؛¤ّ,¸¸,ّ¤؛°`°؛¤ هابى الـ 2008¤؛°`°؛¤ّ,¸¸,ّ¤؛

هيييييييييه سنه جديده

سنه سعيده ..

يارب كل اللى عمل خير السنه اللى فاتت يكون ربنا جزاه عنه خير

واللى عمل شر يكون ربنا غفرهوله

يارب اللى غلط يكون فهم غلطه وميككرووش

واللى عمل حاجه صح ميفتكرش انه كده عدى ..

يعرف ان لسه العالم قدامه كبير

يارب اللى نجح ميفتكرش انه ملك الدنيا وما فيها

يارب اللى فشل ميفتكرش ان دى نهاية العالم

يارب السنه الجايه ميكونش فيها ولا نقطة دم

يارب الدنيا كلها تبقى حب وخير وسلام وامان

يارب خليلنا كل اللى بنحبهم

يارب وفقنا وقدملنا اللى فيه الخير

وابعد عننا اى شر

يارب اكرمنى وباركلى ف عملى ووفقنى

يارب خليلى كل اصحابى ووفقهم وقويهم

اشوفكم السنه الجايه يااصحابى الالكترونيييييييين

علشان اقولكم 2007 عملت فيا ايه بالظبط ؟؟

هابى نيو ييييييييييير

.

الساعه دلوقت 12 بالظبط

.

بس توقيت المدونه هنا هو اللى مفوت

.

معلش خليها عليكم

فن الاتيكيت ..

ده بوست قريته عند دكتور محمد (( دكتورنا الحر )) والصراحه متمالكتش نفسى

غير وانا بستأذنه علشان انقله هنا .. وبالرغم انى مستنتش موافقته

بس هو ان شاء الله مش هيكسفنى ولا هتفتكروا ايه .. معقول يكسفنى

ربنا يستر بقى .. بس لا احنا دكاتره والدكاتره مبيكسفوش بعض .. بيكسفوا المرضى بس

لووووووووووول

اسمحوا لي أن نتحدث سويا اليوم عن أمر غاية في الأهمية

عن قيمة عظيمة تزين كل من تحلى بهاوعن آفة كريهة

بدأت في التغلغل بين أفراد مجتمعاتنا وأنفسناعن الذوق أتحدث ...أو الايتيكيت

(عشان لو في ناس خيخة بتقرا)..

ما عليناهناك الكثير من الأمور التي تناسينا فيها الأسلوب العالي في الذوقيات

والذي قبل أن يساهم في تسهيل الأمور والأعمال

إنما هو تاج عز وزينة لصاحبه والمتمتع بهوقعت يدي على كتب قليله في هذا الأمر

منها كتاب الذوق سلوك الروح للأستاذ عباس السيسي رحمه الله

وكتاب تقرير ميداني للأستاذ محمد أحمد الراشد

وحلقة الذوق أو الايتيكيت للأستاذ عمرو خالد

وأحببت أن أشارككم في بعض الجمل الكاملة التي أحضرتها من التقرير الميداني

كاملة بقليل من التصرف حتى نحاول سويا أن نعلو ونسمو بأفعالنا

وروحنا نحو المعالييقول الأستاذ الراشد:

ففي نظافة البدن والملبس

يستحب أن يكون الفرد أن يكون كثير الاغتسال وخاصة أيام الحر حيث يعرق البدن

، بحيث لا نشم منه رائحة العرق ولا من قميصه ولا من جوربه

حين ينزع حذاء من المساجد والمجالس.

وأن ينظف أسنانه بالسواك أو الفرشاة أو بهما معا عدة مرات في اليوم ،

وخاصة عند التوجه إلى المسجد أو إلى النوم،

وفي مجالسة الآخرين والحضور الاجتماعي

نكره أن يقص أظافره في مجلس، أو يضع رجلا على رجل أمام من هو أكبر منه سنا أو مقاماً ،

إلا أن يكون بين أقران ..

وفرقعة الأصابع أو عظام الرقبة في المساجد والمجالس قبيحة

، وكذا كثرة التنخم والنحنحة ، أو التمخط بصوت عال،

ولو استطاع أن يقوم ليتمخط في بيت الخلاء ، أو الحمام لكان أجمل

، وليكن المنديل معه دائماً ، ومناديل الورق، وليكتم التجشؤ قدر استطاعته

، فإن تساهله فيه إنما هو من العيب الشديد.

وإذا كان ضيفا

فليأكل أكله الاعتيادي الذي يأكله في بيته أو أكثر

، لتطيب نفس من دعاه ، ومن العيب أن يأكل بضع لقيمات فقط،

حياء أو لسبب آخر، فإن ذلك يؤذي الكريم، ويؤذي نساء البيت اللواتي أعددن الطعام،

وسرورهن يكون بمقدار أكل الضيف

وفي الزيارات

وليكن طرق الباب يرفق ، ولمسه الجرس قصيرة ،

ليست متصلة مجفلة ويكون الوقوف يعد الطرق جانبا لا أمام الباب،

إذ فتحته امرأة، أو وقع النظر إلى الداخل.

ومن الظلم أن يستهين زائر بأوقات الناس فيتأخر كثيراً عن الموعد ولا يأبه ،

وأظلم منه من يتشبه بالغريبين فيحاسب على تأخر دقائق قليلة.

وفي استعمال السيارة

نلتزم بقواعد المرور ، فإنها من الطاعة الشرعية لأولي الأمر ولو لم يحكموا بالإسلام ،

ونحب أن تكون سيارة المسلم نظيفة مثل داره وثوبه.

ولا يليق أن تقف أمام بيت صاحبك وتنادي عليه بمزمار السيارة في وقت ظهيرة أو نصف ليل،

لئلا تزعج جيرانه ، وإنما ذلك فعل الشباب الطائش
.
وإذا سقت سيارتك في طريق ترابي وقاربت أحدا يمشي فاخفض السرعة إلى أدنى ما تستطيع

، لئلا تؤذيه بالغبار ، ولربما يكون قد لبس قميصه لتوه، وهذا من أبشع الظلم واللاإبالية .

وإذا سبقك سائق يجهل منه وأخذ دورك في المرور أو في احتلال موقف فلا تسابقه ،

بل أصبر وكن أرفع منه.

ولا تحرص على إيقاف سيارتك في ظل بيتك أو بيت جارك بحيث تمنع مرور السابلة قرب الحائط ،

فترتضي لسيارتك الظل، وللناس الحر.

وقم في السيارة الحافلة للمرأة وأعطها مكانك ، ولو كانت سافرة
، ولا تزاحم عند الركوب ، ولا تضايق قارئ الجريدة الجالس إلى جنبك بالنظر في جريدته.

