النهارده .. قريت خبر قتلنى م التفاهه
سلاموو عليكم الاول
زوجه تخلع زوجها بسبب وجبة كباب
أحالت المحكمة العامة بمكة المكرمة دعوى زوجة طالبت بالخلع إلى لجنة إصلاح البين
التي عجزت عن الآصلأح بينهما لتقترح التفريق بينهما على أن تعيد الزوجة نصف المهر .
كانت الزوجة قد دعت صديقاتها لتناول وجبة عشاء حيث طلبت من زوجها إحضار ثلاثة كيلو كباب
إلا أن الزوج احضر اثنين فقط .. وبعدما قدمت الزوجة الطعام لضيفاتها اكتشفت انه ليس كافيا
وشعرت بأن زوجها أوقعها في حرج بالغ. وتركت الزوجة على الفور زوجها وذهبت إلى بيت أهلها
ولم تفلح محاولات الزوج لإعادتها بعد اتهامها إياه بالبخل حيث تقدمت بطلب الخلع إلى المحكمة العامة
هع .. هعتين .. تلات هعااات .. مين هناااااااك
.
ده انا ع كده باذن الله .. ابو العيال يوم ميعطس واسمعله صوت
.
اطلب الخلع ع طول .. لا ولا مش ناقص ادخل الاقيه بياكل قدامىى
.
مطلع معلقه وبياكل .. اياااى .. ع بيت ابويا ع طول
.
ومش ناقص بقى غير انه يدخل التواليت زى بقية خلق الله
.
ده هيبقى بيستعبط اوى ... ولا ولا يكون بيلبس شبشب بصباع
.
او بيحب المسقعه ... ده يبقى اتجنن رسمى
.
تحبى تخلعى جوزك ليه يامدام ؟؟
بيحط برفيوم دااارك ماان وانا مبحبش ريحته ياسعادة القاضى
.
انشالله عنه مااحط ولا يحط كالونيه ست خمسات حتى
.
يالهوى ياجدعان وصلت تفاهة زوجه انها تخلع جوزها علشان جبلها
.
اتنين كيلو كباب بدل تلاته ... ياستى المحل شطب
.
انا افتكر زمان .. لما كان يرجع واحد لمراته يقولها
.
اخ نسيت اجبلك الخضار ونسيت ونسيت ونسيت ونسيت
.
وضيعت المرتب وعملت حادثه بالعربيه وفصلونى م الشغل
ولازم نعزل م هنا وهنقعد ف الشارع واحتمال اطلقك قريب
.
ترد هى عليه وبكل برائه .. المهم صحتك بالدنيا يااخويا
.
دلوقت لا صحه ولا بتاع
..
حبيبتى سورى جبتلك جلاكسى فلوتس .. بدل جلاكسى اللى بالبندق
.
طلقنى ياحبيبى
..
ياعينى ع قداسة الحياه الزوجيه
..
كان زمان الراجل يمسك مراته يعلقها ف عمود النور ولا حد يقوله هو ف ايه
.
.. قولنا ماشى معاكم حق حرام العنف ضد المراه
.
دلوقت بقت الستات هى اللى بتضرب اجوازها وبالشبشب وعهد الله وطلعوا فتوه انه حلال
.
كان زمان الراجل يهدد الست كل شويه بالطلاق
.
قولنا ماشى تاخد هى كمان حق الخلع علشان لو مطلع سيئتها تاخد حريتها منه
.
لكن تتخلع علشان جوزها بيمضغ ع الناحيه الشمال وهى بتمضغ ع الناحيه اليمين
.
هل كل مابنبعد عن شرع ربنا ياجماعه كل مابينهار المجتمع
.
التكنولوجيا ليها اضرارها
.
هتقعد ع كمبيوتر وتكلم عمك اللى ف غانا وخالتك اللى ف زمبابويا
.
بس ف نفس الوقت هيجلك استجمتزم (( نوع جديد م جلاكسى بالرومان
..
هل ع هذا الميزان نقدر نوزن .. قضيتنا النهارده
.
كل مابعدنا عن شرع ربنا كل ماانهار المجتمع
.
ربنا قال الراجل اللى يطلق .. عملنا الخلع .. ادى احنا شايفين
.
الشرع قال الراجل مأذون وقاضى وحاكم .. دلوقت بقى ف ست قاضيه ومأذونه وحاكمه
.
فعلا .. ربنا خلق الكون والبشريه .. وادانا كاتلووجه
.
شرع الله
..
