حسره عليها ياحسره عليها
جت رجليها ما جت رجليها ..
انا ايه ذنبى انا ايه ذنبى
هو اللى زقنى ف الاضراب البمبى ..
اصدقائى واخوانى واخواتى
ياشعب همجى .. ياشعب بلا حراك سياسى
انا تقريبا .. مقلتش رأى ف الاضراب خالص
بعكس اغلب المدونين اللى نشروا عنه قبل وبعد ما حصل
حاجه كويسه جدا ..
انا كنت قاعده وبتفرج ف الظلام واتنبأ بالكارثه
الصراحه هى جت اهون منا كنت متخيله
اضراب يعنى نقعد ف بيوتنا .. نورى الحكومه انهم بلا شعب
زى جاموسه بلا حبل .. معرفش ايه علاقة التشبيهه بس شغال شغال
قبضوا ع .. مدونين وصحفيين ومحامين واى حد كانوا بيسمعوه ينطق كلمة اضراب
حاجه كويسه جدا .. شغال شغال
المحله ولعت .. وكسروا وخربوا وحرقوا ودمروا
وناس مدنيين ماتوا وعساكر ماتوا ومنشئات اتهدت
ومال عام راح ف الارض
حاجه كويسه جدا .. شغال شغال
بصوا بقى .. بعد كده حد يقولى احنا ناس عندهم حرية رأى
احنا ناس عندنا حرية تعبير .. احنا ناس عندنا سياسه
عند ام ادهم يااسماعيل .. احنا شعب همجى
اى حاجه يحولها لضرب وعنف وتدمير ...
ابن عمى كان زعلان جدا ع الناس اللى ماتت وانضربت ف المحله
وان الشرطه ازاى .. ونظام غاشم حازم لامم فاقم .. وكل الميمات دى
طب انت لما واد صاحبك بيعصبك بالبوكس وف وشه
اذن .. احنا كشعب بكل طبقاته
سواء الجزء الحاكم او الجزء المحكوم .. ليس لدينا اى خبره عن البتنجان
كيف نسايس ونتسايس ونعبر .. حتى الاضراب حولوه ثوره وعصيان
فمنستعجبش ع راكشنات الشرطه والقبض العشوائى ع الناس والضرب العشوائى ع الناس
وشطب الاخوان م المحليات .. لو انت مكانهم وحياة الغاليه هتعمل كده
عارف عارف ليه
بص بص بص ..
علشان احنا شعب همجى محتاجين ولا 50 سنه لما نفهم يعنى ايه
اكون ضدك وتحترم راايى
ويعنى ايه اعترض بهدوء
ويعنى ايه تتقبل اعتراضى بهدوء
ويقولك مصر فيها حراك سياسى
يااخى توكااا .. مصر طاهره وهتفضل طول عمرها طاهره
لو عايزين نعمل اضراب بجد . ونعبر بحريه بجد
فهموا الشعب اصلا مبادىء واساسيات الحريه
وف النهايه وبكل مراره
ربنا يفك حبس كل اللى تم القبض عليهم
ال ايه .. بيروجوا لفكر مضاد وبيتعدوا ع الحريه الشخصيه
نياهاهاهاااااااااااااااااااااااااااااااااااااااااااااااااااااااااااااااااااااااااا
وربنا يعوضنا بقى ف الخساره اللى حصلت ف المال العام
لان اللى بيروح عند الناس دى مبيرجعش
يعنى هتطبل علينا نحن الشعب ف الاخر
واى حد هيرد عليا م العدوانين واللى بيعشقوا منظر الدم
ويقولى اصل مفيش حق بيرجع غير ع بساط م الدم
والعنف يولد العنف
والبتنجان المسقعه احسن م البتنجان المحشى
ياراجل عاعوعاااااااااااااااااااااااااااااااااااااااااا
انا اللي هيجنني بس الناس اللي بتقول ان الإضراب نجح
ReplyDeleteنجح ازاي بس نفسي افهم
طب نفسي بس يفتكروا كان ايه الهدف منه
هل بقى الهدف ده اتحقق؟
حاجة غريبة فعلا
هل معنى ان المحلة ولعت يبقى الإضراب نجح
طب هو فين الإضراب اصلا؟؟
على رأيك
عاعوعععااا
دكتورتنا ..
ReplyDeleteمعاكي حق في حاجات ..
ومش معاكي حق في حاجات ..