وفي المساجد

نكره أن يصحب الصغار جدا من أولاده،

وأن يلبس قميصا قصيراً يكشف عن أسفل ظهره إذا ركع.

وإذا خرجت من الصلاة بيدك نعلك فلا ترمه على الأرض وأنت واقف،

لأنه سيحدث ضوضاء، ويثير وسخا في وجه من أنحني للبس حذائه،

ولكن اقترب بيدك من الأرض بالانحناء ،

وضعه برفق.

وإذا سرت عند جدار وقاربت نهايته عند زاوية يتعطف فيها الطريق فابتعد عن الجدار

، إذ ربما فاجأتك عند الانعطاف امرأة ، بل أي سائر ،

وقد يكون ما تكره ، من وسخ أو غيره
.
ونحن أجل من أن نبصق في الشارع ،

إلا في ناحية فيها تراب عند الضرورة واستعمال المناديل واجب ،

ولا نلقي زجاجة فارغة في الشارع أو عليه أو منديلا مستعملا.

وللأذواق بقية إن شاء الله

شكرا شكرا جدا دكتور محمد

بزاكر ازاى .. اعلى افتكاسات ..!!

مساء الخير .. حبايبى الحلويين. واخواتى الكبار والزوغننين :

.

كنت قاعده بخيط كوم عمك عماد .. وسمعت صويييييييت جاى م ناحيتكم

.

كان ف حاجه ان شاء الللللللللللللللللللللللللله ...

اه دى سمسمه كانت بتزاكر بس ...

.

جه ع بالى وانا قاعده بزاكر .. ونظرا انى بزاكر وكما يقول الاخرين بغرابه شديده

.
لا تتماشى قطعا ومستقطعا مع برستيج طبيبه مثلى ال طبيه ال

.

ولا يتماشى مع مستوايا العقلى ... ولا

.

يتماشى اصلا انه اسلوب ينجح اخر السنه م اصله

.

معرفش هما م فين جالهم ان عندى مستوى عقلى م اساسه ..

.

بس هما اللى بيقولوا

.

فحبيت كل واحد يقولنا بيزاكر ازاى

.
وانا هقلكم انا بزاكر ازاى ... بس م غير ماحد يتريق

..
انا عندى وضعيتين للمزاكره

...
اول وضعيه هى اول 3 ساعات بزاكرهم ... ودول بيكونوا ع الكمبيوتر

.
الكمبيوتر مفتوح ... مستلقيه ع الكرسى ورجلى ع التربيزه ف وش الجهاز

..
وسعد الصوغير شغال .. والعنب العنب العنببب تيراراررررررر ..

.

والكتاب ع رجلى .. ع رجلى اللى فيهم صوابع هههههه اسمه ايه كف رجلى يعنى

.

هههههههههههههه ع ال foot يعنى .. والسماعات ف ودانى .. وزاقه الكرسى بضهرى زنقاه ف الحيطه

وطبق الموز ع ايدى اليمين ... والسودانى ع ايدى الشمال ..

.

مفيش سودانى مش مشكله

بس لازم يكون ف موز

.

.. والنداره ف وشى .

.

وبزاكر بعنيا .. واكل باديا .. واقلب الكتاب برجلى .. واسمع بودانى

.
كل اللى بيشوفنى بزاكر كده ... هيتفرس ويعرف بفهم ولا بزاكر كده اصلا ازاى

...
بعد ال 3 ساعات دول ..

.

نيجى لساعة التسميع

ودى بتكون ع السبوره الفورميكا بالقلام ...

.

اه اومال ايه ده انا عامله فصل ف اوضتى ههههههه

.
وبعدها تيجى ساعه ونص تحت الباطنيه ..

.

اغمض عينى واتصور شكل الصفحات والكلام فيها واسمع ف مخى

.
ساعه ونص م الريلكسيشن التااام .. وبتكون ع انغام ام كلثوم دايما

.

تخيلوا سعد الصوغير وبعده ام كلثوم هههه بعمل ارتجاج لمخى يعنى

.
يتخللها بعض السرحان ... هنتغدى ايه بكره

...
الدكتور هيدينا كام صفحه بكره

...
العربيه اللى شوفتها ف الباركينج النهارده كانت تجنن .. بس ماركتها غريبه

..
رباط التوتشى اتقطع ابقى اديه لماما .. وياترى هتشتمنى ولا ايه .. علشان دى سابع رباط يتغير

.
وف نهاية الساعه ونص دول بروح ف النوم م حيث لا أدرى

.

ويجى بابا يطفى النور الفجر لما يصحى

.
والصبح اسمع قصيدة .. لا لا .. لا تكذبى ..

.

انا دخلت لقيت النور شغال الفجر

نعم انا طفياه قبل ماانام يابابا

.
والله انا اللى طفيته الفجر

.

معلش يابابا خليها عليك

.
وعملتلكم رسم توضيحى كمان فوق علشان تستوعبوا الموقف

.
يلا كل نفر يقولنا ازاى بيزاكر ..

.

انا اعرف واحده مبتعرفش تزاكر الا وهى ممدده رجلها ف البانيو ف ميه دافيه

.
هو كده دايما العلماء اللى زى حلاتنا بيبقوا مبدعين ..

.

احم احم دمتم ع الف خير

.
ملحوظه ... محدش يقول ان الموضوع هايف .. بالعكس جربوا انتو تزاكروا بطريقتى

.
وانتوا بعون الله

.
مش هتشيلوا ااقل م تلات موااد

.
بالتوفيق

مكنت اتجوزت امى احسن .. ..

الصراحه يعنى .. انا مش عارفه اتكلم م هول الصدمه

سلامو عليكم الاول ..

مالك ياسمسمه بتنهجى كده ليه ..

م اللى شوفته م اللى شوفته .. عاديك يااخويا ويااختى ع اللى شوفته

حدث ف شارعنا حدث جلل

بنت الجيران اللى قصادنا .. اتكتب كتابها تانى يوم العيد

عؤبالنا ياااااارب وعؤبالكم وعؤبال السامعين

البت امبارح خرجت معاه تتفنسح .. وانا شوفتهم بعينى اللى هياكلهم الدود دول

مش هخبى عليكم .. حسيت بمراره فزيعه والدمعه كانت هتفر م عينى وهى مأنكجه ف العريس كده

وسرحت بمخلخلتى (( مخيلتى يعنى )) وقلت ياترى القرد اللى هأنكج فيه هيبقى شكله عامل ازاى

هاااااااااااااااااااا .. تنهيده مصاحبه بخروج نار افضت لخسائر قليله ف الارواح

ودخلت أنكجت ف الكتاب ... ماهو ده اللى احنا فالحين فيه اصلا

بس الرغى ده كله مش موضوعنا برده ..