عايزين بقى يطوروا ف الكتالووج .. يستحملواا بقى
.
الرامات هتضرب
..
والبروسيسور هيلم هدومه ويروح عند امه
.
علشان المزر بورد .. ظبطه .. متلبسا ...بيــ
.
يلا ان الله حليم ستار
.
وملحوظه لاى راجل .. قبل متكتبلها القايمه يابنى
.
تكتبلك هى قايمه بالافعال اللى ممكن تخلعك عليها
.
علشان تضمنلك مستقبلك برده
.
مش بعد متاخدك فورد ترميك فيات 124
.
وياستات .. بطلوااا تفاهه بقىىى
.
بدل متخلعيه علشان بيشرب شاى .. احبسيه ف اوضة الفيران
.
وخليه يشربه هناك براحته
.
القاكم عما قريب
28 comments:
ههههههههههههههههههههه
ضحكتينى يا دكتورة ياسمين وانا بقالى فترة معتزل الضحك
بس بجد الموضوع كارثة وربنا يخلى لنا جمعيات حقوق المرأة
بسبرضو احب اطمن الشباب ان الموضوع مش بالساهل كده الست بتطلب الخلع ودى قضية وعندنا فى مصر الموضوع بياخدوقته مش زى داليا البحيرى فى محامى خلع من اول جلسة كمان بالخلع تتنازل المرأة عن جميع حقوقها الشرعية وده عز الطلب هو حد يطول يخلص من مرأته باقل الخسائر
كمان لو الراجل حابب يعذب الزوجة فى كتير قوى الاعيب ملتوية لعمل مشاكل للزوجة عموما انا دارس الموضوع ده كويس اى حد مراته تلمح له بالخلع يدينى رنة
هههههههههه
يخرب عقلك يا سمسه
بدل ما تخلعه تحشيه طيب
نحن معشر الرجال نشكر الدكتورة الجدعة على هذا البوست
ههههههه
حلوة اوي فكرة قائمة الافعال اللى ممكن تخلعه عليها .. هتحل مشاكل كتير
على فكرة الصورة كمان عجبتني اوي
يبدو ان الست دي عندها خبرة كويسة في فن العصر ..
تحياتي
الست دي صاحبة مبدأ
ازاي الراجل دا يجيب 2 بدل 3
ثم انه طالما سرق في الكباب مين عارف هايسرق في ايه تاني
مش فاهم الرجاله هيبطلوا ظلم امته
السلام عليكم
ازيك يا دكتورة
كويس إن الموضوع المرة ديه صغيور...مع إني بحب مواضيعك كلها مهما طالت او قصرت بس للضرورة احكام بقي وقلة الفضي بقي
مش زيكم فاضيين ال 24 ساعة مش لاقين حاجة تعملوها
جتنا نيلة في حظنا الهباب
دا مش ار ولا حسد ولا نق
لالالالالالالالالالالا...انا مش بتاع كدا
دا حقد ونفسنا ولا مؤخذه
المهم عجبني جدا إن الموضوع دا يطلع من ذوات الاظفار الطويلة
والحمد لله إن إحداهن اعترفت إن بنات حواء تتصف بالهيافة في اغلب الاحيان...مش كلهم طبعا
انا عارف إن نسبة كبيرة اوي منهم قد
تصل الي 2% عاقلين وكويسين
وهي دي كانت الحكمة من إن ربنا عز وجل جعل امر الطلاق يبقي في يد الزوج مش يد الزوجة
والا وجدنا كل رجال المجتمع في محكمة
الاسرة رافعين شعار اريد حلا
ربنا يهدينا ويهديهم
انا بقي لو مكان الراجل بتاع الكباب دا بعد ما ارمي 3 يمين طلاق في وش الزوجة المظلومة اكسرلها بيهم منخيرها اروح للي اكلوا الاتنين كيلوا كباب في بيوتهم
واخد حقه منهم
مش هيبقي موووت وخراب ديار
معلش طولت عليكي في التعليق يا دكترة....
وجزاكي الله خيرا علي السؤال
بس والله انا نفسي اكتب أو حتي ارد علي
الناس بس مفيييييييش وقت
ادعيلي ربنا يباركلي في الوقت
سلام يا اجدع دكتورة
هههههههههههه
ازاى راجل يشخر في بيته ؟ ده تسيب .. ده استهتار ..