---
معاكي حق لما تقولي إننا محتاجين قبل ما نتحرك ، نفهم ، ونفكر
وما يبقاش اللي بيحركنا بس ، جوع البطن
اللي لو راح .. تنتهي المسألة
ومعاكي حق لما تقولي إننا محتاجين نفهم مبادئ وأساسيات الحرية ..
لكن اللي حرك الناس أصلا المرة دي ، مش الحرية
ده كان الجوع
فرق شاسع
---
مش معاكي حق تتهمي الشعب كله إنه ملوش في البتنجان
وإنتي عارفة كويس إن الوطني زي ما عنده أمن مركزي ، عنده برضه بلطجية بيحطهم في النص
واسألي أهل المحلة
واسألي كفاية
واسألي الإخوان
ومش معاكي حق تلتمسي للظالم العذر في اللي بيعمله
عارفة ؟
قديما حاول والِ في عهد عمر بن عبد العزيز أن يفعل ذلك ، بحجة أن شعبه ملوش في البتنجان ، وأنه لا يصلحه إلا السيف :
كتب إليه واليه على خراسان واسمه الجراح بن عبد الله يقول : إن أهل خراسان قوم ساءت رعيتهم وإنه لا يصلحهم إلا السيف والسوط فإن رأى أمير المؤمنين أن يأذن لي في ذلك فكتب إليه عمر : أما بعد فقد بلغني كتابك تذكر أن أهل خراسان قد ساءت رعيتهم وإنه لا يصلحهم إلا السيف والسوط فقد كذبت بل يصلحهم العدل والحق فابسط ذلك فيهم والسلام
بمنتهى البساطة
ومنتهى الوضوح
---
مش معاكي حق تفقدي الأمل في الشعب ده
كان مبيفتحش بقه بأي حاجة من سنوات قليلة
والنهاردة بقى بيعرف يتكلم ، ويعتصم ويتظاهر ويضرب
ولسه هيتعلم أكتر وهيتكلم أكتر وهيطالب بحقه أكتر وبطريقة صح أكتر
---
معترض على الفوضى والعنف
مؤيد حتى النخاع لحق كل إنسان إنه يعلي صوته ويطالب بحقه من غير إفساد
و..
مضرب
بداية
ReplyDeleteحمدلله عالسلامة
ثانيا
هسيبك انت و د خبيب تشوفوا شغلكم سوا
ربنا يقويكم
ثالثا
كنت بسمع شريط وانا صغير كان الراجل بيمد صوته ويقول
ان لكل امة ميلاد
ولكل ميلاد مخاض
ولكل مخاض آلام
أخونا الام وأمال
عنده حق في جانب وجوانب تانية لا
لو اختصرنا كل الموضوع في أحداث المحلة المؤسفه
يبقى عمرنا ما هنعمل حاجه
أعرف بعض الزملاء من الدكاتره
مبيفتكروش من العلاجات او العمليات الا المضاعفات والاثار الجانبية
عشان كده دايما مش عندهم جرأه يشخصوا ولا يكتبوا دوا أبدا
كلمة الاضراب في نافوخ الناس عمرها ما وجدت
بعد كده هتساوي كتير
عند الناس وعند الحكومة كمان
وخاصة بعد جوايز الحكومة وتسكيتها للمحلاوية امبارح
عارف ان تعليقي مش ماشي مع بعضه
بس يلا بقى عاعوعااااااااااا
مش هقول كلام مفيد زياده عن الى قبلى
ReplyDeleteبس ممكن اقولك حاجه بسيطه
فى ثورات الجياع والثورات البرتقاليه الناس بتكون جاعت بجد
انما احنا لحد الان موصلناش للمرحله والحمد لله
اه فى غلى فاحش بس لسه الناس مجعتش
لسه الناس عندها كل الكمليات او عندها معظم الكمليات حتى الطبقات المطحونه منهم
ومش تتكلمى عن اطفال الشوارع والحوار ده لان مش دول الى بيعملوا ثوره الججياع
ثوره الجياع الى بيعملها جوع الطبقه المتوسطه والى هى قربت جدا تجوع بس لسه مجعتش
بصى يا سمسمه
ReplyDeleteوالله القاهرة واسكندريه وباقى المحافظات كانت هاديه تقريبا المشكله فى المحله واللى حصل فيها
بس وده بحكم انهم عمال وفيها بلطجيه هتقول الامن حطهم هتقولوا هما اللى نزلوا مش مشكلتى بس يا ريت ميكونش نظريه المؤامرة تسيطر علينا علشان نعمى عنينا
امما نتيجه الاضرا فصفر لغايه دلوقتى
بصي بقى و من غير لوك لوك كتير