النهارده بقى بعد المغرب كنت قاعده بزاكر برده

لقيت ماما حبيبة قلبى .. جايه تندهنى تقلى تعالى البت خارجه مع العريس

ولا اتحركت م مكانى .. قولت بس ماما هتاخدنى وتستفرد بيا وتاخد منى اعز مااملك

كتابى طبعا .. وتقلى شايفه اهى معهد واتجوزت وزى الفل ... مش زيك بقيتى شبه العفريت م يوم

مادخلتى معهد الحكمه بتاعكم ده ..

لقيت ماما بتنده باستماته

قلت يمكن يكون ف حاجه بجد .. وبعدين امى لو عايزه تسمعنى القصيده

هتيجى لحد عندى وتسمعهالى .. مش اشكال يعنى ..فاسمعها ف البالكونه ف الطراوه احسن

خرجت ايوه يامااااا مــــــ

شوفت منظر وقف شعر راسى الصراحه ونزع منى البرائه

البنت لابسه بنطلون جينز استرتش وبدى ع كمر البنطلون .. وحزام بيلمع ساقط

وفارده شعرها وحاطه كمية ميكب مرعبه ....

ولولا انى شوفت اخوها واقف معاها .. كنت افتكرت ان حصل غزو م كازينو الليالى السوداء اللى ف الهرم

اخر شارع العريش ده لشارعنا

ملحوظه متملحظه :: البنت دى كانت لابسه خمار .. ان ان ان

وهى كانت السبب ف انى اتحجب م اولى اعدادى .. وكانت بتدى دروس ف الجامع وبتحفظ الاطفال القرأن

واهلها ع قدر كبير م التدين ..

طبعا انا وقفت فاتحه بؤى لحد مركبت مع الباشمهندس العريس العربيه وغاروووا

ولبست ونزلت جرى ع ماماتها .. وطلعت الحكايه ايه بقى

ان العريس اللى صمم انها تخلع الخمار .. هو عايز ست يتجوزها

وقالهم بنفس الجمله .. ماكنت اروح اتجوز امى احسن

ياربىىىىىىىىىىىىىىىىىىىىىى

قلتلها ياطنط .. دى مفروض مجرد مايقولها كده تخلعله الشبكه وتطرده براا فورا

قالتلى ويطلقها ..

قولتلها وتتحرق بجااز ...

قالتلى كمان ده عريس غنى وجابلها شبكه ب 20 الف وعفش ب معرفش كام وهيعملها فرح فين

ابقى خلى الحجات دى تنفع بنتك ف اخرتها ولا اقولك ..

ابقى افرحى بيها لما تجيلك ملفوفه ف ملايه ف نصاص الليالى ..

ربنا يرحمنا ..

وسبتها ومشيت .. معرفش جاتلى الجراه ازاى انى اقول الجملتين دول لواحده ف عمر امى

بس الصراحه انا مكنتش ف وعىى

يالهوى يالهوى يالهوى .. ياجدعان

انا كنت اسمع عن زنا المحارم ... وازاى اخ او اب اللى ينهشوا لحمهم بنفسهم

واسمع عن الزوج اللى اجبر زوجته انها تجالس اصحابه

لكن دايما كان بيرد جوايا حاجه تقلى لا ده افورة صحافه .. ده ضجة اعلام

مش ممكن اب او اخ او زوج يعمل كده

مجتمعنا لسه بخير برده
...

اهو انا شوفت بعنيا خلاص ... كله اتدمر كله اتكسر ..

العريس زباله .. ده شىء مفروغ منه .. زباله وديوث ومعندوش نخوه

وم ذوات الدم البارد ومحصلش حتى الحمار اللى بيحمى حمارته م الحمار اللى جنبه

لكن انا عايزه افهم ايه اللى يخلى البنت دى تقبل بالوضع المهين ده

وهى اللى كانت بتقولنا لا طاعة لمخلوق ف معصية الخالق

وامها المنقبه واللى بتتحجج بحجج واهيه علشان تبرر الموقف

هل ده لان البنت رفضت عرسان كتير وفسخت خطوبات اكتر علشان كانت بتدور ع السوبر مان

السوبر ماديا طبعا ... واخيرا جالها

طيب ماهو بالمنظر ده خلاص عرفنا جاب فلوسه منين يااست الحسن

باينه زى الشمس

ولا خايفه انها تتطلق فعلا .. وتحمل لقب مطلقه م قبل ان تنعم بلقب المدام

ولا خايفه ان الفرصه دى بكل مظاهر ترفها متتكررش تانى ..

ولا ايمانها كان ضعيف وابهرتها الوان الترتر اللى ع البدى والحزام الساقط

وكانت م زمان بتحلم تعمل كده .. ولما جتلها الفرصه .. فما صدقت

انا عايزه افهم دى هتأامن ع نفسها معاه ازاى دى ياجدعان .. ولا هيتقى ربنا فيها ازاى

وهو واضح اصلا انه علاقته بربنا .. كلمه م اربع حروف مكتوبه ف بطاقته ((مسلم ))

....
ياترى حياتهم هتكمل .. ولو كملت هيبقى شكلها ازاى .. ولو خلفوا عيال هيبقى اخلاقهم ازاى

...

انا بعقلى الزوغير بتاع ال 21 سنه لسه .. شايفه انها بنت ال 28 خسرانه بكل المقاييس

ان اجلا او عاجلا ..

فخير خساره .. خسارة الدنيا ومكسب الاخره

لما رجعت وحكيت كل الكلام ده لماما فجه ع بالى ..

طيب افرض هو مكانش عمل التكه دى قبل الجواز فعلا

وكانت بقت ع عماها كده لحد مالقيته بعد شهر م الجواز

جبلها اصحابو الانتيم وعملوا عليها حفلة باربكيو

طب وده كان هيتعرف ازاى قبل مالطوبه تيجى ف المعطوبه

ما ممكن كان مثل عليهم انه متدين وفللى جدا ومبيفوتش فرض

وساعة الجد متلاقيش اللى يقولها امين

ياخرابى ياماما ..

ومتقلليش ياماما الحجات دى بتبان .. هتبان ازاى يعنى .. لو مكنش عمل تكه زى اخلعى الحجاب دى

ماما ردت رد منطقى جدا الصراحه ..

الحل الوحيد يااعبط عيالى (( اللى مفيش منهم غيرى اصلا ))

ان العروسه تفضل شايله معاها سلاح حاد .. زى اللى شايلينه ف العربيه علشان وانتى سايقه لوحدك

تمن تسع شهور كده لحد متتطمنله ..

