Friday, November 30, 2007

ايه يابت الدلع ده كله .. صباحو مسخره ..


مساء الخيــر ...ها الجميع بخير ... اه .. اشته

.....البوست النهارده .. بوست لذيذ جدا



...تعالوا نتفرج ع المشهد ده الاول



... وبعدين نتكلم بس كل واحد يبعد عن التلفزيون يايجماعه نظركم حرام


.....مشهد 1...
ليل خارجى

..


بلوكنة ساره
انا مش بتاعة الكلام ده ... انا كنت طول عمرى جامده
ساره موبايلك بيرن ....حاضر ياماما
ساره :: الو عموووووور
عمرو :: سرسورتى ايه يابت فينك يامصيبه
ساره :: ال يعنى الواد بيتصل ولا بيسال ... ياله انت واتـى ...
عمرو :: المهموز ... ف خروجه النهارده ... هتبقى جامده كيك ... تدوسى معانا
ساره :: ادوس مدوسش ليه ... بس اوعى ايدك وفرامل اليد ... لوول
عمرو :: ماشى ياخفه .. هستناكى انا والواد ماهر ع اول الشارع ... ماهر معاه عربيته
ساره :: خلاص اشتات جداااا اهو نوفر جنيه المترو .. هع
عمرو :: يلا وقتك خلص
ساره :: سلامووون تيت تيت تيت تيت


انتهى المشهد ع خير ...



اطفى التلفزيون يابنى وركز معايا هنا


عموووور ....


سرسورتى ...

اوعى ايدك وفرامل اليد
...
ماهر معاه عربيته



....



صباح العسل والروقان ع كل الشباب الروشه .


..



احنا برده شباب روشه ميغركش يعنى النداره الكعب كبايه ده



ايه ده بقى ... هزار .. دلع ... الــخ


نسيت اقول ان عمرو وساره دول زمله ف جامعه عادى



يعنى لا هما مرتبطين ولا حاجه مثلا يعنى



بس الروشنه والتكبير ومعرفش ايه

...


معقول تخليكى كده ... تهزرى بالطريقه ده ..



تقبلى انك تخرجى مع زمله اولاد ليكى


اوك ياستى ومش بس تقبلى وكمان هتروحى بعربيتهم

...



والله كنتى روحى بالمترووو وانا كنت هدفعلك الجنيه


طيب تحبوا تشوفوا مشهد تانى
نهار خارجى ..
جامعه ... عند كافتريا تجاره
تدخل ماهيتاب ع الشله ...
هاى شباب .. امواااه نهى ... امواااه مى .... اموااااه اشرف
امواااه بتاعة نهى ومى كانت مباشرة من بؤ ماهيتاب لخد نهى ومى
اموااااه اشرف كانت غير مباشره من بؤ ماهيتاب ف الهواا ثم اكيد مفروض
انها هتستقر ع خد اشرف برده اومال هتروح فين هتضيع ف الجو يعنى
ماهو الاموااااااه لا تستفنى ولا تستحدث من عدم




طيب متيجوا نشوف مشهد تالت
... ادى احنا بنتفرج ورانا ايه
نهار داخلى ...
سكشن تشريح ..
. كلية الطب
سامر :: مها مها تعالى شوفى عنيين الجثه بتتحرك
مها :: ايــــــــه ياسامرتجرى مهااا جرررى ع تربيزة الجثه
وهوووب ينقض 5 ولاد معاهم ف السكشن طبعا م شلتها برده ويزقووها ع الجثه وهيييييييه
وتصقيف ولووول ومها تتوعد انها هتوريهم ...
سامر :: علشان تبقى تعملى فينا مقلب العصير تانى



اذن


...


عرفنا من المشهد التانى

...



ان ف تعديات واضحه جدا وموهاااااات واضحه وضوح الشمس



ومن المشهد التالت عرفنا ياحبايبى ان ف مقالب وحركات وكمان عرفنا ان التصرفات ده وصلت بتوع الطب



واللى بيطلق عليهم عادة لفظ حيتان الجامعه
...



طالب طب (( بالطو .. كتاب .. نداره .. دقن .. لبس مبهدل ))


اهم بقوا بيهزروا ويعملوا مقالب كمان



يعنى هزار مقالب دلع ضحك كلام باسلوب معدى خروجات م الاخر يعنى علاقه بلا حدود



انا مبقلش ان الكل كده لا طبعا

...