ReplyDeleteبعد اللي حصل عندنا في المحلة
انا متفق معاكي تماما في كل كلمة
بس خلاص
عجبتنى قوى توكااااااا
ReplyDeleteوعاعوعاااااا
بس بصراحة الاتنين اجمد من بعضايتهم
احنا شعب ع ما تفرج
ربنا يستر ع الاجيال الجاية
وبيقولولى اجيب بيبى تانى
انا لو اعرف مكنتش جبت الاولانى
ده الدنيا بقت مأساة
ليلتك زى الفل
هبة
قريت التعليقات اللى قبلى ولقيت لكل منهم وجهة نظر ومعظمها تطبق على بعض والبعض الاخر لهم سمات أخرى
ReplyDeleteالنقطة ان مفيش قاعدة عامة واللى بيطبق السلوك العدوانى والعنيف مش كل الطبقات ومش كل الاشخاص
انا لما عرفت عن الاضراب قلت انه مش هيعمل حاجة ليه - لان كل واحد ممسوك من رقبته فى رحاية وعماله تدور بيه يمين وشمال وكل واحد جايب تلات او اربع عيال ويخاف ويفكر مليون مرة قبل ميعمل حاجة يلاقى نفسه تانى يوم فى الشارع ومش لاقى يأكلهم وهنرجع تانى ونقول ده واجب ولو مكلوش النهاردة هياكلو بعدين مرتاح ولكن كل اب وام بيخافو - الشعب اتعلم ازاى يخاف وازاى يضرب المربوط فيخاف السايب وازاى نمشى جنب الحيط
بس برده كل راع وكل مسؤل عن رعيته
وكل واحد واجتهاده فى اختيار طريقة عيشته وحسابه عليها يوم القيامة
كل ده انتى شيله جواكى كتير بجد
ReplyDeleteبس تعرفى والله يا ياسمين الحكومه بتاعتنا قصدى بتاعتهم مش عايزه غير ضرب الشباشب والميه الوسخه بجد
بسم الله
ReplyDeleteبوست جميل
احييك على موقفك
ربنا على الظلمة والمفتريين
خدهم يا قادر يا كريم
بصى يا سمسمه
ReplyDeleteطبعا طبعا ناس كتيييييير مش فاهمه يعنى اية اضراب وازاى يتعمل بس ده غلطه كمان اضافيه للناس المثقفه الفاهمه اللى قالت ومش حاولت تفهم اللى مش فاهم
ثانيا مفيش اضراب يفض الا باتمام تحقيق مطالبه
ومشكلة هذا الاضراب ان الشعب ليه مطالب كتير اوى فتاهت المطالب نتيجة الهمجية وعدم التنظيم بس اقدر اقولك ان الاضراب لو كان فاشل فى تحقيق اهدافه بس انا شايف ناس كتير بدءت تتحرك وتروح للاتجاه الصحيح وبدال ما تقولى احنا شعب كذا وعى الناس لما انتى فاهمه ياستى
وشكرا ليكى وتحياتى
اوفففففف
ReplyDeleteلا انا بنفخ علشان زهقت من ام تعليقى المكرر عند ناس كتير كاتبة عن الاضراب والتخريب اللى حصل نتيجة الاضراب
بصى يا سمسمة
انا قريت خبر فى جريدة البديل قبل الاضراب بيوم
ان الحكومة هتسرب بلطجية من عندها علشان يخربوا فى منشات وتقوم الحكومة تلبسها فى المتظاهرين ويلاقوا حجة يعتقلوا بيها الناس
يعنى اللى خرب البلد الحكومة يا سمسمة مش الناس
بس خلاص
سلام
انتى كمان ياسمسمه هتيجى عالناس؟
ReplyDeleteالتجربه اثبتت لينا ان التخريب وشغل البلطجه ده بيجى عن طريق الامن واحداث الاستفتاء ونقابة الصحفيين واحداث انتخابات مجلس الشعب السابقه اثبتت لينا ده وكل واحد فينا كان موجود وشاف ده فى دائرته الانتخابيه
وكمان احنا بنتكلم عن عمال واهل المحله اللى عملوا قبل كده اكتر من اعتصام واضراب ومحصلش ده قبل كده يعنى ناس واعيه وفاهمه
ياجماعه الامن عرف ازاى يحبط الاضراب وكمان عرف يشغلنا مع بعض ويخلينا نشتبك مع بعض فى امور فرعيه زى ليه الاخوان مشتركوش فى الاضراب وهما كده بيهربوا ويتخلوا عن الناس
اسف يادكتوره ياسمين على الاطاله
لو الأضراب بالشكل اللي انا شفته في المحلة