ويكون خلفوا اول عيل .. صح ياماما

بس سيبك ياماما .. انعدم الامان ف الدنيا خلاص

انا مش هتجوز .. هفضل معاكم .. ع الاقل انتى وبابا

اللى اعرفهم احسن م اللى معرفهمش

ماما .. ياختى حجة البليد مسح الصبوره

شكرا حضرتك ياماما .. محدش بياكلها بالساهل

ربنا يهدينا جميعا .. ويعافينا مما ابتلى به غيرنا

مخ البنات .. بالطحينه والفلف الحار

والنهارده جه معادنا مع الحلقه التانيه م الحمله التى تم تدشينها ع المجتمع الانثوى
.....
ايه اللى موجود جوا دماغ البنات ؟؟

.
لا مش مخ يا نبييه ..!!

..

ده كفته باللحمه الضانى

..
مش مصدق طب تعالى شوف

.

منه :: هاى يارونه .. اموااه للكل

.

رنا :: اتاخرتى ليه يابنتى

.
منه :: اووووف الدكتور خنيقق تخيلى شرح صفحه ونص
.

رنا :: ياربىىى ده ايه ده .. ومستحملاه ازاى يابنتى

.
منه :: لا منا خلاص فاضلى معاه صفحتين كمان واقوله اعطنى حريتى
طلق يدىىىى

...
رنا :: طيب بقية البنانيت راحوا يجيبوا الحجات لزوم القعده

.
منه :: اشتاات تعالى نطلع نظبط الميك اب فوق لحد ميجووا

.
رنا :: وليه فوق مااهنا كويس اهو برده لزوم الشغل .. طلعى المرايه طلعى

.
منه :: شوفتىى كنت عند انديامو امبارح واشتريت حتة جيب فسدقى .. واااااو

.
رنا :: وده هتحطى اى شادو عليه ايه

..
منه :: معرفش لسه بس هو يااصفرات يابنيات بقى .. هبقى اقعد اجرب كزا لون واشوف ايه يمشى

.
رنا :: البت اختى خرجت هى وبنت خالتى وجابو شوية روجاتتت .. تحفه

.
منه :: مش دى بنت خالتك اللى كانت مخطوبه وفرحها قريب

.
رنا :: اسكتى ده فسخت .. تخيلى الواد ال ايه عايزها تلبس نقاااب

...
منه :: اووووف هو منهم .. الناس دى كترت اوى والله

..
رنا :: نصيبنا بقى الواحد مش ملاحق يتخنق م ايه ولا م ايه

.
منه :: سيبك انتى ابقى هاتيها معاكى يوم الخميس .. بس تبقى متظبطه يعنى

تقفلها ساعه عند المشرحه .. ورربنا يسهل

.
رنا :: اسكتى مش شوفت شاهى والواد بتاعها عند المشرحه وكانوا بيتخانقوا

.
منه :: اصلا البنت شاهى دى بت واتيه اوى ع فكره والواد قمر معرفش طاايقها ع ايه

.
رنا :: طب اسكتى شاهى جايه اهى .. نازله م ع سلالم المدرج

.
منه :: يالهوى ع بواخة اهلها .. فاكره نفسها جوليا روبرتس نازله م ع الرد كاربت

.
شاهى تعدى عليهم .. ازيكم يابنات

.
منه :: امواااه ياشاهى حبيبة قلبى .. وحشانى بفزززززاعه

.
ايه اخبارك واخبار الواد ياقمرايه .. والله بجد عصفورين مع بعض

.
شاهى :: ميرسى يامنه .. حبيبة قلبى .. هروح بقى انا .. انى سيرفس

.
تمشى شاهى .. وتقول للبت اللى جنبها .. منه دى بت بيئه اوى ..
انا مسمعتهمش الصراحه .. بس اكيد هى هتقول كده

..
جه بقية البنانيت .. بشنطة الحجات

.
طلع طلع المصاصات وزع وزع اللبان .. كانز لكل مواطن
وابتدت القعده

..
عارفين ايه اللون الموضه دلوقت

..
عارفين براد بيت ماشى مع مين دلوقت

..
ليه هو ساب جوليا روبرتس

..
مش كلوديا شيفر بيقولوا هيجيلها سرطان

..
مش هند صبرى قلعت الحجاب

..
مش البت مروه خلعت الواد علاء ..
ياعينى ده كان بيحبها اوى ..
بيقولها متكلميش ولاد خالص ..
قلعت الدبله وادته باللى ف رجلها

..
مش انا روحت للخياطه امبارح لقيتها بوظتلى الفستان ..
وبعدين هتيجى الفرح بايه يابنتى ..
مش عارفه بس لو متظبطش مش هروح .. كل السوريهات اللى عندى اتشافت قبل كده واتحرقت

.
يقرب منهم واد م اللى بيبيعوا مناديل

.
العصافير كلهن يقوموا ويبعدوا .. (( تقلش الواد داخل يعمل فعل فاضح

.

مش عارفه انا بجد ايه ده .. ملهمش مامهات تلمهم
.

ع رايك يابنتى .. اختى امبارح وهى خارجه م الكوليج بنت م بتوع الشوارع دول

.
مسكت فيها وقلتلها هاتى حتة ساندوتش ..ومسكت السندوتش

.
يعععععع واختك عملت ايه

..
ضربتها بالقلم طبعا .. ورمت السندوتش ف الباسكت ومشيت
(( طيب ماكانت ادته للبنت افيد ياهايفه ))
.

وانا امبارح ع الفيس بوك ضافنى واد .. قمرررررررررررر
امبارح لقيت البت مياده نزلت صور جديده ليها ع ع الفيس بووك

بس مسخررررره

..
وانتى صحيح ايه الاخبار مع المهندس ابو عيون خضراا

.
اهو لسه بجرجر رجليه .. بس وحياتك فاضله زلطه ويعلن استسلامه

.
وارفع ريااات النصر

.
ياجامده انتى ياجامده

..
مش هندخل سينما بقى انا اتخنقت .. بيقولوا فيلم هى فوضى جامد

.
هى فوضى ايه يااهبل اخواتك .. ده كله ناس بتضرب وبتتعور

.
هنروح نتفرج ع ناس بتتعور ليه يعنى

..
بيقولوا انه صاحب رساله

.
رسالة ايه .. واحنا تفرق معانا التفاهات دى .. وسعى ياقة الببدى

.
(( مجاز مرسل عن كبرى الجمجه وعلاقته الجزئيه ))
.

