبسوطه اوى .. بس ايه .. لوحدى ..

تحت التراب .. روح تخرج .. قصه تنتهى .. ذكريات ونزل عليها تتر النهايه

ناس بتبكى .. بس هتنسى ..

امى هتفتكرنى .. لما تدخل اوضتى تلاقيها فاضيه

لما متسمعش صوتى الصبح بقولها .. انتى ياست انتى فين شرابى البمبى

اللى انا اصلا معنديش شراب لونه بمبى

وابويا هيفتكرنى لما ميلاقيش العربيه كل تلات ايام عطلانه بسببى

هيفتكرنى اكيد لما يصحى الصبح يلاقينى اكلت البقسماط كله اللى جابه امبارح بليل

علشان نفطر بيه الصبح

صحباتى هيفتكرونى لما ميلاقوش موبايلاتهم بترن الساعه 3 بليل

زملاتى ف السكشن هيفتكرونى لما ميلاقوش حد يلم كانريهاتهم علشان الدكتوره تاخد الغياب

جيرانى هيفتكرونى اكيد لما ميسمعوش صوت سرسعه الساعه 4 الفجر اصل ياسمين بتزاكر

وبتغنى بقى المبدعه بسلامتها

صحابى ع النت هيفتكرونى لما ميلاقوش حد كل شويه يبعتلهم نيدنج ورينج ويطلع اوف لاين

ويدخل تانى يهنجلهم اميلاتهم

كمبيوتر بتاعى هيفتكرنى .. لما ميلاقيش حد ينضفه والتراب يكركب عليه

لبسى هيفتكرنى لما ميلقيش حد يلبسه ولما يتزنق يقعد بيه ع اى عربيه فيات قدام الكليه

قلامى هتفتكرنى لما ميلاقوش حد بيقرقض فيهم وولما يتعصب يحدفهم واحد ورا التانى م شباك المنور

مصحفى هيفتكرنى .. لما ميلاقيش حد بيفتحه وينزف دموع جواااه

انتم هتفتكرونى .. لما متلاقوش حد بيتعفرت ف مدوناتكم

هيصعب عليا امى وابويا اوى .. انا قردتهم الوحيده هههه اه ع اساس ان احنا عايشين ف جبلايه

هخاف اوى .. وانا لوحدى هناك

بضحك وانا بين نفسى وبينى خوف الدنيا كله ملينى

بخاف .. نتفارق .. بخاف يسبونى

كل اما احن لناس حبيتهم .. قلبى يحس بشوق ناحيتهم

ااااااااااااه .. اللهم هون علينا جميعا سكرات الموت

اااااااااااه .. يارب رحمتك .. يارب غفرانك .. يارب جنتك

يارب زهد دنيتك .. يارب محبة رسولك .. يارب بصمه حلوه ف دنيا زوال

!!.. اعلام مفتـوح .. بزراير مفتوحـه .. لامؤاخذه

اعلام واقمار ..اوربى وهندى .. غزو سماااوى وسمماوى ( بتشديد الميم ) ..

وافكار بتدخل .. وثقافات بتبث كالسم الزعاف .. شخصيات ضعيفه ..

تربه خصبه .. مستقبلات جيده .. تمتص هذه الافكار .. لتنبت لنا اجيال جديده بفتكير مسخا

لا هو بتفكيرنا ولا هو بتفكيرهم .. ولكنه مزيج من طبائع وعقليات لا تفيد اكثر مما

تضر .. تؤثر فينا وفى مجتمعاتنا .. لا تظهر هذه النبتات اليوم ولا غدا ولا بعد غد ..

تظهر على المدى البعيد تجد نفسك متسائلا كيف فعلت ذلك .. هذا ليس انا ..

نعم سيدى .. هذا ليس انت .. هذا هو نتاج الطفره السلوكيه الجديده الناتجه عن تأثير خارجى ..

لما يسموه بالاعلام

الاعلام .. تلفاز .. وصحافه مسموعه ومرئيه .. راديو .. وغيره

الكل اجمع ان للاعلام تأثير قوى ابتداء من تحرييف فى رؤى سياسيه وقضايا لم نعاصرها ..

مرورا بتشوييه افكار وسلوكيات ثابته .. وبث افكار جديده باساليب غايه فى الدهاء ..

الفيديو كليب .. احدى الاساليب الماكره سالفة الذكر .. اتخذوه ظاهريا وسيله للتعبير عن كلمات الاغنيه

واحساسيس المطرب وعاطفته وما الى ذلك من فتيات راقصات كاسيات عاريات بحركات وشقلبظات ..

الشباب الا من رحم ربى عايز يظيط ويشوف اللى عمره مهيشوفه الا بعد ماربنا يكرمه ويتجوز ف الالفيه

الجايه .. ده ان لحق كمان .. بيحبوا جدا الفيديو كليبات ..

وبنات الفيديو كليبات .. واللى بيظبطوا شعر بنات الفيديو كليبات .. وجيران بنات الفيديو كليبات ..