ReplyDeleteيبقى اقسم بالله ماهعمل اضراب نهائيا في حياتي
صدقني مشكلتنا ان احنا مغيبين
مفيش حاجة بتحصل في الشعوب العربية كلها هما ليهم ارادة فيها
انا كنت حاسس ان الدور هيجي على مصر في يوم من الأيام
لمل سمعت وقريت خبر وفاة الرئيس على مواقع النت أتاكدت انه مش وراه حد من الاخوان او اي حزب اقسم بالله اني قولت ان اللي واه أسرائيل وامريكا
كان كل هدفهم ينشورا اشاعة على النت ويختبروا بيها الشعب المصري
نجحوا وبدات الحرب في مصر
ان شاء الله بكره نتفرج على نفسنا ونشوف ناس بتتظرب بعض وناس بتموت بعض ذي العراق وفلسطين ولبنان
كله مدروس من الاف للياء
يعم لو الأخوان عايزين يمسكوا الحكم وهيموتوا عليه يمسكوه بس ذنبه ايه اللي بنا محل بالاف الجنيهات وفجأة وحده يتهد على دماغة من اللي هيعوضة
ياما نفسي ان اللي بنسمعهم وهما بيدفعوا عن الحرامية والسفاحين من ظلم الظباط ليهم يطلعوا يقوللنا الناس اللي عملت كده نعمل فيهم ايه
والنبي يجماعة مصر مش نقصة اكتر من كده انا شفت مضاهرة عن الغلاء في فرنسا نظيفة جدا مش حصل فيها اللي حصل ده
احنا فينا شوية بلطجية لايعرفوا دين ولاملة ولاعايزين يشتغلو كل اللي عايزنه انهم يسرقوا من مصلحتهم ان الحالة الامنية تتدهور اكتر من كده
والنبي محدش يفكر في نفسه وبس احنى هنخلي البلد ديه احسن لو اشتغلنا بجد ونبطل رشوى ووسطة
صدقوني العيب مش في الحكومة العيب فينا احنا الشعب الصيني الحكومة مش بتعملوا حاجة شفنى كل واحد فيهم بيفكر ويشتغل لانه مش زينا عايزين نتخرج من الكلية بالزق ويشغلونا في اي حاجة ومش عايزين نفكر
اتحدى اي حد من اللي طلع في ماهارات فكر في حل تاني بعيد عن الحكومة
واخيرا..............عايزين تولعوها ولعوها مهو مكتوب على مصر انها تعيش على طول في حروب وتتسرق من اهلها
لاالغني سبها في حلها ولا الفقير سبها في حالة
وناس بتولع وتبعد وهي مش فهما حاجة ذي الارهابين في العراق بيحسبوا انهم هما الصح
وخراب يامصر
سوف يزهب عصر البطالة واهلا بعصر العراق وفلسطين
أهلا بالقتلى في الجيش الكافر المصري والحكومة الضهيونية
أهلا بتدمير محلات كل من خالفنا في الرأي
واخيرا نسيت أقول
ReplyDeleteاللي خرب البلد مش حكومة ولا شعب ولا أخوان
اللي خرب البلد بلطجية كل يوم نشوفهم في الشارع
اللي خرب البلد مصريين
النا س العاقلة منزلتش في أراب المحلة
اللي نزل كلهم عيال مش عارفين يعني ايه أراب ولا يعني ايه واحد تعب في بنا محل واتهد مرة واحدة
اللي خرب البلد ناس فاشلة مش اتعلمت ولاعرفت معنى مشئولية
الناس دول هنشوفهم كتير حتى لو اتغيرت اكتر من الحكومة
عدد المثقفين اللي نزلوا في الاضراب قليل جدا والباقي كله عيال
في ناس مكنتش عارفة ايه اللي بيحصل ومحكمتش عقلها ومن غير متفكر بدأت تهاجم
للاسف روأساء الاظراب كان شوية عيال والشعب الغلبا مشي وراهم
كان لازم واحد زو ثقة يكون وسط الناس
عزيزتى
ReplyDeleteمتزعليش منى انا اختلف معاكى قووووووووى
أنتى لو قرنتى اللى بيحصل فى بلدنا لما نعمل اضراب باى مجتمع تانى هتلاقى مصر قمة التحضر وشعبها احلى شعب
انتى لو قرينتى حالة الظلم اللى بتحصل فى بلدنا والقهر كنتى عرفتى ان اللى بيحصل فى المظاهرات عندنا ولا الاضرابات اقل شئ ممكن يحصل
انتى لو حسيتى الاسعار عليت ازاى اليوميين دول ووصلت لايه مع شعب اساسا فقير وغلبان