أنا لو مكانه هاشخرلك بسبب وبدون سبب .. ولما اخرج هاجيبلك شخّارة بالكهربه
..... جامد آخر حاجة
بس على فكرة انا بختلف معاكى في موضوع الخلع ده .. الخلع ده حق شرعي للمرأة .. طبعا فيه حديث وموقف في السيرة مش فاكره .. بس ده حق المرأة الشرعي عشان الراجل مش يعذبها ويسيبها معلقة
عموما موضوع من الاخر
أبورمّانة
هههههههه
علشان تعرفوا قد اية الستات مفتريين
والرجالة غلابة ومرغمومين علي امرهم
هذا هو العصر الحالى الذى نعيش فيه اخوانننا فى غزه لم يجدوا الطعام وهى تطلق علشان كليو كباب
دول ناس فاضيه ما وراهمش حاجه
دى بدل ماتتبرع بالزياده للاخواناها فى غزه عرفتى احنا ليييه الكل بيدوس علينا علشان احنا بقينا بنحب الدنيا قوى هى كل حاجه لينا لا يغير الله بيقوم حتى يغيروا ما بانفسهم
وحسبنا الله ونعم الوكييييل
سلام عليكم
شكرا جدا على السؤال
انا الحمد لله بخير والحمد لله في نيو بوست نزل اتمنى ان تشرفيني وتقريه ده اولا
ثانيا بصراحه حاجه تكسف الواحد مبقاش عارف يعمل ايه لكن فعلا انا باتفق معاكي ان كل مابعدنا عن شرع ربنا كل مالدنيا بتتازم اكتر
كنا زمان بنحارب العنف ضد المرأه دلوقتي بنصرخ من عنف المرأه
حكالي واحد عن راجل متجوز ومخلف وكان بيدرس في احد الاماكن وعنده امتحانات ومراته عندها واحده صاحبتها وعاملين دوشه فالمسكين كل اللي عامله ان طلب منهم انهم يسكتوا علشان يعرف يذاكر وعينك ماتشو الا النور كان جزاته عضه في الكتف وبونيه في الوش ثم طلبت زوجته اخوها وخرج المسكين من البيت في عز الليل البارد في الاسكندريه ليذاكر عند واحد صاحبه
حاجه تكسف وربنا يستر علينا وعلى كل الرجاله
الشاعر بن هلال
بجد الصورة معبرة اوى
بس بلاش تسبقوا الاحداث ليسى اول ماذونة فى مصر مقدمة الطلب بس مخدتش الاوكى عليها
اخر زمن
ربنا يخليك ياماجيك .. فينك م زمان يارب تكون بخير
بقى انت .. هتعمل خبير للرجاله ف الخلع
طب ماشى .. وش بيغمز بعنيه وبيطلع لسانه
لماضه
هههههههههههههههههههههههه
بابا .. اى خدمه ..
احنا بنقدم السبت .. لحد مالرجاله بس تاكل الطعم
ههههههههههههههههههههههههه
هههههههههههه
يونيييك .. بتعصر عصر ..
ده شويه وهتبلعه اصلا
ستات جباررره
تنفع مطلع اغنيه دى ..
الست دى صاحبة مبدأ ههههههه
حظابط .. قركم ده اللى جابنا الارض
شكرا طبعا انك فاضتلى 10 دقايق للقرائه والرد
بس انا اضافرى قوصنره جدا هههه
والله انا معاك فعلا .. كان مفروض يروح يولع ف صاحبتاها
مش يجيب منهم الفلوس كمان
هههههههه
ماهو حق وكل حاجه يابو رومانه
بس ستات هايفه بالشكل ده
يبقى كسر حقهم طبعا
منورنى
دكتر اون لاين مش اوى كده
الرجاله برده يالهوى يتفاتلهم بلااااد
بارك الله فيكى ياولاء
ف ناس م قمة الرفاهيه والتفاهه ميعرفوش اصلا غزه فين ولا فيها ايه
تحياتى
لا حول ولاقوة الا بالله صعب عليا اوى الراجل ده
ده ف ستات ياخراشى ..