البنات لا .. بيكرهوهم كره العما ..

منهن اللى بجد بيكرهم علشان دينهم واخلاقهم .. بتشوف ان ده سلوك خارج فى الممنوع ...

وفى منهن اللى بيكرهم علشان اكلين الجو منهم ..

والشباب بقت عايزه ترتبط ببنت زى اللى فى الكليب مع الحصان .. او مع التعبان حتى ..

ولذلك اصبحت الفتيات تتبنى سياسة خاصه فى سلوكياتها ولبسها وتصرفاتها ..

تحت مظلة الشباب عايزين كده ..

والشباب موافقين .. تحت مظلة وايه يعنى اهم يظيطونا ..

مع نيه خفيه بانه لا ياحلوه يوم مرتبط مش هرتبط بواحده لبسها وتصرفاتها كده ...

وفى شباب تتظيط وترتبط وايه يعنى وبعدين يبقى يغيرها ويربيها تانى

ولما الدنيا تبقى كده والبنات الاولنيين يلاقوا البنات التانيين متظبطيين ..

والشعب كله بيجرى وراهم ..

يحسوا بالنقص ويعملوا زيهم بقى .. وتبقى هيصه

الطريف .. ان الشباب شايفين ان البنات بكده بقم سلعه رخيصه ومش محترمين ..

ومن جواهم بيحتقروهم ..

وبيدعولهم بالهدايه .. وان بعد ده كله .. ربنا يرزقهم بالاهبل اللى يتجوزهم ..

الاطرف بقى .. لما هو كده متواجهوا البنات اللى كده بالحقيقه كده يمكن يتغيروا كده ..

انتى بتهرجى ياحجه تحرمينا من الفرجه ببلاش ..

ده حتى الجامعات تقفل والواحد ميبقاش ليه نفس يتعلم

والله .. ده هما الحته الطريه اللى فى الحياه

طب ودور البيت معانا ايه .. تؤ .. بيوت كتير .. واهالى بنات كتير بقوا شايفين ان ده العادى ..

عايزين يفرحوا ببناتهم .. ويشفوهم موزه .. لوكشه يعنى ..

وبيخافوا عليهم كمان ليعنسوا جنبهم .. فبيسمحولهم يلبسوا كده

وفى اهالى تأبى ان بناتها تخرج بلبس كده .. بس لو ادوا لبناتهم فرصه يلبسوا كده ..

اه فى من البنات دى اللى هتلبس ولما هتصدق .. وفى اللى هتتمسك بلبسها المحترم ..

بس الاغلب هيلبس ويدلع..

الظريف بقى .. يا .. شباب .. لو انتم كنتم بنات كنتم هتعملوا ايه .. واللى حصل كالاتى


هراعى نفسى اولا ودينى ... ** ربنا يبارك فيك ويكتر من امثالك

هاجرى رجاله تجاره ورايا ... ** عربية الرش جت ياولااااااااااااه

ممكن كنت امشى ع الموضه برده ... ** فعلا الشيطان شاطر

الله اعلم تفكيرى هيوصلنى لايه ... ** اه ياسوسن وكمان بتشربى بيبسى

كنت هلتزم شرع ربنا ... ** الله اكبر ولله الحمد

غالبا كنت هروش لان الواد عايز واحده روشه ... ** هو فى كده ياناس

كنت هعرف كل يوم ولد ... ** تاااااااريخ والله

كنت احترمت ادميتى ... ** اكيد ده فى طب

كنت مشيت على اللى يناسب مجتمعى ... ** مسك العصايه م النص يعنى

كنت بقيت روشه بس مش مسخره ... ** افادكم الله


طب يابنات ..

لو انتم كنتم شباب وكنتم تعرفوا بنات بالمواصفات دى شعوركم هيكون ناحيتهم ايه .. وكان الاتى


عمرى ما كنت افكر ارتبط بواحده كده ... * * البنات تقلب شباب معييز برده هيفضل تفكيرهم فى الجواز

احب اتعرف على شخصيتها ... ** متنسيش تبقى تقريها من اول السطر

النصح مش اكتر .. ** الاسعاف على 123 .. هو فى حد بيقبل نصح الايام دى

عادى هبصلها كتير ... ** السطووور تحت بعضيها .. سين .. ياشين

هابص الناحيه التانيه .. ** طب عينى ف عينك كده

هاحسسها بنفسها .. ** طيرى ياطياره طيرى

عمرى مابصلها لانها عايزه نديها اهتمام .. ** شكلك فاهمه ياام غاده

هاضحك عليها ... ** وش كده

هاحب اعرفها واتمنظر بيها .. ** بس هتحبيها موديل كام ..


ده واحده من ملايين الافكار السممومه اللى بتدخل بيوتنا يوميا ..

لبس .. سلوكيات .. مواقف .. ثقافات مغلوطه ..

وده صوره معكوسه من البؤره لاحدى تأثيرات الاعلام على بناتنا وشبابنا ومجتمعنا ككل


كان معكم من نفس ذات البؤره ..

د/اجدع بنوته