مساء الخير ..
عزيزى المواطن .. عزيزتى المواطنه
..
النهارده وانا راجعه م الكليه والسيد المحترم والدى مصطحبنى بالسياره زوبه اللهلوبه
النهارده وانا راجعه م الكليه والسيد المحترم والدى مصطحبنى بالسياره زوبه اللهلوبه
حقيقة لكم استمتع عندما يقود والدى السياره
حيث تتجاوزنا جميع السيارات القادمه والذاهبه والاتيه م جميع انحاء الطرق
فلا يحلو لاى بنى ادم ف الشارع انو يعدى الا يعدى م قدام سيارتنا المتواضعه
ههههههههههههههههههههههههههههههههههههه
رجعت دماغى لورا وفتحت ع الرابع ,., انا طبعا اللى فتحت مش العربيه
فلمحت يافطه كتب ( بضم الكاف ) البنكتويشن اللى هنا ف الكيبورد بيجبلى رعاش
فمش لازم يعنى .. كتب ع اليافطه بقى ايه
عزيزى المواطن
دوران بعد 20 متر
.
.
طبعا مجذبش انتباهى ان يكون ف دوران ماابويا حر هو اللى سايق
قد ما جذب انتباهى المواطن ..
ماهو المواطن .. اسم فاعل م مواطنه .. نعم اعى ذلك جيدا
وينتمى الى الاسم الجامد وطن .. كذلك ادركها هذه المعلومه تمام الادراك
ولكن .
جينا لبيت القصيد .
اموت واعرف يعنى ايه القصيد ده ههههههه
ماعليكم ..
امتى المواطن يحس انو مواطن وليه وطن ..
هل مجرد كلمتين متعشقين ف بعض
ولا ده فعلا حاجه ملموسه ومحسوسه
هل لما المواطن يشوف وطنو بيتسرق م مواطنين اخرين ..
هل سيسعد بمواطنته
هل لما المواطن يشوف مواطنين اخرين بيتم تميزهم ف اماكن وتحت شعارات اخرى
هل سيرضى عن مواطنته
ولا لما المواطن يلاقى غيرو بيصيف ف مارينا وهو مش عارف يفتح شباك
ف العشه اللى عاملها ف العشوائيات والحر بياكله هو وعيالو
تحت مظلة القانون بيتعارض معاه كده ..
وماذا سيضر القانون فتح شباك ف العشوائيات سيدى ’مشرع القانون
دى اسمها عشوائيات يعنى ..
هل سيتشرف المواطن بمواطنته عندما تهان كرامته داخل وطنه م مواطنين امثاله
هل ستوفر المواطنه للمواطن فطوره الصباحى
بلاش فطوره دى .. ع الاقل وجبتين ف اليوم ويقسمهم براحته هو
ومن هم المواطنين ..
هل منهم اطفال الشوارع
هل منهم فتيات الليل
هل منهم المتسولين
هل منهم المجرمين
ام ان هناك مواطن درجه خامسه ومواطن تحت الصفر
مواطن فايف ستار ومواطن مبينزلش م ع الحمار
انا برجح كده فعلا
مواطن فوق الشبهات مجرد ان عربيته المتفيمه تقف ف كامين .. ياخدها سبه يندى لها جبين البشريه
لمواطن تحت الشبهات مفيش عسكرى الا ماوقف اللى خلفوه وقالوا فين بطاقتك ياروح امك
من مواطن الرومى والكافيار وصدر الخروف
لمواطن الفول والطعميه ويوم ميلاقى حتة جبنه يبقى ابوزيد خاله
من مواطن مصالحه بتتقضى برنات
لمواطن مصالحه بتتقضى بطلعان عين اهله
واهم كلهم مواطنين .. وكلها مواطنه .. وكلنا ف وطن واحد
انا عن نفسى افخرر بمواطنتى ..
ليس لاننى مواطنه فايف ستار
يارب .. يسمع منكم
ولكن لاننى مواطنه تعى جيدا ف اى وطن تعيش
فانا مصريه لاب مصر وامى مصريه
تحيــا مصــر ياعــم ..
تمام ,, خلص الكلام ولكم منى احلى سلام
اخى المواطن
اختى المواطنه
االباشا باشا
ReplyDeleteاول تعليق .... صح
ده كتير والله كتير كل خمس دقايق بوست
والله هتستفزينى وتخلينى اروح اديها بوست كمان ع المدونة بتاعتى
-------------------------------
بالنسبه للبوست
اجرا واشد حاجة قريتهالك لحد دلوقتى
انت عارفه ياسمسمة " ولو سمحت ما تفكريش تدلعينى تانى" ...ماشى
اهم حاجة هى العدل ان يشعر جميع افراد الشعب بالعدالة... عدالة التوزيع للثروة فبل ما تتسرق طبعا... عدالة فى الفرص الحياتية .. عداله ف العمل ف التعليم ...
العدل..
" جعلناكم امة وسطا"
وسطا بمعنى عدل... اوسط الميزان هو اعدله
ات عارفه ان لو الناس شعرت ان البلد اللى هما عايشين فيها فعلا بتاعتهم هيكون الحال مختلف... فقط خللى الناس يشعرون انهم يمتلكون... الكل اصبح يشعر ان البلد ملك لاحمد عز وجمال مبارك...