بس ده دلوقت الاغلب كده


. وتقلك ده انتيمى ويقلك ده انتيمتى صباحو صداقه مقطعها بعضها


مش هنقول


واحده واحده بعد المقالب والهزار والكلام والتلفونات اللى ف نص الليل ممكن يحصل ايه

بضايق اوى م اللى تكون بتتصرف بالطريقه ده ... وتقلك لا انا عارفه نفسى

ياستى ماشى بس ستيب باى ستيب هتبقى مش عارفه نفسك

مقلناش متتعرفوش ع اولاد ... بالعكس انا واحده م الناس اللى مشجعين علاقات الصداقه بين الجنسيين


لانها بتفيد جدا وبيكملوا بعض .. لكن بحدود



علاقة زماله وصداقه ف اطار معرفة الاسرتين ياحبذا

...بكل ادب واحترام تتناقشوا ف اى حاجه بس بالادب

احسن م الادب مفيش


ده تعليقى انا ع الظاهره ولا اخفيكم علما انى ببص للبنت والولد اللى بيتصرفوا التصرفات ده بقرف

بس الولد بقرف ااقل



لقى واحده معليه النفوخ ايه هيقول لا

ده حتى البطر ع النعمه كفر


لكن البنت اللى مفروض ادب واخلاق وحياء واللى واللى ...


جايه بتهزر وبتضحك وتدلع وتتمايع بالشكل ده
بعد كل الافلام اللى شفناها سوا النهارده



والكلام والرغى الكتير ده عايزه اسالكم سؤال واحد


ايه رايك ف الرينج تون بتاع ساره


ال انا مش بتاعة الكلام ده ال
ده انتى الكلام ده ذات نفسه ... ياسرسورته

...سلام كبير لعمرو ويارب تكون العربيه ولعت بيه هو وماهر وهما خارجين هههههههههه


رد وقول رايك ف الظاهره شايفها ازاى
تحترم البنت اللى بتشوفها تعمل كده او اللى هى اصلا بتعمل معاك انت كده

ردى وقولى رايك ف الظاهره شايفاها ازاى
تحترمى بنت وولد صداقتهم ماشيه بالصوره ده
ولا انتى شخصيا بتتصرفى كده
ولو بتعملى كده وبتتصرفى بالطريقه ده ...

ياريت تقليلى بتعملى كده ليه واوعى تقليلى انك عارفه نفسك


تحياتى جميعا


دمتم بالف خير
at

17 comments:

  1. دكتور حرNovember 30, 2007 at 7:31 AM

    تسلمي والله يا دكتوره على الكلام الجميل ده

    زينة البنت في حيائها
    والنبي صلى الله عليه وسلم كان أشد حياء من العذراء في خدرها

    وبالتالي
    صفة الحياء يندرج تحتها كل المواقف السابقه
    أنا شخصيا لا أحترم من نزعت منه هذه الصفه

    بارك الله فيك
    ودمت بخير

    ReplyDelete
  2. د/اجدع بنوتهNovember 30, 2007 at 8:17 AM

    فعلا يادكتور والله الواحد بيشوف مناظر يقول دول بنات دول .. بجد حرام يتكتبلهم ف شهادة ميلادهم لفظ انثى خالص
    ممكن يكتبولهم انثى تنازلت عن خجلها

    تحياتى

    ReplyDelete
  3. AnonymousNovember 30, 2007 at 12:59 PM

    والله يا زميله مش قصر ديل ولا حاجه بس دي فعلا وجهة نظري

    عن نفسي عندي اخت واللي مرضهوش علي اختي مرضهوش علي غيرها

    والمفروض البنت تصون ابوها واخواتها نفرض ان بنت ما من اللي بتقولي عليهم دول فجاه طب عليها اخوها او ابوها وهيا لا مؤاخذه يعني واقفه تتمرقع بالمنظر ده هيكون موقفها ايه ...؟


    وعلفكره انا بستحقر اي بنت بالشكل ده وعلفكره مقدرش الوم الاولاد لان البنت هيا اللي بتديله فرصه لكده