احنا ندخل شيكمارا .. دماغ وشكله عالى اوى وشكله فاجر طحن

.................................................
يجى كريم ومصطفى واسعد

..
ازيكم يابنات ايه الاخبار .. متجمعين عند النبى كده ان شاء الله
يااارب

.
ها الكلام ع ايه النهارده

...
مفيش ياكريم .. كنا بنهدى صافى اصلها ياحول الله شافت واحد م اولاد الشوارع دول

.
وصعب عليها اوى وقعدت تعيط

..
طول عمرى بقول علي صافى مثال للرقه والله

.
وكنا بنتناقش ف انابولس ده واللى بيحصل ف الفلسطنين ده كتير بجد

.
كريم .. انابولس اه .. طيب هنخلع احنا نجيب حاجه م الكافتريا ونرجعلكم نكمل مناقشه
........................
م قمه ف التفاهه .. لاستطناع قمه ف الثقافه

.
دى قعدة بنات وما يحتويها م تفاهه وسطحيه وقد تصل للاعراض يعنى

.
ومين ماشيه مع مين .. وهيثم كان سايق عربية فيفى امبارح .. الى مابعد ان يركنوا العربيه

.
هذا كل مايشغل اهتمامات البنات ..
اللبس والموضه
الحب والجواز والانتمه
الاكل والسينما
هذا مايشغل 85% م بنات حوااا

.
والباقى شويه ع قدر م الثقافه والتفكيير وقليل م السطحيه والتفاهه

.
وثقتهم الجيده بان هذه الصفات تعجب التماسيح (( اللى هما الشباب يعنى

وخبرتهم اللى فوق الوصف ف معرفتهم كيف تأكل الكتف
كتف التمساح طبعا

..
التمساح م دول عايز ايه .. شوية رقه .. وشوية دلع .. وشوية حجات فوق بعض
.

انتظرونا ف الحلقه القادمه

.

م مخططات احدى الطاوسات

.
كيف تسقطين تمساحا .. ف حبك .. ايتها الطاووسه ؟؟

.

واياك ان تخدعك المظاهر عزيزى التمسااح

المجتمع الانثوى .الحلقه الاولى . اكشن

مساء الخير .. انا الصراحه قررت انى اكشفلكم المجتمع الانثوى

.
وهنبتدى بموضوع ده مستفزنى م زمان اصلا اصلا يعنى

.
بس قررت انى اعبر عنه بدل ميفضلى يغلى جوايا .. وانفجر

.
خصوصا كمان دكتورنا الكبير كريم لقيتوا حاسس بيها هو كمان

.
وانا انفجر ليه .. طب مااطلعه واخنقكم بيه احسن ..

.
مش نظريه برده .. ع فكره انا افتقد جدا الاموشنز ف المدونه

.
واذا ان الحاجه ام الاختراع .. فقريبا هتوصل لاحدى اخترعاتى واضيف اموشنز للبولجات

.
اينعم ينفع نضيف موشنز عن طريق الصور ... بس ان يكون موشنز ف بوكس المدونه اجمد
.....
ندخل بقى ف موضوعنا
.

وانت معايا بجد حبيبى اصدق عينى لو بحلم اوعى تصحينى سبنى حبيبى اعيش وياك

.
.. ده انت واخدنى لدنيا بعيده وعالم تانى ومفيش حاجه معاك نقصانى
.

سبنى حبيبى اعيش وياك ... حبيبى ليه بحبك تعرف ليه هقولك كل مافيك وكلك ليا انا
.....
يقعد هانى يسبل لسهى ف الرايحه وف الجايه

.
وسهى ال ايه عامله نفسها ولا واخده بالها

..
وبنت الايه واخده بالها م كل رمشه هو بيرمشها اصلا وماشيه ف الكليه بقى

.
ناشفه ريشها .. نافشه ريشها .. قميش نفيشه نشف ولا منفشى ههههههه

.
طاووسه متباهييه بالموقف بقى
.

وجت اللحظه الحاسمه واخيرا اتشجع هانى انه يكلم نهى

.
بعد ماشرب 13 ريد بول ايون اللى بيعطوه جوانح ده

.

.وخد دفعه م كل اللى يعرفوه وكل الناس اللى بتقف عند المدرج

.
خلاص الواد صعب عليهم ده بقى بيحب ع نفسه ياعينى

.
ده لو قطه معديه هترفق بحاله يعنى

...
يتقدم هانى وهو بيأخر رجليه الاتنين .. ازاى بالميكنزم ده بيتقدم معرفش
.

بس هو واضح انه دفع رباعى

.
احم احم دكتوره نهى ممكن اكلم حضرتك (( دى كان اسمها سهى صحيح ))
ياللى اهو كله برتقال

.
تتفزع نهى وكأن حنش لاشها .. (( م فيرب يلوش يعنى يقرص ))
.

مع انها اصلا متربصه بكل خطوه كان بيتأخرها
.

وقايله لصحباتها كلهم وعارفين فاضله كام ساعه بالظبط ويوصلهم
باعتبار انه بيتأخر يعنى

.
بعد متفزعت سهى .. نعم سورى .. حضرتك تقصدنى انا ..
الواد ينظر ببلاها .. واكيد بيقول جوا نفسه وحد واقف اسمه كده غيرك ياهبله

.
هانى :: ايوه حضرتك يادكتوره ممكن كلمه ع انفراد

.
البت :: انفراد .. لا نو وااى مينفعش

.
هانى بعد محايلات وخلاص يعنى ده لو كانت نانسى عجرم كان زمنه شرب معاها شاى
مش وقف ع انفراد وبس

.
ياخدوا كورنر ويقولها هانى اللى فيه النصيب

.
وسهى عليها علامات قرف مصاحبه برغبه ف القىء الشديد

.
لدرجه تجعل المحيطين يقولوا ايه ده للدرجادى الواد ريحته وحشه

.
تنتهى المعركه بينهم بالترجيع فعلا م نهى هههه
والواد ياخد ايده ف جيبه ويجرى بعد اكتساء وجهه بمزيد م علامات الحزن
وعنيه خلاص هتمطر يعنى

...
وتعدى الايام والواد دقنه طولت
وكل حاجه فيه قصرت ..
الناس معادن بتنكمش بالحراره وتتبربر بالبروره ههههههههههه

.
ورايح جاى يعتبره قلب ورااح

.
وبطلتنا بقى ماشيه نافشه ريشها ,,, ست الطاووسه

.
والبنانيت بقى نصبوها عليهم ملكة جمال ورق العنب لموسم الصيف اللى فات

.
والواد شغال دمرتنى دمرتنى دمرتنى

.
شهر واتنين والواد بالحاله ده

..
ومش حارقه اوى غير تمن الريد بول اللى قربعه م غير فايده

.
وبعدين اذ فجأة ينتبه الجميع ف يوم ما

.
يدخل هانى وهو ع سنجة عشره زى زمان

.
وقد استعاد حجمه وشكله مرة اخرى

.
تتصدم البت .. ففى هذه اللحظه يعلن جميع م امام المدرج
سقوط ام الخلول م منصبها انتظارا لتحتله طاووسه اخرى