اصبح يشعر ان كل شىء كان ملكه اتباع حتى آدميته وهدومة اللى لابسها
المهم .. انا سعيد بالتواصل الفكرى اللى حاصل بيينا
وشكرا ع التعليق يا اجدع بنوتة
أجدع دكتوره
ReplyDeleteلا فعلا كده حرام عليكي كل دي أفكار منتظره تفتحي مدونه عشان تقوليها
لكن برضه اتقلي علينا شويه واحده واحده
واعملي حساب للزمن
بكره الامتحان تيجي ومتلاقيش وقت
حطي الافكار دي في الدرافت وانشريها بعدين
انا نصحتك وخلاص
********
بالنسبه للبوست كنت سمعت معلومه كويسه جدا
وهي ان المجتمع فعلا بيكون طبقات
طبقه غنيه
وطبقه فقيره
وطبيقه متوسطه
المتوسطه دي دايما بتكون صمام أمن المجتمع اللي هي زي معظمنا
هي اللي بتحس بالناس وهي اللي بتتصدق وهي اللي عايشه في وسط الناس
الغني طبعا بيخاف على فلوسه ومش عايش مع حد
والفقير بيفكر في لقمة عيشه
خطة الحكومه الجهنميه سواء كانت قصداها أو مش قصداها
انها تزود الفجوه وبالتالي تقل الطبقه المتوسطه
وهو ما يحدث فعلا
وعشان كده ربنا يستر
لك تحياتي ودمت بخير
والله احنا اللى بيميزنا فى مصر عن باقى دول العالم والحمد لله عدم العداله فى التوزيع والكوسه خلاص غلت جدا وبقت أغلى من كيلو اللحمه ولسه اللى يعيش ياما يشوف وده مش غريب عن مصر أم الدنيا وده طبعا يفكرك بانك أكيد أكيد أكيد فى مصر وبالنسبه للمواطنه أظن أن ده غير المواطنه اللى هى فى الدستور مش كده هههههه
ReplyDeleteفعلا اهم حاجه في مصر المواطنه
ReplyDeleteحيث نعيش كلنا احرار في حضن الوطن
والشرطه في خدمه الشعب
وعاش الملك وابن الملك وابن خالة الملك كمان
يادكتوره انت هتودينا في داهيه
لو ممكن تتصرفيلنا في شويه حقن بنج عشان لما امن الدوله يقفشنا ابقه احقن بيهم نفسي
فنفسي فداء للوطن كما تعلمين
انا اسف انى هدخل اعلق على دكتور حر:
ReplyDeleteاولا:
اكتبى يا سمسمة كل اللى انت عايزاه.. كل يوم بوست... كل خمس دقايق...
يا بو زيد... انسانه عندها افكار وتحب تعبر عنها وافكارها اكثر من رائعة...
بطلوا غيرة اتكل على الله وروح مدونتك ارزعلنا بوست حلو كدة
ثانيا:
المعلومة ... عن الطبقة الوسطى... حضرتك قريتها ف مدونتى
فى موضوع " الاشتراكيه"
طبعا المدونةالاولى مش على الوطن العربى بس المدونة الاولبى ع العالم
بــــــــــلا إســـــــم
"مساحه اعلانيه"
اخيرا:
ربنا معاكى يا سمسمة ويبعد عنك عيون الحساد
يعنى ايه كلمة وطن
ReplyDeleteفاكرة الاغنية دى
بتاعة محمد فؤاد
اسمعيها يمكن تريحك
اختك خيخة
اهلا اهلا دكتور سيد .. شوفت قعدت تحسدنى انت والدكتور الحر
ReplyDeleteاهو بقالى يومين محطتش كومينت واحد حتى
طبعا انت ف ردك وفيت وكفيت طبعا
ولا كلام بعد هذا الكلام
تحياتى
وانا اسعد بالتواصل الفكرى ده
دكتور حر .. منورنى كالعاده بتعليقاتك
ReplyDeleteوواضح فعلا ان الطبقه المتوسطه بتتخنق وبتنقرض
وربنا يستر
شوفت اهو كتبتلك بوست عن الكوسه ياشيتوس
ReplyDeleteبالهنا والشفا
ماسك ربك يستر .. احنا والله بنحب الحكومه وبنحب النظام وبنحب كل حاجه
ReplyDeleteبس احنا بنعترض ع بعض الظواهر المنتشره ف البلد مش اكتر
تحياتى ماسك
ربنا يخليك يادكتر سيد ع المداخله الاعلانيه دى
ReplyDeleteتحياتى هههههههههه
والله يا ام شريف بسمعها
ReplyDeleteوهى اللى مولعانى كده م جوا
ميرسى ع التعليق
مبدايا مبقاش فى حد دلوقتى بيعتبر انة مواطن وعشان كدة الوطن مبقاش غالى والناس كلها عايزة تهج من البلد وانتى لو كنتى بتسافرى برة مصر هتعرفى ان المواطن المصرى اكتر مواطن متهان بين الجنسيات التانية
ReplyDeleteاما من حيث الطبقات بين مواطن الكافيار ومواطن الى مش لاقى لحم حمار فافتكر ان الدولة نجحت بالفعل فى ان هى تخلى الطبقة المتوسطة مش لاقية تاكل
لوما هههه لما محدش بيعتبر نفسه مواطن اومال هنبقى ايه
ReplyDeleteمتغربين ف بلدنا ياناس
حد يعقلها دى
لا تعليق وتحياتى لوما
امتى المواطن يحس انو مواطن وليه وطن
ReplyDeleteالاجابة:وهو بيلف عند الدوران اللى حضرتك كنتى عنده
انا عن نفسى افخرر بمواطنتى .
نعم!!تفخررى ازاى يعنى؟
لا يحس انه مواطن وليه وطن لما يروح يتفسح ف ستى ستارز ولا كارفور ولا هايبر ون
ReplyDeleteاو حتى يشوف اسعار المنيو ف كافيه سينابون
انا افتخر بمواطنتى طبعا .. وانى مصريه ابا عن جد .. ازاى بقى لسه مااتحاتليش الفرصه انى اعبر عن الفخر ده
بس قريبا باذن الله
تحياتى