وشوفتى اللى حصل فى الاضراب هتعرفى وتحسى ان الشعب ده باله طويل وطيب قوى
ياريت ما تفضلوش تقولوا الشعب عمل والشعب سوى والشعب متخلف
الحرية ليها ثمن
وشوفى بلاد بتقولوا عليها متخلفة بس بتختار بحريتها ومحدش من اهلهم قال عليهم اى كلمة
الحرية ليهم ثمن
عندك استعداد تدفعيه ولا لا
هو ده السؤال
سلام
ههههههههههه
ReplyDeleteبوست ساخر
على أحداث قمه السخريه
سلاماتى اليكى
انا تقريبا متفق مع خبيب في الرأي و علي فكرة أنا بحب البتنجان المحشي أكتر من المسقعة
ReplyDeleteطبعا مفهوم الاضراب جديد على الشعب المصرى
ReplyDeleteمن امتى عملنا اضراب ؟؟؟
يبقى لما نعمل اضراب لاول مره ومينجشى مش مفروض نزعل
لا
لان ثقافه الاضراب لسه جديده علينا ويوم ورا يوم هنتعلم
يا بنتى الشعب غلباااااااااان
ReplyDeleteغلبان اوى والله
المحله بالذات كمان ...العمال يابنتى اجورهم هتكفى ايه ولا ايه
الشعب اما صدق لقى حاجه يطلع فيها كبته ...بجد الشعب غلبان
يمكن احنا مش حساين لان اهالينا طالع عينهم عشاننا
بس بجد الشعب غلبان والاسعار بقت نار ..جربى تنزلى مره وتجيبى حاجات البيت
مرتب بابا وماما مش هيكفى اصلا
....
يمكن عندك حق اننا شعب مش عارف يعبر
ومن امتى كان عندنا الحريه يابنتى ا احنا نعبر
بس عذرا يا دكتور
بجد الشعب غلباااااااااااااان
تدوينة حلوة يا دكتور
انا اللي زعلانه عليه الناس اللي ماتت في المحلة
ReplyDeleteوالخراب اللي حصل
اسكتي جالي علي الفيس بوك جروب هيعملو اضراب يوم 4/5 يوم عيد ميلاد الريس ههههههههههه
وجروب تاني هيعمل اضراب يوم 2/5 يوم عيد العمال
هههههههههه
الموضوع عجبهم الظاهر
تحياتي
رودي
السلام عليكم ورحمة الله وبركاته
ReplyDeleteشوفي يا سمسمه انا مش هاعلق علي الكلام بس بعد كل اللي حصل في المحله من سحل وقتل وتخريب ماقدرش اقول الا حسبناالله ونعم الوكيل ربنا علي الظالم والمفتري وابن الحرام
يا جماعة الجواب بيبان من عنوانه
ReplyDeleteكل اللي حصل كان متوقع
انتو عايزين حركة شعبية كبيرة بدون قيادة واضحة تنجح
ازاي
لابد تتحول فورا لفوضي
لان من المعروف ان العامة دائما عندما يفك عقالها تتحول لغةغاء
لم تاتي الشجاعة لاحد يقول ان احنا منظمين الاضراب
اذا كان منظمين الاضراب جبناء وغير معلومين
ماذا تنتظرون من الناس
اخيرا اتفق مع الدكتورة اننا لسه بدري علينا
محتاجين لسه لوعي واخلاق وتربية
وهذا لا يعني ان لكل صاحب حق ان يستخدم كل ما يستطيع من وسائل سلمية لاسترداد حقه
بصراحة الاخوان هم اعقل ناس في البلد
مصر فعلا هتفضل طاهرة
ReplyDeleteوبرده الشعب مش فاهم اسايات واصول الحرية
الشعب ميعرفش حقوقه وواجباته
تحياتي
السلام عليكم
ReplyDeleteازيك يا ياسمين، عرفت انك كنتي مشغولة الفترة اللي فاتت في الامتحانات ربنا يوفقك
بالنسبة لعمليات التدمير والتكسير اللي حصلت، انا متفق معاكي ان ده مش لازم يحصل لاننا احنا في النهاية اللي متضررين، يعني لما مدارس تتحرق وقطارات تتهاجم، الحكومة هتضر في ايه اكيد احنا اللي هنضر
انا كنت بأيد ان الاضراب يتم على شعار خليك بالبيت مش اطلع وكسر، دي فوضى مش اضراب
على فكرة انا كتبت بوست من كام يوم عندي على المدونة فيه تقريبا نفس الفكرة، بس طبعا مش بنفس جمال وخفة اسلوبك.