.
تانى يوم مباشرة .. يجد الجميع البت واقفه م 6 الصبح مع واحد
ومش لازم اقول ان الواحد ده جامد اخر حاجه ..
ليوناردو دى كابريو بس ميد ان ايجبت يعنى

.
وهاتك ياكلام وهاتك ياضحك وهاتك يارغى
وهاتك ياكانزات ف شايات ف جلاكسيات

. ..
ولو رسمت خط مستقيم م المكان اللى قاعد فيه البت ومعاها عمك دى كابريو ده

.
اكيد ان لم يكن مؤكد هتلاقى نهايته واقف عندها الحاج هانى ومعاه شلة صوحابه

.
بعدها بشهر كده تقريبا تلاقى هانى ماشى مع بنت

.
وف الغالب هتكون م علوم .. و م الاكيد انها ف اولى او تانيه

.
واحتمال انها تكون احلى م سهى .. يااما الى حد ما شغاله وبتمشى حالها يعنى

.
وبعدها بااسبوع تطلع حكايه جديده والكل بتابع تانى
...
بس اللى عايزه افهمه ايه اللى بيطير البنت اوى كده ان حد بيحبها

.

اوك حاجه كويسه طبعا ان الواحد يكون محبوب م الجميع

.
بس انتى يابنت الناس قولتيله سورى وخلينا زمايل والاسطوانات اللى كلنا عارفينها دى

.
مستنيه منه ايه يجرى يسوق عليكى كلاب الجامعه علشان يتوسطوله عندك مثلا

.
وخلاص الموضوع انتهى .. ايه عيزاه يفضل يحب ف سعادتك للابد

.

ويتشحتف عليكى كتير
.

ع ايه ياختىىىىىىىىىىىىى

.
انا لمست الموضوع ده م كتير جدا جدا جدا جدا يعنى
.

وحصل قدامى كتير جدا جدا جدا

.
ونصيحه لأى ولد لو مكنتش متاكد ان البنت بتبادلك نفس الشعور

.
او الى حدا ما متقبالك ... او شميت فيها ان عندها ريش

.
فبلاش احسن تتهور وتروح اصل هتنفش ريشها وهتتعور

.
وهيبقى منظرك جحش بيستحمى لاول مره ف حياته

.
وع فكره بقى 90% م البنات .. بيتباهوا بالحواراتت دى
.

ورامى بيحبنى ومصطفى طلعت عينه وابن الجيران ماشى ورايا بالمشوار
.

وعلاء جابلى مج ف عيد ميلادى .. وهنداوى جابلى كيس قطن ف عيد ميلاد الدوده

.
وفعلا ال 10% الباقيه هى اللى مبتتكلمش وهى اللى بتحب بجد

...
فنصيحه لكل شاب .. م اخواتى الشباب .
.

لا تدع قلبك فريسه .. لاحدى الطاوسات
لانك هيتعاش عليك هيتعاش عليك
.
.
انا كشفتلكم احدى وريقات المجتمع الانثوى اهو وف الغالب هيهدروا دمى

.
بعد سلسلة القفصف العشوائى اللى هعملها عليهم دى

.
بس بجد مع انى بنت بس بتفقع م حركات بنات كتير جدا

.
لدرجة انى حسيت انى مش بنات

.
ولانى واثقه بنفسى وعندى ريش

.
فطردت الهاجس ده فورا ... وقلت لا اكيد هما اللى مش بنات

.
مع حلقات جديده م المجتمع الانثوى

.
ملحوظه :: محدش يقول انى بتكلم كده علشان واقعه يعنى .. لا لا مؤاخذه

.
. الكبير كبير .. واقفين تحت البيت اهو طوابير
.

والله تنفع مطلع اغنيه

بس ياعينى الناس مبتشفهمش

.

صراصير مثلا

احم .. احم

تحياتى

سمسمه .. م اغنى 10 مليارديرات ع العالم

طالعتنا الصحف القوميه والعالميه اليوم

.

بتصنيف اكثر واغنى 10 اشخاص ع مستوى العالم

.
لعام 2030
.
ويتصدر القائمه بيل جيتس مؤسس المايكرسوفت
.
وقد لفت الانتباه المركز السابع والذى احتلته سمسمه
.
ولاول مره ف العالم .. ان يدخل ف التصنيف احدهم يحمل الجنسيه المصريه
.
.......
.
وانتقلت مصادرنا ع الفور .. لاجراء حديث مع هذه الشخصيه التى ادخلت مصر ف مصاف الدول
.
المذيع :: هاى سمسمه
.
سمسمه ::ياويلكم ياويلكم
.
المذيع :: احنا تو دااى جايين ناخد يور اكسبرينس علشان كل الشباب الاجيبشن
.
يمشى اون يور ستيبس ويبقى ريتش ريتش ريتش زيك كده
.
سمسمه :: طبعا الموضوع لارج اوى .. ولازم الشاب م دول يعتمد ع هيز سيلف
.
لان اوريدى الحياه بقت سو ديفكليت ..
.
المذيع :: اوكشن طيب بليز تقدمى نصايح لكل الشباب علشان يبقوا ليك يو اجزاجتلى
.

سمسمه :: اول حاجه ياماى سن .. انك تتنازل عن مبادئك .. توتالى

.

وتنيم ضميرك وتغطيه كمان .. وتعرف ازاى تهلب القرش صح

.
المذيع :: تهلب وات از ميننج اوف تهلب
.
:: سمسمه: ياماى لوف تهلب يعنى تعرف ازاى تجيب القرش م بطن العفريت

.

المذيع محدثا نفسه (( بطن العفرين يااااى دى بيئه اوى

.

وايه كمان ؟؟

.

سمسمه :: ان الواحد يشتغل ف كل حاجه ف اى وقت وف كل مكان

.

المذيع :: يبقى بتاع كله يعنى

.

سمسمه :: ايون اسم الله ع اسمك بالظبط كده .. تستورد بطاطس موسرطنه

.

.ماشى .. تدخل البلد لحم حمير وقطط ع انه بولبيف فاخر .. ميضرش

.

تدخل مناقصة تركيب كهربا لمدارس حكوميه ب 100000 جنيه

.

وتركبلهم سلوك وحجات متهربده وتطلع انت بفارق المكسب

.

تفتح مصنع طفايات عربيات .. وتتصاحب ع اللى بالى بالك

.

