عندما يصبح المواطن رقاصه وبيرقص

مساء الخير .. كيف الحال .. ماشى الحال

منصوب بالفتحه الحال

ع بركة الله

اول امبارح كنت اشاهد التلفاز انا وامى ف ليله شاعريه سوداء جدا

وانا ماسكه كتابى ف امان الله وبزاكر وامى ماسكه الريموت ف امان الله وبتقلب

واذا بـــــ
.
.
هزى يانواعم يقتحم علينا المنزل

ويذيب سكون البيت ويبدد السواد ويقلبها حمرااا

هى ايه دى اللى حمراا .. التلاجه ياعمى

نلاقى ياسيدى الفاضل بنت نازله رقص ببدلة رقص

فالحجه والدتى ببرائه شديده قالتلى ايه ده

قلتلها رقاصه .. قالتلى وبتعمل ايه

قلتلها اكيد بترقص ههههههههه

هتكون بتقمع باميه يعنى

المهم طبعا رميت الكتاب .. كتاب ايه بقى وده وقتوو

واديلو وع الواحده كلو يرقص ع السقفه كلو يرقص تيرارارا

ساعه ونص عزيزى القارىء م الهز والشخلعه والمياصه

فتبارت عشر متسابقات م مصر ولبنان والمغرب والبرازيل وكستريكا وروسيا والمانيا وغيرها

وكانت لجنة التحكيم مكونه م ..

الفنانه الكبيره صاحبة الوسط العالى نجوى فؤاد

والاستاذ ظاظا مدرب الرقص المصرى

الراجل ده جبولو مشهد وهو بيدرب احدى الهزازت (( نسبه للبرنامج اللى اسمه هزى يانواعم))

والله كان بيهز هز ..اوعى وشك يعنى

وكان ف تعليق م حبيبة قلبنا نجوى فؤاد بتقول لاحدى المتباريات ف الرقص ..

لازم تركزى ف الرقص .. الرقص ده محتاج تركيز

والاستاذ سيد الرجاله زازا بيقول لواحده

ف الرقص لازم م اول ضوافر الرجل لحد خصيلات الشعر ترقص معاكى

وواحده تانيه اسمها معرفش ايه كده م لجنة التحكيم برده كانت بتقول

الرقص ده مش مجرد حركات .. الرقص ده تعبير ومشاعر واحاسيس

والواد احاسيسو بتوجعو وعايز هزازة تدلعوا

وبهذا الشو الحامى الوطيس (( معرفش معناها ايه بس هما بيقلوها كده ))

والذى يتميز بشفافيه عاليه م اصابع الرجل حتى اطراف الشعر

فانت عزيزى المواطن لم تعد بحاجه للذهاب الى شارع الهرم او حتى الى الهرم نفسه

فلديك كباريه يقدم عرض راقص لمدة ساعه ونص يحييه هزازات م جميع الانواع

ماعليك سوى ان تختار الهزازه المناسبه لمزاجك وتبدأ معها رحلة الدعم والتصويت

لتصل بها لمراتب الهز العليا .. وانا هبقى اجبلكم المخدات ملكش دعوه

اغلقت التلفاز مع دعوات امى الساخره

الهى يخربيتهم .. هيبوظوا شبابنا .. هيضيعوا رجالتنا

هيصيعوا بناتنا ..

وهو اللى مبوظنا هو ..

هو اللى مضيعنا هو ..

هو اللى مصيعنا هو ..

حسبنا الله ونعم الوكيللل

اللى ماشفنا مسابقة عن التفكير الهندسى او ابداع طبى

الا اشى ستار اكاديمى واشى ميشين فاشون واشى بيرفكت برايد واخيرا هزى يانواعم

بس والله عندهم حق .. مالكل دلوقت بقى بيرقص .. تنكر انك مبترقصش

المحامى بيتراقص ع القانون علشان يخلى الحق باطل والباطل حق

وانت بتتراقص ع والدك علشان تسحب منو فلوس علشان مصروفك خلص

وانتى بتتراقصى ف لجنة الامتحان علشان تنقشى معلومتين م اللى جنبك وتنجحى

والموظف بيتراقص ع رئيسو ف الشغل علشان يزوغ وميقفشوش

والزوجه بتتراقص ع زوجها علشان يزودلها مصروف البيت

والسياسى يتراقص ع شعبه لاقناعه بان مزيد م سوء الحال لن يجعله سيئا ع الدوام

ونائب مجلس الشعب (بكسر الشين ) يتراقص ع ابناء ديراته لحد مينتخبوه وميشفوش وشه تانى

والممثل يتراقص امام الكاميرا حتى يحصل ع مليون جنيه ف تلاتين حلقه

والشعب يتراقص ليتجنب سخط المسيطرين

سيطر ياموسيطر .. لووووول

والمواطن يتراقص للحصول ع رغيف عيش وبربع جنيه طعميه وبجنيه فول

نعم نحن جميعا رقاصه .. وبترقص

فى اللى بيرقص بلسانو

وفى اللى بيرقص بايدو

وفى اللى بترقص م ضوافر رجلها لشعر راسها

فهيا بنا نرقص .. عزيزى المواطن