    هنقول ايه مفيش حاجه نقولها غير ربنا يهدي

    ReplyDelete
  4. السـيد شبـلDecember 1, 2007 at 6:24 AM

    والله فكرة حلوة جدا وانت عرضتى الموضوع بشكل واضح مع تفصيلات حلوة... بس هو فيه مشكله انك طولتى زيادة الى حد ما ... ودى كانت مشكلتى وما زالت.. لانى جديد ف عالم التدوين برضه....لكن المهم خللى عندك ثقة .. وكمان بتوع طب دول لا حيتان ولا حاجة ... ده احنا ماشيين بنبوس الحيطه مش ماشيين جنبها بس.. واتمنالك التوفيق وهضيفلك لينك عندى وهستنى زيارتك

    ReplyDelete
  5. د/اجدع بنوتهDecember 1, 2007 at 8:43 AM

    ميرسى جدا ياشبل باشا .. اهو لسه بنقول ياهادى وتاتا وانا واثقه باذن الله .. خليك واثق ياللمبى .. حاضر ياماما

    ReplyDelete
  6. UnknownDecember 2, 2007 at 4:57 AM

    ولسه..
    اللي انت قلتيه دا اخر ما وصل ليه الوضع
    لكن الوضع متحرك ومستمر ومتجه للامام
    يعني كمان سنتين تلاته هاتبقه هيصه

    ReplyDelete
  7. الـسـيـدة نـونDecember 2, 2007 at 2:59 PM

    يا لهوى يا لهوى يا لهوى
    اربى ابنى انا ازاى دلوقتى
    هاقوله ايه
    اعلمه ايه
    هو انا هاقعد اربى واعلم واقنع بالمبادئ والمثل العليا
    علشان لما يكبر شوية كل ده يضيع هباء

    اعمل ايه انا دلوقتى
    لما دلوقتى بيعملوا كدة
    امال لما ابنى يكبر هيعملوا ايه
    هيقعدوا على حجر بعض فى السكاشن ويقضوها فرنش كيس واحضان وتحسيسات وامواااااااااااهات عينى عينك
    ولا هيجيبوا من الاخر ويخلفوا من بعض من غير جواز والكلام البلدى ده

    احنا رايحين لحد فين
    اللى عايزة اقوله للناس دى
    ماتتربوا بقى
    ماتلموا نفسكم يا سفلة منك له له ليها
    متحترموا نفسكم بقى

    وعايزة اقول لاهالى العيال دى
    ما تربوا عيالكم بقى
    ما تاخدوهم قلمين على صداغهم خليهم يفوقوا
    ولا انتوا كمان عايزين اللى يفوقكم

    اففففففففففف
    بجد
    بوست يتعب نفسيا ويرعبنى على ابنى اكتر ما انا مرعوبة

    ReplyDelete
  8. AnonymousDecember 2, 2007 at 5:29 PM

    مبدايا بوست وهمى والمدونة كلها عجبانى
    ثانيا سرسورة الامورة بتاعة المشهد الول دى انا اؤكدلك انها مش بنت خاااااالص والحدق يفهم
    وبعدين الى بيحترم بيحترم نفسة وهى لما تتعامل مع الناس باحترام بتجبرهم يتعاملوا معاها باحترام برضة
    وانا بكلمك عن تجربة شخصية انا اول ما دخلت الجامعة كنت بتعامل مع كل زمايلى بطريقة طبيعية وكنت بتعامل مع الولاد زى البنات بس لقيت ان فى بعض الولاد بيستهبلوا وعشان كدة لازم البنت تكون واخدة بالها جدا مكن صداقتها مع الولاد
    انما لكل قاعدة شواذ وانا بقولك كدة لانى مؤمنة جدا ان ممكن فى بعض الحالات يكون البنت ليها صديق ولد انتيم
    انا ليا واحد صديقى انتيم واحنا دلوقتى صحاب من يجى 6 سنين ولما اتخطبت خطيبى كلمة هو الاول قبل ما يكلم ماما لان انا مليش اخوات ولاد اكبر منى وبيخاف عليا جدا وبيحترمنى جدا يعنى مش شرط عشان هو ولد وبنكلم بعض فى نص اليل يبقى انسان مش كويس لا بس صدقينى لو كل واحد احترم نفسة هتلاقى الى قدامة بيحترمة