وتخليه يطلعلك قانون ان كل عربيه لازم يكون فيها طفايه والا يرفعوا اللى سايقها .. وتبيع انت بقى
.
بس تاخد بالك .. يوم متصدر حاجه لبراا ياحبيبى تصدرها ماركة ايه ون .. دول برا مبيرحموش
.
وهما اللى هتجرى عليهم لو وقعت وكترت سكاكينك ولازم تعمل حسابك وتنيملك كام ارنب
.
ف كزا بلد برااا .. علشان يدفوك وقت الزنقه
.
وهلما جرااا يعنى
.
المذيع :: اندرستود طبعا .. يو ميين ان الواحد اوبن هز بريين
.
سمسمه :: يس اوبن يور برين .. ربنا يأوبنها اون يور فيس
.
المذيع :: فاينلى .. بشكر حضرتك ع وقتك ده .. وجوود لووك الييرز اللى جايه
.
سمسمه :: ثانك يو .. ثانك يو
.
متبصليش بعين قويه .. بص الاول اللى ادفع فيا

احم احم .. هذا م فضل ربى

رشـ§ـو علـ§ـى قبـ§ـري مـ§ـن دمـ§ـوع عيـ§ـنه

معرفش انا اتجننت ولا ايه .. بس انا لقيت الوحل بينزل مره واحده

فخدوا شوفوا وقلولى رأيكم

رشـ§ـو علـ§ـى قبـ§ـري مـ§ـن دمـ§ـوع عيـ§ـنه

مشاعر ساميه

ليس للبعث والتسليه

امانه وتضحيه
ღ & ღ
شوق وعهد

لهفه ووعد
ღ & ღ
نعم انه الحب

آه عندما تجد من يحبك يحترمك يحتويك يخاف عليك
ღ & ღ

لو احتجت حياته لن يتردد مطلقا فى ان يقدمها لك

فهو يفضل ان يموت ويتركك تحيا فلربما تجد من يسعدك

ولكن لن يتقبل فكرة ان تموت انت ويحيا هو لانه لن يجد غيرك يسعده
ღ & ღ
نعم هذا هو الحب

ذاك الشعور الغريب .. عندما تراها قادمه نحوك

نعم تلك الدغده اللطيفه التى تسرى فى جسدك عندما تسمع اسمها من احدهم

عيناك اللمعتان عندما تنظر بالصدفه لتتقابل مع عينيها

ღ & ღ
شوق .. تشوفها

لهفه .. تسمع صوتها

خوف .. يبعدها القدر

طموح .. تمتلكها

غِيره .. يلمسها الهوا
ღ & ღ
حقا لا استحق من يولد .. من لم يذق الحب ابدا

رشـ§ـو علـ§ـى قبـ§ـري مـ§ـن دمـ§ـوع عيـ§ـنه

احلم ومالى لا احلم بسواك

فكيف استطعت ان تسقطنى بهواك

ان تاتى بى فى شباكك

ان تجعلنى حياتك

لازلت لااعى ماحدث

حقا انا احب ..!!

كيف ومتى واين

اه ياسيدى واه

نعم تذكرت

..
عيناك .. يداك

..
كم حلمت ان القاك

اه ياسيدى واه

قمر يتوسط السماء

وحيده فى صحراء

نسمات الهواء تتراقص فوق صفحات الماء

لم انساها .. لن انساها

نظرة عينيك ياسيدى

اه ياسيدى واه

لمن كل هذا الحنان

كيف اشعر بكل هذا الامان

نعم كيف.. هذه اول مره اراك

اه ياسيدى واه

لكم تمنيت هذا اللقاء

ولكن
.
.
ِ لو كان لى ان اطلع على الغيب

لارى انك ستبقى معى للابد فى قلبى

لا ادرى

لربما ..

.
ولكن

ولكن ياسيدى

لم اتطلع على الغيب

ِ..
وستبقى للابد فى قلبى ..
,,
مع خالص حبى

يامليك قلبى

لك حياتى وذكرياتى

فارحم اهاتى

بقلم ::الشاعره بسلامتها سمسمه

ملحوظه :: هذه الاحداث لا تمت بصله للواقع وانا اسفه لو كنت لوثت عنيكم سامحونى

ماما هستنى العيد لما يخبط ..

مساء الخير .. وكل مساء وانتم بخير

هل اختلفت فرحة العيد عام 2007 عن فرحة العيد ف 1997

بعد مرجعت امبارح بليل م العيد بقى وعيدنا قعدت افكر

هى دى اللمه اللى كانت م عشر سنين

ولا هى دى فرحة العيد م عشر سنين

بيتنا .. العيد الكبير .. 1997

(( عمرك مهتلاقى وصف زمان ولا مكان اعبط م كده ))

احم احم

نامى ياسمسمه بقى

..
لا ياماما لازم العيد يخبط واسمع التكبيره

(( كنت بفتكر ان تكبيرة العيد ده زى واحد بيخبط وبيقول ياساتر علشان الناس تفتحله ))

اه وبعدين تنامى الصبح لحد منوصل البلد ويبقى منظرك عيال اوى

ليه وهو انا مش عيال يعنى ياماما

يالا اسمعى الكلام انا عملتلك ضفيرتين اهو ونامى

اجرى اجيب أزازة المونكير وتحطلى ماما مونكير احمر

وادخل الاوضه .. اتفرج ع لبس العيد اللى متعلق ع الشماعه وع الجزمه تحت السرير

واطمن وانزل تحت الباطنيه

واغمض عين وافتح عين

..
وافضل صاحيه انسج ف خيالات واعمل مسلسلات للعيد بكره

وولاد خالى اللى جايين م القاهره واللى مبشفهمش غير م العيد للعيد

والخروف اللى هنحميه ونسرحله شعره

وخنقاتى انا وماما علشان كده غلط لما احمى الخروف هيجيلو برد

وبعدين تلبسنى اللبس ونتخانق علشان مش عايزه البس حاجه تحت اللبس وهى تضربنى وتقلى الجو برد

ايه ده هى ماما مش وراها غير البرد .. اوووف

الله اكبر كبيرا .. والحمدلله كثير .. وسبحان الله بكرة واصيل

هيييييييه التكبيره جت

تك تك ع باب اوضة ماما وبابا .. ماما العيد بيخبط اهو

ياماما .. اصحى بقى العيد بيخبط

ه بدرى روحى نامى شويه
اووووووف بقى .. اجرى اطلع ع السرير بتاعى وبطلوع الروح اعرف افتح شباك الاوضه

الله العيد حلو والسما جميله والهوا ريحته نفسها تجنن

اخد نفس جامد منه

انزل البس اللبس بنفسى والبس الجزمه بالصوره اللى ربنا يقدرنى عليها

ايه ياهبله اللى انتى عملاه ف نفسك ده وفاتحه الشباك هتاخدى برد

مش انا قلتلكم ماما مورهاش غير البرد

... لا والله لبست اهو

... لا لا مش شبعانه ... يييوه مش جعانه اصدى

باباا .. باباا .. هاتلى العيد فرحه ياسلام

يفتح بابا الكاسيت وتتعالى اصوات الموسيقى والعيد فرحه ياسلام

واجمل فرحه ياسلام .. تجمع شمل قريب وبعيد

واتنطط واجرى ف المكان واطلع ع كراسى الانتريه وماما ورايا بالشبشب
ى هتوسخى الفرش هتبوظى الدنيا
بابا .. سبيها العيد ميبقاش عيد غير بفرحة زمزومتى