تقبلي مروري
أتفق معك يافندم
ReplyDeleteوالله انتي جدعه يابنت انتي
ReplyDeleteوفعلا باين من كلامك انك بتحبي مصر
وانا معاكي في ان الاضراب كان لازم يبقى مجرد اضراب عن العمل في المصالح الحكوميه والقطاع الخاص وعدم شراء اي شيء من اي محال تجاريه
ده هو الاساس
ايه اللي حصل بقى
ان الامن العام شاف شوية شباب عاملين مظاهرات .. راح سايب عليهم شوية من البلطجيه بتوعه ولعو الليله وقلبوها عركه
وحصل اللي حصل
الحاجه اللي تغيظ بقى
الناس اللي راحت تعمل مظاهره دي .. رايحه تعمل مظاهرات ليييييييييه
مش قلنا اضراب؟؟؟
يعني عدم التفاعل باي وسيله واي طريقه
يبقى ليه بقى بتطلعو من بيوتكم وتعملو مظاهرات
انتو بكده بوظتو الدنيا وانتو مش فاهمين ولا واخدين بالكم
وخليتو شكلها انتفاضه حراميه
فعلا
عند ام ادهم يا سماعيل
هو مين ادهم ومين اسماعيل اصلا؟؟؟؟
سلامووووووووووووز
محمد عادل صقر...............
ReplyDeleteانا معاكى فى كل كلمة قولتيها
وكلامك صح
بس الناس لو مخنوءة اوى تعمل ايه؟
مجرد سؤال؟؟!!
تؤ تؤ تؤ تؤ
ReplyDeleteانا مش معاكى طبعااا
مش كفاية نبقى شعب جعان ونقول عليه همجى كمان
يا عزيزتى القمع لا يولد الا الفوضى
دعوة الاضراب كانت صريحة جدا وانه اضراب سلمى
تقدرى تقولى ليه الامن المركزى اتجمع فى كل الاماكن اللى كان معلن انه هيبقى فيه مسيرة احتجاج سلمى
ومخلاش الناس يوصلو للاماكن دى اصلا
تقدرى تقولى ليه الامن يومها خد الناس من بيوتها فى المحلة ووداهم الشغل بالعافية
تقدرى تقولى ليه نزلو البلطجية بتوعهم
علشان يبررو المهزلة اللى حصلت
وعلشان يستخدمو الذخيرة الحية
انتى لو خارجة فى مظاهرة ولقيتى اللى بيضربك بذخيرة حية والمفروض انه مصرى زيه زيك
واللى بيحدف عليكى قنابل مسيلة للدموع
واللى يخطفو الناس من الشارع وياخدوهم القسم
ولما ولد يبقى قاعد بيتفرج عاللى بيحصل من بلكونة بيته وتيجى فيه طلقة ويموت
عايزة الناس تعمل ايه
عايزاهم يعملو ايه وهما شايفين اهلهم بيتبهدلو البهدلة دى
الناس فاض بيها ومش لاقيين ياكلو
كمان ميعرفوش يقولو لأ
لازم يعنى علشان يبقو بيفهمو فى السياسة انهم يستنو لما يموتو من الجوع فى صمت
كفاية نشتم الشعب ونقول عليه اللى مش فيه
الناس فى مصر بالذات مبتعملش اللى شفتيه ده الا لما يكون الظلم عليهم فوق الحد اللى يتحمله اى حد
يا شيخة ده انتى لو عندك كلب هتأكليه
دووول ناااس مش لاقية تاكل وده ريس وحكومة سايبينهم ياكلو
ومش عارفين يأكلوهم حتى مش يعيشوهم عيشة محترمة
اذا كان العيب فى الشعب بعد ده كله
يبقى كلنا ننط فى النيل ويبقى يشوفو شعب يحكموه غيرنا
اصلنا همج