    ReplyDelete
  9. د/اجدع بنوتهDecember 3, 2007 at 4:20 AM

    لا يا ماسك

    الوضع متحرك ورايح لفين بس

    عندككككككك

    ع راى هنيدى وهو عامل ست وخارج م العماره

    خصيمك النبى متخرجنى م هنا ههههههه

    ربنا يستر ويتراجع الوضع ميتقدمش خطوه زياده

    ReplyDelete
  10. د/اجدع بنوتهDecember 3, 2007 at 4:23 AM

    عندك حق ياام شريف والله

    مش بعيد ابنك اول ميتك 16 سنه يقلك تشاو مامى هروح انا وانتيمتى ننفصل بقى

    ونستقر ونبنى حياتنا سوا

    وهتبقى الجواز ده بقى موضه قديمه خلاص

    ياى دول متجوزين ياااى

    هههههههههههههه

    ربنا يستر والله ياام شريف

    ReplyDelete
  11. د/اجدع بنوتهDecember 3, 2007 at 4:25 AM

    اكيد ياضيفتى العزيزه (( طب مش كنتى تسيبى اسمك حتى ))

    اللى بيحترم طبعا بيحترم نفسه وبيجبر الاخرين ع احترامه حتى لو هما شخصيا مش محترمين

    وطبعا انا كمان ليا اصدقاء ولاد بعتبرهم اخواتى فعليا واهلى بيعرفوهم واهلهم بيعرفونى

    انا قلت انى م اكثر الناس تشجيعا ع العلاقات المتبادله والصداقه ف ضوء الاحترام والاخلاق

    ميرسى جدا ع رايك

    وميرسى ع تشريفك مدونتى البسيطه

    تحياتى

    ReplyDelete
  12. دكتور ماجيكDecember 17, 2007 at 10:39 AM

    ده حتى البطر ع النعمه كفر

    هى فين النعمة فى كده....
    موضوع مهم وانا عن نفسى بحتقر الولد والبنت الاتنين اللى بيعملوا كده
    بجد اتمنى البنات والشباب يفقوا من اللى هما عايشين فيه
    بالنسبة لموضوع النعمة الولد كمان لازم يعرف ان الرسول صلى الله عليه وسلم قال:عفوا تعف نساؤكم
    يعنى انت بتخرج مع بنت ومش همك بكرة تلاقى اختك او واحدة قريبتك او البنت اللى حبتها ماشية مع واحد وعامله نفسها كوووول
    كوووووووووووووووووول يا جماعة
    سلام

    ReplyDelete
  13. د/اجدع بنوتهDecember 18, 2007 at 1:50 AM

    حتى البطر ع النعمه كفر .. ده وجهة نظر اغلب الولاد اللى بيعملوا كده .. حيث ان البنات دى بايعه دماغها وجايه تتصرف بالطريقه ده فاشته جدا حد طايل

    وانا طبعا قلت انى بقرف م الولد والبنت اللى بيتصرفوا بالطريقه ده اصلا

    كوووووووول ياماجيك
    سلام

    ReplyDelete
  14. الراقـــص مع الذئـــــابJanuary 7, 2008 at 3:23 AM

    السلام عليكم
    معرفتش اكمل من الضحك
    يخرب عقلك انا سبت الجامعة بقالي سنتين اهو..[س علي ايامنا كانوا اعقل من كدا بكتير
    اخر حاجة كان مسك الاديدن ...بس....بس اكيد لازم هيبقي في تطور....جتنا نلية في حظنا الهباب....

    ReplyDelete
  15. د/اجدع بنوتهJanuary 16, 2008 at 1:01 PM

    خلاص ارجعها تانى ياحضرت الظابط

    ههههههههههههه

    ال جتنا نيله ال

    ReplyDelete
  16. 3arabyJanuary 17, 2008 at 4:09 PM

    ودى نهاية قصة الدلع وعدم الاهتمام الاسري بالبنت و أصدقائها أو زملائها .. ولازم الأهل يعتنوا اكتر برعاية ابناؤهم اخلاقياًوتربوياً حتى نعود للزمن الجميل الذى نادراً ما كانت تتم هذه المشاهد .

    يا رب اهدى بنات و شباب المسلمين .

    ReplyDelete
  17. د/اجدع بنوتهJanuary 18, 2008 at 3:27 AM

    يارب اهديهم واهدينا جميعا

    بس حضرتك شايف ان احنا ممكن نرجع تانى للزمن الجميل

    انا اشك ..

    ReplyDelete

مـش كـده ولا ايـه
..
ده حتى الاختلاف ف الراى .. لا يفسد للوز مهلبيه
..
اه والله