يشيلنى بابا ويبوسنى ويدينى جنيه .. يلا روحى هاتى حجات حلوه

انزل ع السلم جرى .. اتكعبل ع اول لفة سلمه .. وطاااااخ

واقوم ولا كأن حاجه حصلت والعيد فرحه ياسلام

عمو نبوى .. العيد فرحه .. هات بمب وصواريخ وبلالين

خدى وكمان علبة كبريت اهى

لا لا مش عايزين بابا عنده كباريت كتير ف البيت

اجرى بالحجات والم عيال الشارع كله ونغنى ونفرقع صواريخ

ويزقنى الواد رامى ابن الجيران ف الطين علشان مش عايزه اديلو بلونه واعيط وتخرج امى م البالكونه

تلاقى امه مسكته وهتضربه تقولها سبيه دول عيال كل سنه وانتو طيبين

اطلعى ياسمسمه اغيرلك هدومك

تلبسنى ماما بيجامة العيد الجديده برده

واروح انط ع رقبة بابا .. بابا هو احنا هنفضل نجيب جرنال الاخبار ده ع طول

وانتى بتشوفينى بشترى غيره يعنى

لا

.
طيب

.

بابا بابا هنروح البلد امتى ...لما عمامك يجوا ان شاء الله

طيب هات جنيه .. ليه منتى لسه اخده

بابا .. بابا واتنطط ع رجله

يحط بابا ايده ف جيبه

هوىىى انت مش لسه مديها م نص ساعه

ياحجه كل سنه وانتى طيبه

انزل بالجنيه اشترى صواريخ تانى

وارجع ابص لرامى بصة انت اللى قتلت ببايا

واطلع ... الاقى عمامى وعماتى متجمعين

واخد العيديه وهييييييه هنروح المولد اصدى هنروح الببلد

ننزل الشارع .. سمسمه انتى هتقعدى ع رجل ماما علشان هناخد شنط كتير ومفيش مكان ف العربيه

لا انا مقعدش ع رجل حد انا مليش دعوه

اتحشر جنب ماما ف الكرسى اللى قدام

وورا ف عمى ومراته واولاده

والخروف ف الشنطه

ونمشى بالعربيات ورا بعض

يابت متمديش ايدك ع الكلكس

يابابا انا ازمر انا ازمر

العيد فرحه .. بيب بيب .. واجمل فرحه بيب بيب

نوصل البلد ونتلم كلنا ونجيب الخروف بتاعنا والخروفات التانيين

ونجيب ميه بالكوز م الزيرونحميهم ونسرحلهم شعرهم .. وتطلع امى تمسكنى م قفايا
كى متعمليش كده

اهىءءءءءءءءءءءءءءءءءءءءءءء

خلاص اتسدى اتسدى

يجى الجزار ويدبح الخروفات واحنا نفرقع حواليهم صواريخ ونجرى

وامى كل شويه تزعقلى وترفعلى حاجب وتقلى ماشى

ماشى ماشى وانا يهمنى يعنى

ونتلم كلنا ع الغدا .. احنا كتير اوى وسبحان الله المكان بياخدنا ازاى

ونخلص غدا ونروح ع الارض ونجيب الحمارات ونركبها ونلف ف الارض

ونحدف طوب ف الترعه ونهز النخل وننزل بلح

الله ده طعمه حلو اوى

ونرجع البيت المغرب

ه دددده اللى عملتيه ف هدومك
ياايه دددده ياشيخه ارحمى هدوم الصبح وهدوم بليل

اهىءءءءءءءءءءءءءءءءءءءءءءءءءءءءء

يلا يلا نولع الشاليه وندفى عليها ونعمل شاى ع الشاليه

نرص كلنا الكواليح ويولع بابا النار بعود كبريت بعد مولع بيه سجارته

ونقعد ننفخ ف النار .. ونولع ورق ونرميه

تيته تيته .. اعمليلى مسدس

اجبلها سنابل القمح م فوق السطح وتقعد تعملى مسدس

تيته تيته .. عايزه اكل عيش فلاحى وجبنه قريش

ونقعد نركب الكواليح فوق بعض ونعمل بيت ونهده

يلا بقى هنمشى احنا..

يقولها بابا وانا سمعاه مجرد حلم ف منامى

طيب شيل سمسمه وتعالى ارجع شيل الحجات

تيته تقله استنى حط عليها بطانيه الجو برد

واصحى بليل والفجر بيأدن واقوم اقف ورا الشباك وهو مقفول

واغنى ف سرى العيد فرحه واجمل فرحه

روح مع السلامه .. هستناك متتأخرش السنه الجايه

وافضل مستنيه لحد مايجى السنه الجايه

ملحوظه .. حمارات جمع حمار وخروفات جمع خروف وكواليح يعنى كوالح

وكباريت جمع كبريت .. حسب نطقى م 10 سنين

ملحوظه تانيه .. مكناش بنصلى العيد علشان كان الجو بيبقى برد اوى

وامى كانت بتخاف عليا جدا م البرد .. بنتها الوحيده بقى

ملحوظه تالته .. العيد فرحه كانت عندى هى التحيه الرسميه للعيد

واللى اتقلبت دلوقت لكل سنه وانتم طيبين

ده كان عيدى م 10 سنين .. دلوقت عيدى ازاى مسخ للعيد ..

ع قد مبعمل وبجرى بس عمرى محسيت بالفرحه اللى كنت بحسها زمان

ده ليه مش عارفه .. علشان نفوس الناس اتغيرت زى ما امى بتقلى

ولا علشان عجلة الزمن والحياه فرمت الناس زى ما ابويا بيقلى

ولا علشان ظروف الناس اللى مايعلم بيها الا ربنا والنكد اللى ف كل مكان زى ما عمى بيقلى

ولا علشان ايه بالظبط

معدش فيه عيديه .. ليه .. اهىء اهىء

ولما فكرت افرقع صواريخ ف الشارع زى زمان .. قالوا البت اتجننت

ولما قلتلهم هاتولى حمار اتفسح عليها .. قالوا البت طقت بجد

ونكتفى بالعيد متربعين ع الكراسى متجمعين ع اللاب توب او ع موبايلاتنا

وقاعدين نلعب جيمز

بس برده هفضل مستنياه لحد ميرجع زى زمان .

.
والعيد فرحه