ع راى حظابط محمد .. م ذوات الاظافر الطويله
ههههههههههه ياهند
هتبقى مأذونه ان شاء الله
تطبيقا للمساواه بين المرأه والرجل
لوووول
ممممممم
بصي ما هو ده ممكن يكون القشة التي قسمت ظهر البعير
وممكن تكون بتستعبط
لو بتستعبط يبقى منها لربنا
والرجالة يعملوا حلقة ذكر ويكنسوا السيدة على الستات اللي من النوع ده
طب ايه رأيك
في واحدة فسخت خطوبتها عشان خطيبها مش بيرنلها على الموبايل أد ما هى بترنله
عالم فاضية صح؟
لا عندها حق دى
مبيرنلهاش ع الموبايل
ده استهتار
ده تسيييب
مبيرنلهاش ع الموبايل
ده يبقى اسمه استهتار
تسيييب
ليها حق تخلعه طبعا
مبيرنلهاش ع الموبايل
ده يبقى اسمه استهتار
تسيييب
ليها حق تخلعه طبعا
بصي انا لسة يستشكف البلوج حداكي و كنت مش ناوية اعلق غير لما اخلص قراية, بس بصراحة كان في كلام كده صدمني حبتين, و عارفة ان الموضوع ده من زماااااااااان, بس لازم اقول الكلمتين
بصي مبدئيا البلوج بتاعك كويس, و فكرك مش وحش, ممكن اتفق معاكي في حجات كتير و اختلف في بعض الحاجات بس مش مشكلة, ده الطبيعي يعني :))))
البوست انا معاكي فيه ان فعلا بقى في ستات بتستهبل و تخلع لاسباب معتوهة رسمي, و ده فعلا حاجة تشل, بس ما تنسيش كمان ان في رجالة ممكن تطلق بسبب حاجات هبلة جدا, لكن برضه مش ده اللي انا مختلفة معاكي فيه انا بقى جايا اناقشك في الحتة دي
"كل مابعدنا عن شرع ربنا كل ماانهار المجتمع,ربنا قال الراجل اللى يطلق .. عملنا الخلع .. ادى احنا شايفين,الشرع قال الراجل مأذون وقاضى وحاكم .. دلوقت بقى ف ست قاضيه ومأذونه وحاكمه,فعلا .. ربنا خلق الكون والبشريه .. وادانا كاتلووجه, شرع الله,عايزين بقى يطوروا ف الكتالووج .. يستحملواا بقى"
مين قالك ان الخلع مش في الشرع, هما بس الي اسأوا استخدامه, زي ما في رجالة بتسئ استخدام الطلاق و حق التعدد, لكن الخلع مش استخراع مخترعينه و الله, تاني حاجة بقى يا ستي, برضون مين قال ان الشرع قال ان الراجل بس اللي يبقى مأذون و قاضي و حاكم, ده المأذون هو الموثق الحكومي للزواج, يعني زمان كان الشيخ او الامام او شيخ قبيلة هو اللي بيجوز, لكن المأذون ده موظف , بس مش هفتي فيها قوي برضه, لاني معرفش اذا كان ينفع شرعا ان ست تتمم عقد زواج ولا لا,
تعالي بئى لموضوع قاضي و حاكم, ازااااي يا بنتي تقولي ان مفيش في الشرع ست قاضي او حاكم, اصلا مفيش في الشرع نصوص تخص الرجال بتولي المناصب دي, يا ما كان في ممالك تحكمها نساء و قبائل بترجع لنساء معروف عنهم الحكمة و الذكاء, و عمر الاسلام و الشرع ما قلل من عقلية الست و لا اصلا في اي نصوص خاصة بالمناصب دي تحدد انها حكر على الرجالة, و مش مصدقة ان بنت تقول ان كون ست تبقى قاضي او حاكم ده يبقى ضد الشرع, انتي معانا ولا مع التانيين ؟؟؟؟؟؟
لكن انا ضد ان اي حد يستغل حاجة الشرع اتاحها له لتسهيل اموره بشكل سئ, و ده زي ما قلت مش بس بيحصل من الستات اللي بتستهبل في استغلال الخلع, لا و كمان الرجالة اللي بتستهبل في استغلال الطلاق و التعدد....الخ الخ
يا ريت ما يكنش كلامي ضايقك, و انا بتكلم معاكي زي اختي يعني, و كمان انا مش بفتي و مش دارسة شريعة, بس انا عارفة ان مفيش نصوص تقر ان القاضي و الحاكم و المأذون يكونوا ست, اما بالنسبة للخلع, فده على ما سمعت و قريت من الشيوخ و علماء الدين ايام ما كانوا بيطلعوا القانون, هما قالوا انه في الشرع و الله اعلم
سوري للتطويل
سوري في غلطة مطبعية في الجزء ده:
" بس انا عارفة ان مفيش نصوص تقر ان القاضي و الحاكم و المأذون يكونوا ست"
انا كان قصدي مفيش نصوص تقر ان المناصب دي حكر على الرجالة يعني او ان كون الست تتولاها يبقى ضد الشرع في حاجة
Post a Comment